Әһли Бејт -АБНА- хәбәр аҝентлијинин вердији хәбәрә әсасән:Декабрын 12-дә президент Илһам Әлијев Инзибати Хәталар Мәҹәлләсинә дәјишикликләри тәсдигләјиб. Мәҹәлләјә едилмиш дәјишикликлә иҹра һакимијјәти органы илә разылашдырылмадан вәтәндашларын дини тәһсил мүәссисәләриндә тәһсил алмаг үчүн хариҹә ҝөндәрилмәси, дин хадимләринин мүбадиләси, ислам дининә аид ајин вә мәрасимләри Азәрбајҹандан кәнарда дини тәһсил алмыш вәтәндашларын һәјата кечирмәси гадағандыр.
Һәмин ҝүн президент Илһам Әлијев Ҹинајәт Мәҹәлләсинә јениликләри дә имзалајыб. Ҹинајәт Мәҹәлләсинә әлавә едилән јени маддәјә ҝөрә, ганунсуз олараг дини тәјинатлы әдәбијјаты, әшјалары вә дини мәзмунлу башга мәлумат материалларыны истеһсал етмә, идхал етмә, сатма вә ја јајма беш иләдәк мүддәтә азадлыгдан мәһруметмәни нәзәрдә тутур.
“Медиа форум” сајтына данышан Турал Һәсәнли дејиб ки, ганунлардакы јениликләр ајдын дејил: “Ҹинајәт Мәҹәлләсинә вә Инзибати Хәталар Мәҹәлләсинә дәјишикликләр үмуми характер дашыјыр. Деталлара вә мөвзулара ишарә олунмур. Үмумијјәтлә, Азәрбајҹанда гәбул олунан бу кими ганунлар әслиндә гәлиб характери дашыјыр. Ганунлардакы сон јениликләрин ишләјиб-ишләмәмәси фәрдләрдән асылы олаҹаг. Јәни һакимијјәтин хошуна ҝәлмәјән вә марағына ујғун олмајан руһаниләр бу ганунларын гәлибинә салынараг истәнилән вахт һәбслә үзләшәҹәк”.
Ислам дининә аид ајин вә мәрасимләри Азәрбајҹандан кәнарда дини тәһсил алмыш вәтәндашларын һәјата кечирмәсинә гојулан гадағаја тохунан Турал Һәсәнли дејиб: “Намаздан тутмуш дини бајрамлара кими һәр шеј дини ајин мәнасыны дашыјыр. Она ҝөрә гануна бу ҹүр гадаға салынмасы анлашылмыр. Ҝөрүнүр, бу мәсәләдә дә фәрдләрә бахылаҹаг. Белә гадағадан истифадә едиб истәнилән дин хадимини нејтраллашдырмаг мүмкүндүр”.
Диггәт: Хәбәрдән истифадә етдикдә мәнбәјә истинад лазымдыр
