Әһли Бејт -АБНА- хәбәр аҝентлијинин вердији хәбәрә әсасән мајын 2-дә Авропа Јајымлары Бирлијинин Ҹеневрәдәки мәнзил-гәрарҝаһында Азәрбајҹанда сөз вә мәтбуат азадлығынын вәзијјәтинә даир ҝениш тәдбир кечирилди. Тәдбирдә Азәрбајҹаны Президент Администрасијасы иҹтимаи-сијаси шөбәсинин мүдири Әли Һәсәнов, Телерадио Шурасынын сәдри Нуширәван Мәһәррәмли, һәмчинин бир нечә мүстәгил ГҺТ нүмајәндәси тәмсил етмишди.
“Инсан һаглары клубу”нун сәдри, Демократија наминә оху!" кампанијасынын тәшкилатчыларындан олан Рәсул Ҹәфәров да һәмин топлантыја гатылан ГҺТ нүмајәндәләриндән бири олуб. Онун сөзләринә ҝөрә, Авропа Јајымлары Бирлијинин тәшкил етдији тәдбирдә пәрдә архасында галан бир хејли мәгам вар. Белә мәгамлардан бири гурумун бирмәналы олараг Азәрбајҹан һакимијјәтинин мөвгејиндән чыхыш етмәсидир: “Әслиндә бу тәдбирин тәшкили дә тәсадүф дејилди. Авропада бу гурума гаршы хејли тәнгидләр вар. Гурум да тәнгидләри јумшалтмаг үчүн авропалылара ҝөстәрмәк истәди ки, бахын, биз Азәрбајҹанда сөз вә мәтбуат азадлығынын вәзијјәтинә даир тәдбир тәшкил едирик. Амма бир мүсбәт мәгам вар иди ки, Бакыда тапа билмәдијимиз мәмурлары Ҹеневрәдә ҝөрдүк. Онлардан бири дә Әли Һәсәнов иди. Ән азы, онлара сөзүмүзү чатдырмаг имканы әлдә етдик. Мүзакирәләрдән сонра кечирилән мәтбуат конфрансыны исә бирмәналы олараг һакимијјәтин апардығы сијасәтин тәблиғи кими гијмәтләндирмәк олар. Һәмин мәтбуат конфрансында һәм Азәрбајҹандан, һәм дә бир нечә башга өлкәдән олан ГҺТ нүмајәндәләри дә иштирак вә чыхыш етмәли иди. Лакин мәтбуат конфрансына 5-10 дәгигә галмыш бунун гаршысы алынды. Тәдбирдә биз Авропа Јајымлары Бирлијинин иҹрачы директоруна вә Әли Һәсәнова јахын отурмушдуг. Мән ҝөрдүм ки, Азәрбајҹан һакимијјәтини тәмсил едән нүмајәндә һејәти 5-6 дәфә өз ирадларыны билдирдиләр ки, ГҺТ-ләр бурада отурмамалыдыр. Онларын буна ихтијары јохдур. Авропа Јајымлары Бирлијиндән бизә бир нечә дәфә јахынлашдылар ки, бураны тәрк едә биләрсиниз? Биз дә исрар етдик ки, бурада отураҹағыг. Бу бахымдан мәтбуат конфрансыны һәм бизим һакимијјәт, һәм дә Авропа Јајымлары Бирлији үчүн бир утанҹ һесаб едирәм. Авропа Јајымлары Бирлијиндән бу ҹүр мөвгеји һеч ҝөзләмәздим. Бирмәналы олараг Азәрбајҹан һакимијјәтинин мөвгејини мүдафә едирдиләр. Бу биабырчылыгда ачыг-ајдын иштирак едирдиләр. Онлары Бакыја тәдбиримизә дәвәт етмишдик. Амма ҝәлмәкдән имтина етдиләр. Елә о вахтдан ҝөрдүм ки, бурада нәсә башга мәсәлә вар. Ҹеневрәјә ҝедәндән сонра исә бир даһа әмин олдум ки, Авропа Јајымлары Бирлијинин мөвгеји нәдән ибарәтдир”.Р.Ҹәфәровун сөзләринә ҝөрә, тәдбирә гатылан јерли вә бејнәлхалг ГҺТ тәмсилчиләри дүнән бәјанатла чыхыш едәрәк Ҹеневрәдә баш верәнләрә етираз билдирибләр: “Бәјанаты АБШ-да јерләшән Журналистләри Мүдафиә Комитәси јајаҹаг. Әли Һәсәнов тәдбирдә бир сөз ишләтмишди ки, ”Ким биздән мүһарибә истәјирсә, мүһарибә алаҹаг". Бәјанатда бу мәгам да әксини тапыр".Р. Ҹәфәровун сөзләринә ҝөрә, тәдбирдән әввәл Әли Һәсәновла сөһбәтләри олуб: “Бирбаша тәмасымыз чох аз олду. Наһарда әкс тәрәфләрдә отурмушдуг. Јалныз тәдбирдән әввәл Әли Һәсәновла бир аз сөһбәт етдик. Бизә һәр һансы иттиһамедиҹи ирадлары олмады. Һәр кәс өз мөвгејини ачыглады. Садәҹә Әли Һәсәнов орадакы һүгуг мүдафиәчиләрини мүхалифәтчи адландырды. Деди, Емин Һүсејнов, Рәсул Ҹәфәров мүхалифәтчидир, ола биләр ҝәлән дәфә онлар мәним, мән онларын јериндә отурум. Белә бир анлашылмаз ачыглама верди. Үмумиликдә ҝөтүрәндә Ҹеневрәдәки тәдбир һеч бир нәтиҹәси вә фајдасы олмајан бир тәдбир олду”. Диггәт: Хәбәрдән истифадә етдикдә мәнбәјә истинад лазымдыр
