Әһли Бејт -АБНА- хәбәр аҝентлији- Бир мүддәтдир, Азәрбајҹанда фәалијјәт ҝөстәрән мәсҹидләрин Гафгаз Мүсәлманлары Идарәсинин (ГМИ) балансындан алыныб бәләдијјәләрә вериләҹәји барәдә мәлуматлар долашыр. Һәтта һөкумәтин бунунла әлагәдар лајиһә һазырладығы да билдирилир. Мәтбуатда ҝедән хәбәрләрә әсасән, бу барәдә ГМИ сәдри Шејхүлислам Аллаһшүкүр Пашазадә јахын әтрафына билдириб.
Мараглыдыр, ибадәт евләринин ГМИ-дән алыныб бәләдијјәләрә верилмәси нәләри дәјишәҹәк? Мәсҹидләрин фәалијјәтинә тәсири олаҹагмы? “Мәнәви Сафлыға Дәвәт” Иҹтимаи бирлијинин сәдри, илаһијјатчы Һаҹы Елшән Мустафаоғлу билдирди ки, әҝәр белә бир сәрәнҹам имзаланарса, онда јалныз ибадәт оҹагларынын идарә едилмәси, тәсәррүфат мәсәләләри ГМИ-дән алыныб бәләдијјәләрә верилә биләр. Мәсҹидләрә ахундларын вә имамларын тәјинаты сәлаһијјәти, әввәлләр олдуғу кими, ГМИ-дә галаҹаг.
Е.Мустафаоғлу гејд етди ки, ибадәтҝаһларын ГМИ-нин табечилијиндә олмасына бахмајараг, әксәр мәсҹидләрин шәраити, истилик, су тәҹһизаты, канализасија системи чох бәрбад вәзијјәтдәдир. Вә бүтүн бу проблемләр мәсҹид иҹмасы, ибадәт әһли тәрәфиндән һәлл олунур: «Мәсҹидләр бәләдијјәләрин табечилијинә верилсә дә, дүшүнмүрәм ки, бу, садаладығым проблемләрин һәллинә мүсбәт тәсир ҝөстәрсин. Чүнки, Азәрбајҹанда бәләдијјәләр јалныз торпаг алыб сатмагла мәшғулдур. Әһалинин сосиал проблемләринин һәллинә исә гәтијјән мараг ҝөстәрмирләр. Јәни бу истигамәтдә фәалијјәтләри сыфра бәрабәрдир. Бу һалда һәмин гурумлар мәсҹидләри неҹә идарә вә ја јаранан мүшкүл мәсәләләри һәлл едә биләрләр? Әксинә, мәсҹидләр бәләдијјәләрин балансына вериләҹәксә, бундан јалныз һәмин гурумлар газанаҹаглар. Даһа дәгиг десәк, нәзир гутулары бәләдијјәләрин әлавә ҝәлир мәнбәјинә чевриләҹәк».
Бир чох һалларда ибадәтҝаһларын ја дөвләт тәрәфиндән, ја да ајрылан шәхси малијјәләр васитәсилә тәмир олундуғуну диггтә чатдыран мүсаһибимиз бу тикилиләрин талејин үмидинә бурахылдығыны сөјләди: «Мөвҹуд проблеми бирдәфәлик арадан галдырмаг үчүн мәсҹид иҹмаларына ҝениш статус верилмәлидир. Гој, мәсҹиди иҹма өзү сахласын, јаранан һәр һансы проблеми дахили имканлары, јәни верилән ианәләрин, нәзирпулларын һесабына һәлл етсин. Индики Гафгаз Мүсәлманлары Идарәси чарын фәрманы илә Загафгазија Мүсәлманларынын Руһани Идарәси ады алтында тәсис олунуб. Даһа сонра елә һәмин ад алтында ССРИ тәрәфиндән јенидән јарадылыб вә бүтүн мәсҹидләр идарәнин табечилијинә верилиб. Әслиндә, бу систем дүзҝүн дејил. Мәсҹиди диндарлар, инанҹлы инсанлар идарә етмәлидир. Бүдҹәнин һансы вәсаитләрдән формалашдығыны, һара хәрҹләндијини өзләри мүәјјәнләшдирмәлидирләр. Индики һалда исә, бүтүн бу мәсәләләр гаранлыгдыр, шәффаф дејил. Әслиндә, ил әрзиндә нәзир гутуларында нә гәдәр вәсаитин топландығы мәлум олмалы вә һәмин вәсаит мәсҹидин еһтијаҹларыны өдәмәк үчүн сәрф олунмалыдыр. Дүздүр, бунлар сәнәдләрдә өз әксини тапыб. Амма нәдәнсә ишләк механизмә чеврилмир. Һансыса мәсҹиддә проблем јарананда дини иҹма мәәттәл галыр ки, кимин гапысыны дөјсүн, һансы гурума мүраҹиәт етсин. Мәсҹидин иҹмасы ГМИ-јә үз тутанда «малијјә имканларымыз јохдур», дөвләт идарәләри исә «дин дөвләтдән ајрыдыр, она ҝөрә дә көмәк етмәјә сәлаһијјәтимиз јохдур» ҹавабыны алыр».
Ҹәваһир
Диггәт: Хәбәрдән истифадә етдикдә мәнбәјә истинад лазымдыр
