Нурларын Нуру олан Рәббимиз ады илә башлајырам. Варлыг аләмини өз нуранијјәти илә зүлмәтдән чыхаран, јохлугдан варлыға кечирдән Мүтәал Аллаһын ады илә!
***
Мәмләкәтимиздә сон дөнәмләр тәдбир мәканларында тез-тез ишыглар сөнүр. Бир нечә саат өнҹә Зијалылар Форумунун тәдбиринин кечирилмәли олдуғу “Һјатт Реҝенҹј”дә ишыглар сөнүб. Бир нечә ҝүн өнҹә “Азадлыг”ын јүбилеј тәдбиринин кечирилдији бир шадлыг сарајынын да ишығы сөнмүшдү. Ондан да өнҹә “Гәдир Хум” бајрамында Актјорлар Евинин ишығы сөнмүшдү. Диггәтли изләјиҹиләр билир, “Мави Мәрмәрә”ҝәмисинин дә Бакыдакы тәдбиринин кечирилдији Парк ИНН-дә дә ишыглар сөнмүшдү. Ондан да өнҹә “Гүдс ҝүнүндә” “Ҹаспиан Плаза”нын конфранс залынын ишығы сөнмүшдү... Ачығы, бунлар, елә дә чох арашдырмадан јада дүшәнләрдир. Демәли, ишығын сөнмәси, артыг бир тенденсијадыр.
Башга бир тенденсија да мүшаһидә едилмәкдәдир. Мәлуматлыларын ичәрисиндән ЗИЈАЛЫЛАРЫН сәһнәјә чыхмасы. Артыг бу мәмләкәтдә шәхсијјәт вә ләјагәт ҝүндәмин приоритет мәсәләсинә чеврилмәкдәдир. Физики ишыглы һәјатын ардынҹа дејил, ЗИЈАНЫН ардынҹа олмаг тенденсијасы шиддәтләнир. Бу шиддәтләндикҹә физики гаранлыглар даһа да ашкар ҝөрсәнир.
Бир тенденсијаны да гејд едәк ки, мөвзумуз там камилләшсин. Бу ҝүн зүлмәт долу зинданларда ЗИЈА дашыјыҹылары бир НУР сачыр. Һаҹы Мөвсүмләр, Ариф Һаҹылылар, Бәхтијар Һаҹыјевләр, Һаҹы Талеһләр, Турал Аббаслылар, Һаҹы Абҝүлләр, Мәһәммәд Мәҹидлиләр, Һаҹы Раминләр, Саһиб Кәримовлар, Елнур Мәҹидлиләр... Бир даһа Јусифләрә саламлар!!!Физики ишыглар сөндүкҹә гаранлыгмы чөкүр?! Әсла!!!
Затән физики гаранлыг ЗИЈАНЫ өлдүрә билмәз.
Нурларын Нуруна бүтүн гаранлыглардан пәнаһ апарырыг.
Һаҹы Илгар ИБРАҺИМОҒЛУ
Диггәт: Хәбәрдән истифадә етдикдә мәнбәјә истинад лазымдыр
