Әһли Бејт -АБНА- хәбәр аҝентлијинин вердији хәбәрә әсасән Ләнкәранын Нәриманабад-2 гәсәбәси өтән ил бөјүк һај-күјлә мәтбуатын ҝүндәмини зәбт етмишди. Сәбәб исә кәнд сакинләринин ајаға галхыб етираз етмәси иди. Чүнки сәрһәдчиләр јерли сакинләри балыг овуна бурахмырдылар. Даһа дәгиги, балыгчылара ов үчүн јалныз 2 мил мәсафә гәт етмәјә иҹазә вермишдиләр. Бу исә һаглы наразылыға сәбәб олмушду. Ахы башга ҹүр ола билмәзди. 2 милдә балыг тутмаг мүмкүн дејил. Ән азы 10-15 милдә ов олур...
Үсјан заманы 9 нәфәр һәбс олунуб. Сонрадан онлардан беш нәфәри сәрбәст бурахылыб. Дөрд нәфәр - 1951-ҹи ил тәвәллүдлү Һүсејнов Исмајыл Иси оғлу, 1978-ҹи ил тәвәллүдлү Әләкбәров Халиг Ариф оғлу, 1984-ҹү ил тәвәллүдлү Мәмијев Фарид Низами оғлу вә 1993-ҹү ил тәвәллүдлү Аббасзадә Каинат Ағамәҹид оғлу Ҹинајәт Мәҹәлләсинин 315.1 (һакимијјәт нүмајәндәсинә гаршы мүгавимәт ҝөстәрмә вә ја зор тәтбиг етмә) вә 221.3-ҹү (хулиганлыг) маддәләри илә иттиһам олунараг барәләриндә һәбс-гәтимкан тәдбири сечилиб.
Өтән ҝүн гәсәбәјә ҝедиб һәм сонунҹу олајдан сонракы просеслә, һәм дә гәсәбәнин үмуми вәзијјәти илә марагланмаға ҹәһд етдик.
Отлу бәләдијјә...
Нәриманабад-2-јә Лиман адлы гәсәбәдән ҝетдик. Бу ики гәсәбә арасындакы мәсафә 12 км.-дән бир гәдәр артыгдыр. Анҹаг бу јолу гәт еләјәнә гәдәр бизә елә ҝәлди ки, Ләнкәрандан Бакыја ҝедирик. Асфалт өртүјү о гәдәр бәрбаддыр ки, данышмаға еһтијаҹ јохдур. Бу јоллары өтмәк үчүн даһа чох 80-90-ҹы илләрин “Жигули”ләриндән истифадә едирләр. Чүнки башга автомобилләр, хүсусән дә хариҹи машынлар бу ҹүр јоллара јарамыр. Тез сырадан чыхыр. Бизи гәсәбәјә апаран сүрүҹүјлә сөһбәт заманы мәлум олур ки, кәндин јолларыны дүзәлтмәк үчүн сакинләр пул јығмаға башлајыблар: “Артыг 20 мин манат јығылыб. Дүздүр, бу пулла һеч нә еләмәк олмаз. Истәјирик ки, бир аз үстүнү топлајыб бирдәфәлик - 20-30 иллик тәмир еләтдирәк. Бир нечә дәфә мүраҹиәт етдик, һеч ким бизи сајмадығы үчүн мәҹбур галдыг өзүмүз өз јолумуза ишыг салаг. Башга әлаҹымыз јохдур. Чүнки бу јолдан јалныз биз истифадә едирик. Һәр һансы бир мәмур ҝәлиб бизимлә марагланмыр ки, јолумузу да ҝөрсүн”.
Гәсәбәјә чатырыг. Бир-ики дүкан ҝөзә дәјир. Галанлары ја гапысы гыфыллыдыр, ја да елә бәрбад һала салыныб ки, ҝәл ҝөрәсән. Гәсәбәнин мәркәзиндә мәсҹид јерләшир. Мәсҹидин јанында көһнә учуг-сөкүк клуб вар. Вахтилә бура инсанлар топлашараг филмә бахырдылар. Сон он илдә исә ҹамаат топлашыб дәрдләширди. Инди исә дәрдләшмәк үчүн мәркәзи күчәјә топлашырлар. Клубун гапысы үзәриндә бајраг асылыб, артыг бура бәләдијјәнин офисидир. Гапысы даим ачыг олса да фәалијјәтсизликдән һәр јери от басыб.
Гәсәбәнин бир ҝәлир јери
Мәркәздә топлашан 10-15 сакин ҝөзүмүзә дәјир. Сон просесләрлә бағлы онларла сөһбәт етмәк истәјирик. Ҝәлишимизин мәгсәдини ачыглајырыг. Јахынлыгдакы дүкана баш чәкмәји мәсләһәт ҝөрүрләр. Дүкан саһиби Салеһ Әләкбәровду. Онун гардашы Халиг Әләкбәров һәбс олунан дөрд нәфәрдән биридир. Гардашынын һәбс олунмасыны бир даһа јада салыр: “Декабрын 15-дә ахшам 17 радәләриндә овдан гајытды. Евдә јемәјини јејиб баҹымҝилә ҝетди. Гајыданда Дахили Гошунларын әсҝәрләри сахлајараг һәбс едибләр. Һалбуки о һеч бир гаршыдурмада иштирак етмәјиб. Истинтаг мүддәтиндә һансыса полисә ҝүҹ тәтбиг едилдији ”үзә" чыхыб. Бу, бөһтанды, онун һеч бир ҝүнаһы јохдур".
Салеһ Әләкбәров дејир ки, етираз едән гәсәбә сакинләринин наразылыглары һаглы иди: “Бизи динләјән лазымдыр. Әҝәр бизимлә рәсми нүмајәндәләрдән кимсә ҝәлиб сөһбәт еләсәјди, мәгсәдимизин нә олдуғуну биләрди. Бизим бир проблемимиз вар, балыг овуна јарадылан манеәни арадан галдырмаг. Биз дөвләтчилији, вәтәни севирик. Киминләсә дә шәхси-гәрәзимиз јохдур. Гәсәбәнин бир газанҹ мәнбәји вар - о да балыгчылыгдыр. Буранын торпағы нә әкинчилијә, нә дә малдарлыға јарајыр. Јеҝанә газанҹ мәнбәјини дә бизим әлимиздән алмаг истәјирләр”.
Салеһ Әләкбәровун сөзләринә ҝөрә, һазырда гәсәбәдә балыг овујла бағлы проблем јохду: “Әввәлки гајдада ишләјирик. Һәләлик бизә мане олан јохдур. Бир истәјимиз вар, о да һәбс олунанларын азадлыға чыхмасыдыр. Чүнки онлар һагларыны тәләб едибләр”.
Сәбрин дә дашаҹағы ҝүн вар
Гәсәбә сакинләријлә сөһбәт заманы мәлум олду ки, онлар һәбс олунанларын талејиндән ниҝарандылар: “Һәбс олунанларла бағлы һеч бир мәлуматымыз јохдур. Онларын вәкили кимдир, нә вахт мәһкәмә олаҹаг - һеч нә билмирик. Јалныз онларын Күрдәханы Истинтаг Тәҹридханасында сахланмасы һагда мәлуматымыз вар”.
“Ушагларымызы һәбс едәнләр елә билмәсинләр ки, биз сакит отуруб ҝөзләјәҹәјик. Бизим дә сәбримизин дашаҹағы бир ҝүн вар. Неҹә ки, бизи инҹитдиләр вә биз ајаға галхыб етираз етдик. Бах, јенә елә олаҹаг. Гәсәбәдә бир ҝүн јенә үсјан олаҹаг. Буну унутмасынлар”.
***
Нәриманабад сакинләри евдә дәјәрли әшјаларыны сатыб тор алырлар ки, балыг овлаја билсинләр. Анҹаг бир ҝүн ҝәлиб ҝөрүрләр ки, тор јарарсыз һала салыныб. Јәни бу торла нәинки балыг, һеч балина да тутмаг олмаз...
Рамин ДЕКО
Бакы-Ләнкәран-Нәриманабад-Бакы
Диггәт: Хәбәрдән истифадә етдикдә мәнбәјә истинад лазымдыр
