Әһли Бејт -АБНА- хәбәр аҝентлијинин вердији хәбәрә әсасән: Wikileaks сајты АБШ дипломатларынын нөвбәти мәхфи телеграмыны јајыб. Сәнәд “Монитор” журналынын редактору Елмар Һүсејновун гәтлиндән бәһс едир. Һесабаты сәфир Енн Дерси 24 јанвар 2006-ҹы илдә МТН рәһбәри Елдар Маһмудовла ҝөрүшүн јекунларына ҝөрә јазыб.
Назир билдириб ки, гәтлин иҹрачылары Ҝүрҹүстан вәтәндашлары Таһир Хубанов вә Тејмураз Әлијевдир. Онлар бир ај журналисти офисдән евә ҝедәркән изләјибләр вә телефон данышыглары изләмәнин гәтл анына гәдәр давам етдијини ҝөстәрир. Ҹинајәтдән јарым саат сонра онлар такси тутараг автовағзала, орадан да Ҝүрҹүстана јола дүшүбләр.
“Биз башга өлкәнин әразисиндә әмәлијјат һәјата кечирә билмәрик”, дејәрәк Маһмудов шүбһәли шәхсләрин һәбс олунмама сәбәбләрини изаһ едиб. Даһа сонра о дејиб ки, онлар артыг Ҝүрҹүстанда дејилләр вә Азәрбајҹан 186 өлкәдә ахтарыш елан едиб. Хубанов вә Әлијевлә ејни мәнзилдә јашајан даһа үч Ҝүрҹүстан вәтәндашы ишә ҹәлб олунуб. Гәтл ҝүнү онлар “ҹидди проблемләр” ҝөзләндији үчүн мәнзили дәрһал тәрк етмәји вә Ҝүрҹүстана гајытмағы тәләб едибләр. “Әминик ки, Хубанов вә Әлијев ҹинајәткардыр”, - дејә назир билдириб.
Даһа сонра назир бандит дәстәсинин башчысы Һаҹы Мәммәдовун Елмар Һүсејновун гәтлини кечмиш игтисади инкишаф назири Фәрһад Әлијевин сифариши илә тәшкил етдији һаггында етирафыны хатырладыб. Назир инандырырды ки, Фәрһад Әлијев Һаҹы Мәммәдовла әлагәли иди вә һәтта вахтилә онун гоһуму илә евләнмәјә һазырлашырды. Даһа әввәлләр исә онлар нефт сатырдылар вә буну чеченлер васитәсилә едирдиләр.
“Фәрһад Әлијев буну инкар едир, амма бизим тәһгигатымыз ҝөстәрир ки, онларын үнсијјәти вар иди”, - дејә Маһмудов билдириб. Бу заман о, Таһир Хубанов вә Тејмураз Әлијевин бунунла нә әлагәси олдуғуну изаһ етмәјиб.
МТН рәһбәри даһа сонра иддиа едиб ки, Фәрһад Әлијев гардашы васитәсилә Елмар Һүсејнова барәсиндәки тәнгиди нәшрләрә сон гојмасы мүгабилиндә 400-500 мин доллар тәклиф едиб.
“Кәшфијјатымыз ҝөстәриб ки, журналист бу мәбләғдән имтина едәрәк, 2 млн. доллар тәләб едиб вә елә буна ҝөрә өлдүрүлүб”, - дејә “Wikileaks” назирдән ситат ҝәтирир.
Диггәт: Хәбәрдән истифадә етдикдә мәнбәјә истинад лазымдыр
