Әһли Бејт -АБНА- хәбәр аҝентлији- “Туран”ын суалларыны һүгуг мүдафиәчиси, Ермәнистан Һелсинки Ассосиасијасынын рәһбәри Микаел Даниелјан ҹавабландырыр.
- Азәри: Низамланма мәсәләсиндә Јереванын мөвгеји олдугҹа сәртдир. Бу, сырави вәтәндашларын әһвал-руһијјәсини нә дәрәҹәдә әкс етдирир? Бу ҝүн Ермәнистанда “сүлһ партијасы” вармы, јохса јалныз “мүһарибә партијасы” мөвҹуддур?
- Ермәни: Сәртлик јалныз рәсми Јереванын јох, һәм дә Бакынын мөвгејидир. Һәр ики тәрәф ҝүҹдән данышыр. “Сүлһ партијасы” нәинки Ермәнистанда, Азәрбајҹанда да јохдур. Ајры-ајры сијаси хадимләр вар. Ермәнистанда либерал-демократик дәјәрләрин дашыјыҹылары олан сијасәтчиләр бу анлама даһа чох јахын ола биләр. Онлар мүхалифәтдә олан Ермәни Үмуммилли Конгресиндә вә јени јаранмагда олан “азад демократлар”ын арасында да вар. Әминәм ки, белә гүввәләр Азәрбајҹанда да вар, анҹаг һакимијјәтдә јох. Бизим республикалардакы индики һакимијјәтләр јалныз сөздә барышыг, низамланма ҝөрүнтүсү јарадырлар, әмәлдә исә “мүһарибә” сијасәтини давам етдирирләр.
Барышыг низамланмадан сонра мүмкүндүр. Низамланма исә баш верәнләри дәрк етдикдән вә икитәрәфли пешманлыгдан сонра олаҹаг. Мән кор-коранә дини төвбәдән данышмырам. Принсипҹә, өлкәләрин һүдудларындан кәнарда ермәниләрлә азәрбајҹанлылар үнсијјәтдә олур, достлуг едирләр, бирҝә бизнес гурурлар. Одур ки, демәк олар, мәсәлә һәлл олунуб, хырда иш галыб - һәм сиздә, һәм дә биздә һакимијјәти дәјишмәк. Артыг бәсдир васитәчиләрә мүраҹиәт олунду, истәнилән мәсәләни өзүмүз һәлл едә биләрик. Бундан өтрү өлкәләримиздә ағыллы адамлар јетәринҹәдир.
- Азәри: Бу јахынларда Азәрбајҹанда Хоҹалы, Ермәнистанда исә Сумгајыт фаҹиәсинин 20-ҹи илдөнүмү гејд олунду. Һәр ики өлкәдә баш верәнләри неҹә гијмәтләндирирсиниз? Бу һадисәләрә ҝөрә мәсулијјәти ким дашыјыр?
- Ермәни: Һәр ҹүр милләтчиләр, мүхтәлиф идарәләрдән олан баҹарыглы “тәхрибатчылар”... Вә садәҹә, инсанлығыны итирмиш адамлар. Беләләри Ермәнистанда да, Азәрбајҹанда да кифајәт гәдәрдир.
- Азәри: Тарих бојунҹа ермәниләрлә азәрбајҹанлыларын (түркләрин) вахташыры вурушмасыны, ган төкмәсини вә сонрадан барышмасыны нә илә изаһ етмәк олар? Бу нијә баш верир?
- Ермәни: Ҹаваб садә вә бирдир: менталитет.
- Азәри: Азәрбајҹандан олан һәмкарларла бирҝә лајиһәләрин, програмларын һәјата кечирилмәсини мүмкүн һесаб едирсинизми? Бу ҝүн һәр ики өлкәнин вәтәндаш ҹәмијјәтини нә бирләшдирә биләр? Һәр ики өлкәнин халгы вә ҹәмијјәтләри үчүн һансы мәсәлә вә мөвзулары актуал сајырсыныз?
- Ермәни: Азәрбајҹандан олан һәмкарларымла мәни көһнә вә фикримҹә, меһрибан достлуг бағлајыр. Биз дәфәләрлә мүхтәлиф бирҝә програмларда иштирак етмишик. Халгларымыз үчүн актуал олан мәсәлә бирдир - һәм Ермәнистанда, һәм дә Азәрбајҹанда һакимијјәтин әсас инсан һүгуг вә азадлыгларыны позмасы. Һакимијјәтдә оланларын өзбашыналығына гаршы бирҝә мүбаризә бәлкә дә вәтәндаш ҹәмијјәтинин нүмајәндәләрини артыг бирләшдириб.
- Азәри: Ермәнистанда индики һакимијјәт дөврүндә низамланма мәсәләсиндә дөнүшүн әлдә олунаҹағына инанырсыныз?
- Ермәни: Мүнагишәнин динҹ јолла низамланмасы һәм Азәрбајҹанда, һәм дә Ермәнистанда леҝитим вә демократик һакимијјәтин олдуғу шәраитдә мүмкүндүр. Бу ҹүр “статус-кво” исә тәәссүф ки, бизим өлкәләрин һакимијјәтләри үчүн сәрфәлидир.
- Азәри: Азәрбајҹанда белә фикир вар ки, Ермәнистан мүстәгил дөвләт дејил вә Москванын истәји илә һәрәкәт едир. Бу фикирләрлә разысыныз?
- Ермәни: Ермәнистан мүстәгил дөвләтдир. Ермәнистан һакимијјәтиндә Русијанын ҝүҹлү нәзарәти алтында олан адамларын олмасы башга мәсәләдир. Биздә Русијанын һәрби базалары вар ки, бу да сијаси курса тәсир ҝөстәрмәјә билмәз. Диҝәр тәрәфдән, Америка вә ја Русија базаларынын јерләшдији өлкәләр мүстәгил дөвләтләр дејил? Әҝәр әдаләтли данышсаг, онда Русијанын нәзарәти вә ја һансыса тәсири алтында олан тәкҹә Ермәнистан дејил. Бәс газ алан Авропа өлкәләри? Ҹексон-Веник дүзәлишинин ләғви илә бағлы бу јахынларда АБШ Конгресиндә кечирилән дебатлар? Русија илә, онун империја хүсусијјәтләри, лидерләрин ДТК сајағы һәрәкәтләри илә һамы һесаблашыр. Мәним буну бәјәниб-бәјәнмәмәјим исә башга мәсәләдир.
Диггәт: Хәбәрдән истифадә етдикдә мәнбәјә истинад лазымдыр
