Әһли Бејт -АБНА- хәбәр аҝентлији- Азәрбајҹан Ислам Партијасы мартын 30-да бәјанат јајыб. Бәјанатда дејилир: “Сон ҝүнләр партија јерли өзәк тәшкилатларында конфранслар кечирмәји планлашдырса да, иҹра һакимијјәти органларынын гејри-гануни мүдахиләси илә үзләшиб. Партија рәһбәрлији гурумун Ләнкәран рајон тәшкилатынын конфрансыны кечирмәк мәгсәдилә март ајынын 16-да рајон иҹра һакимијјәтинә рәсми јазылы мүраҹиәт үнванлајыб. Мүраҹиәтдә јерли тәшкилатын 28 март тарихиндә конфрансыны кечирмәк үчүн јер верилмәси истәниб вә кечириләҹәк топлантыја јерли иҹра органлары дәвәт едилиб.
Партија рәһбәрлијинин мүраҹиәтинә рәсми гајдада ҹаваб вермәк әвәзинә бир нечә шәхс рајон полис шөбәсинә дәвәт едилиб, бурада тәһдид олунублар. Март ајынын 27-дә исә полис әмәкдашлары Ләнкәран сакини, фәал иҹтимаијјәтчи Илһам Һаҹыјевин евинә ҝәлиб, ону полис шөбәсинә апарыб. Даһа сонар Илһам Һаҹыјев Бакы шәһәринә, ДИН-ин Баш Мүтәшәккил Ҹинајәткарлыгла Мүбаризә Идарәсинә ҝәтирилиб. Онун март ајынын 29-у саат 12:00-а гәдәр бу идарәдә сахланмасыны, диндирилмәсини там ганунсуз һәрәкәтләр кими гијмәтләндиририк.
Апарылан сорғулардан мәлум олуб ки, вәтәндашларын тәһдиди сијаси партијалара, хүсусән дә Ислам Партијасына һүгуг мүһафизә органларынын бәсләдикләри негатив мүнасибәтдән доғур. Биз буну инсанларын фундаментал әгидә азадлыгларына, конститусион һүгугларына, халгын, милләтин инкишафыны шәртләндирән вәтәндаш ҹәмијјәтинә гаршы дүшмәнчилик мөвгеји кими гијмәтләндиририк.
Өлкәдә сијаси партијалара гаршы апарылан репрессијалар һакимијјәтин халга әдаләтсиз мүнасибәтиндән ирәли ҝәлир. Чохминли тәрәфдары олан Ислам Партијасынын мәнзил-гәрарҝаһынын гејри-гануни һәбс олунмасы артыг бир илдән чохдур өз һәллини тапмыр. Санки бу өлкәдә ганунлар дондурулуб. Азәрбајҹан Ислам Партијасы әдаләтсизлијә гаршы һәмишә мүбаризә апарыб вә бундан сонра да апараҹаг”.
Диггәт: Хәбәрдән истифадә етдикдә мәнбәјә истинад лазымдыр
