Әһли Бејт -АБНА- хәбәр аҝентлијинин вердији хәбәрә әсасән АИП рәһбәрлији һәбсдә олан партија нүмајәндәләринин мәһкәмә иши илә бағлы вәкиллә ҝөрүш кечириб.
Сөһбәт заманы һүгуг мүдафиәчиси ишлә әлагәдар манеәләр јарадылдығыны билдириб: «Билирсиз ки, биз Апеллјасија бахышынын мәһкәмә истинтагы илә апарылмасы үчүн Али Мәһкәмәјә кассасија шикајәти вермишдик. Әслиндә бунун тәмин олунмајаҹғыны билирдик. Амма Авропа преспективи үчүн бүтүн өлкәдахили мүдафиә васитәләриндән мүмкүн гәдәр истифадә етмәјә чалышырыг вә буну да етмәлијик. Амма феврал ајынын 29-у бу ишә бахылды, кассасија шикајәтләримиз тәмин олунмады. Индијәдәк иш апеллјасија бахышына гајтарылмајыб».
Анар Гасымлы вахты илә һүгугларыны мүдафиә етдији Ејнулла Фәтуллајевин ишинин бир һәфтәнин ичиндә Али Мәһкәмәјә верилдијини вә гәрарын гәбул олунараг Апеллјасија Мәһкәмәсинә гајытдығыны дејиб:
«Чүнки орада онун барәсиндә һәбс гәтиимкан тәдбири сечилмәси илә бағлы мүәјјән мүзакирәләр вар иди. Јәни сәрф едирди дејә, һәддән артыг тез бир вахтда һәлл олунду. Амма һазырда һансы сәбәбдән ҝеҹикмәсини билмирик. Өзүм һакимлә бир нечә дәфә данышмышам. Онлар да санки јаддан чыхыб, ҝүја хәбәрләри јохдур, шәклиндә ҹаваблар верирләр. Нәһајәт, бу ҝүн бир даһа әлагә сахладым вә бәлли олду ки, иш артыг Али Мәһкәмәдән чыхыб. Јәгин ки, бу һәфтә әрзиндә биз онун һансы вахта тәјин олундуғуну биләҹәјик».
Һүгуг мүдафиәчи һиҹаб мәһбуслары илә мүтамадиән һәр һәфтәнин шәнбә ҝүнү ҝөрүшдүјүнү дә билдириб: «Онларын сәһһәти, сахланма шәраитләри нормалдыр. Һеч бир проблемләри јохдур».
Вәкил һәмчинин АИП-ин гәрарҝаһы илә бағлы мәсәләдән данышды: «Артыг бу гәрарҝаһын гајтарылмасы үчүн мәнзилин саһиби илә данышмышыг. О, бизә етибарнамә вериб вә онун адындан шәхсән өзүм истинтага мүраҹиәт етмишәм. Прокурорлугдан мәктуб алмышдым ки, арашдырылыб, нәтиҹәси барәдә ҹаваб вериләҹәк.
Нәһајәт, бу ҝүн мәктуб алдым ки, мүраҹиәтимә бахылмасы үчүн Бакы Ағыр Ҹинајәтләр Мәһкәмәсинә ҝөндәрилиб. Һалбуки иш артыг Ағыр Ҹинајәтләр Мәһкәмәсиндән чыхыб, Бакы Апеллјасија Мәһкәмәсиндәдир. Нормал һалда ора ҝөндәрмәли идиләр. Чох ҝүман ки, Бакы Ағыр Ҹинајәтләр Мәһкәмәси дә ора јөнләндирәҹәк. Амма һәр бир һалда дүшүнүрүк ки, бу мүлкијјәтчинин мүлкијјәт һүгугунун позулмасыдыр.
Гәрарҝаһын јерләшдији мәнзиллә бағлы ҹинајәт ишинин материалларында һәр һансыса бир һәбс гојмаг мәһдудијјәти јохдур. Вә мүлкијјәтчи бү ҝүн өз мәнзилинә дахил ола билмир. Чүнки онун гапысы мөһүрлүдүр вә мүһафизә алтындадыр”.
Вүгар Һүсејнли
Диггәт: Хәбәрдән истифадә етдикдә мәнбәјә истинад лазымдыр
