Әһли Бејт -АБНА- хәбәр аҝентлијинин вердији хәбәрә әсасән: Ајәтуллаһ Әһмәд Хатәми бу ҝүн Теһранын ҹүмә намазы хүтбәләриндә АБШ-ын Теһрандакы ҹасуслуг јувасынын (сәфирлији) Имам Хомејни (р.ә) јолунун давамчылары олан тәләбәләр тәрәфиндән әлә кечирилмәсинин илдөнүмү мүнасибәти илә дејиб: АБШ-ын дүнјадакы игтидары сүгут етмәкдәдир вә Капитализм гурулушу да халгларын тәләбләринә артыг ҹаваб верә билмир.
Теһранын ҹүмә намазы хәтиби АБШ-ын бир чох дахили вә хариҹи проблемләрлә үз-үзә олдуғуна ишарә едәрәк, Уал Стрит етиразларынын давам етмәсини Гәрб гурулушунун мәғлубијјәтлә үзләшмәсинин вә өз газыдығы гујуја дүшмәсинин нишанәси адландырыб.
Ајәтулла Әһмәд Хатәми АБШ рәсмиләринин Иран Ислам Ингилабы Кешикчиләри Корпусу-Сепаһын јүксәк сәвијјәли команданларынын террор едилмәси илә бағлы чыхышлары һагда да дејиб: Бүтүн дәлил вә сүбутлар АБШ-ын дүнјада ән бөјүк дөвләт террорчусу олдуғуна дәлаләт едир.
О, Сепаһ команданларынын террор едилмәси үзрә АБШ рәсмиләринин етирафларыны бејнәлхалг аренада Америка үчүн рүсвајчылыг вә зәлиллик амили адландырыб.
Ајәтуллаһ Хатәми АБШ-ын реҝион өлкәләриндәки диктатор режимләрини һимајә етмәси мәсәләсинә дә мүнасибәт билдириб: "АБШ Јахын вә Орта Шәргдә формалашмыш Ислами Ојаныш далғасынын гаршысыны алмаға гадир дејил. Чүнки, зоракылыг вә һеҝемончулуг дөврү артыг баша чатыб вә артыг зоракы режимләрә халглар арасында јер јохдур."
Теһранын ҹүмә намазы хәтиби Бәһрејндә ҹәрәјан едән ҹинајәтләрә ҝәлинҹә исә дејиб: "АБШ вә Әрәбистан Али-Хәлифә режиминин ән бөјүк һимајәчиләридирләр вә Бәһрејн халгыны гырғын етмәклә бу режими һакимијјәтдә сахламаға чалышырлар."
Ајәтуллаһ Хатәми ҝүнаһсыз гадынларын һәбс едиләрәк, Али-Хәлифә режиминин зинданларында сахланылмасына ишарә едәрәк, вурғулајыб: Бу зинданларда гадынлар мүмкүн олан ән пис формада ишҝәнҹә едилирләр. Һалбуки, онларын ҝүнаһы өз һаглы тәләбләрини истәмәләридир."
Хатәми АБШ-ын Ирагдан чыхмасы һагда да хатырладыб: АБШ узун илләр ишғалчылыгдан сонра һазырда Ирагы тәрк етмәјә мәҹбурдур. Чүнки, бу ишғалчылыг Вашингтон үчүн бәдбәхтлик вә рүсвајчылыгдан башга бир шеј газандырмады.
Теһранын ҹүмә намазы хәтиби сөзләринин давамында вурғулады: АБШ өтән 50 илдә дүнјанын онларла өлкәсиндә бирбаша вә ја долајысы илә һәрби иштирака вә мүдахиләјә малик олуб. Амма, сонда онлары рүсвајчылыгла тәрк етмәјә мәҹбур олуб.
Ајәтуллаһ Хатәми сонда дејиб: АБШ-ын ҝәмиси лилә отуруб вә һеҝемончулуг гурулушу артыг бир даһа Ислами Ојаныш гаршысында ајаға галхмаға гадир дејил.
Диггәт: Хәбәрдән истифадә етдикдә мәнбәјә истинад лазымдыр
