Әһли Бејт -АБНА- хәбәр аҝентлијинин вердији хәбәрә әсасән ҹари илин 24 јанвар тарихиндә Азәрбајҹанла Исраил арасында “Ҝөмрүк саһәсиндә гаршылыглы дәстәк барәдә Мүгавилә” имзаланыб. Гејд едәк ки, 2011-ҹи илин ҝөстәриҹиләринә әсасән ики өлкә арасында тиҹарәт дөвријјәси 2,5 милјард доллар тәшкил едиб. Рәсми ҝөстәриҹиләрә ҝөрә, Исраил тиҹарәт дөвријјәси бахымындан Азәрбајҹанын рәсмән бешинҹи тәрәфдашыдыр. Хатырладаг ки, мүгавиләнин имзаланмасы Давосда Азәрбајҹан вә Исраил президентләри Илһам Әлијевин вә Шимон Пересин арасында кечирилән ҝөрүшдә мүзакирә едилән мәсәләләрдән бири иди.
Ҝөмрүк саһәсиндә әмәкдашлыг мүгавиләсини ДҜК-нин сәдри Ајдын Әлијев вә Исраилин Азәрбајҹандакы сәфири Михаел Лотем имзалајыб. Имзаланма мәрасиминдә А.Әлијев Исраил ҝөмрүк органлары илә әмәкдашлығда мараглы олдугларыны да гејд едиб: “Дөвләт Ҝөмрүк Комитәси Исраил Ҝөмрүк Идарәси илә әмәкдашлығын ҝенишләнмәсиндә мараглыдыр вә бу мүгавилә икитәрәфли мүнасибәтләрә јени импулс верәҹәк, әмәкдашлыг просесини сүрәтләндирәҹәк” (мәнбә-"Изрус" порталы).
Мүгавиләјә ҝөрә, Исраил тәрәфи Азәрбајҹан ҝөмрүк органларынын јени технолоҝијаларла тәҹһиз едилмәсиндә, кадрларын һазырланмасында, наркотик вә гачагмалчылыгла мүбаризә саһәсиндә дәстәк верәҹәјини бәјан едиб. Ҝөмрүкдә олан мәнбәмизин мәлуматына ҝөрә, ики өлкә ҝөмрүк органлары арасында илк контактлар 2009-ҹу илин август ајында олуб. Белә ки, һәмин тарихдә ДҜК-нын нүмајәндә һејәти Исраилә илк сәфәрини етмишди. Илкин данышыгларда нијјәт протоколу да имзаланмышды. Исраил тәрәфиндән сәнәдә Исраил Верҝиләр Идарәсинин ҝөмрүк шөбәсинин рәиси Дорон Арбели, өлкәмиз тәрәфиндән ДҜК-нын хариҹи әлагәләр шөбәсинин мүдири Дилавәр Фәрзәлијев имза атыб. Мәлуматлара ҝөрә, Исраилдә азәрбајҹанлы рәсмиләр Ашдод лиманынын ҝөмрүјүндә олублар, онлара лиманын тиҹарәт дөвријјәси, ҝөмрүк хидмәтинин инспексијасынын тәшкили, мүвафиг ганунвериҹилик барәдә мәлумат верилиб.
Мәһз бу сәфәрдән сонра, 2011-ҹи илин мартында мәхсуси олараг Исраилә дәстәјини нүмајиш етдирмәк үчүн Азәрбајҹан Назирләр Кабинети јәһудиләрин Песах бајрамы үчүн нәзәрдә тутулмуш вә Исраилдән ҝөндәрилән матса вә кошер ширәсинин ҝөмрүк рүсумундан рәсмән азад етди. Гејд едәк ки, адлары чәкилән мәһсуллары Исраилдән “Ор-Авнер” бејнәлхалг фонду ҝөндәриб. Гејд едәк ки, бәзи мәнбәләрә ҝөрә, адычәкилән фонд бирбаша Исраил дөвләти вә хүсуси хидмәтләри илә бағлы тәшкилатдыр. Мараглыдыр ки, ҹари илин 19 јанвар тарихиндә өлкә МТН “Хабад ов-Авнер” тәһсил мәркәзинә гаршы террорчулугда сучланан шәхсләрин тутулмасына даир мәлумат јајмышдыр.
Мараглыдыр ки, 2010-ҹу илдә Исраилдән Азәрбајҹана ихраҹат 110 милјон доллар тәшкил едиб, бунлардан 62 млн мәһз јүксәк технолоҝијалар саһәсинә аиддир. Белә ки, јүксәк технолоҝијалы мүасир аваданлыг ДҜК, МТН, ДИН, ФҺН вә Рабитә вә Информасија Технолоҝијалары Назирлијинә верилмишдир.
Диггәт: Хәбәрдән истифадә етдикдә мәнбәјә истинад лазымдыр
