Әһли Бејт -АБНА- хәбәр аҝентлијинин вердији хәбәрә әсасән Түркијәнин хариҹи ишләр назирлији Исраили Јахын Шәргдә сүлһүн бәргәрар едилмәси мөвзусунда бејнәлхалг һүгугун тәләб етдији өһдәликләри јеринә јетирмәјә дәвәт едиб.
Түркијә ХИН-ин јајдығы бәјанатда Исраил һөкумәтинин ишғал алтындакы Фәләстин торпагларында һәјата кечирдији мәскунлашма фәалијјәтини ҝенишләндирәрәк Шәрги Гүдсдәки Һар Һома јашајыш мәнтәгәсиндә 800-дән чох јени евин инша олунмасы үчүн тендер елан етмәси гәтијјәтлә писләнилир.
Бәјанатда билдирилир ки, Исраилин тәкидлә вә дүнја иҹтимаијјәтин реаксијаларына әһәмијјәт вермәјәрәк давам етдирдији мәскунлашма сијасәти бејнәлхалг һүгугу кобуд шәкилдә позур, сүлһ просесиндә ирәлиләмә әлдә едилмәсинә манеә төрәдир вә проблемин һәлли перспективләринә ҹидди зәрбә ендирир: "Исраили Јахын Шәргдә сүлһүн бәргәрар едилмәси мөвзусунда бејнәлхалг һүгугларын тәләб етдији өһдәликләри јеринә јетирмәјә вә сүлһә зәрәр верән бүтүн фәалијјәтинә дәрһал сон гојмаға дәвәт едирик".
Диггәт: Хәбәрдән истифадә етдикдә мәнбәјә истинад лазымдыр
