Әһли Бејт -АБНА- хәбәр аҝентлијинин вердији хәбәрә әсасән: Милли Мәҹлис Ҹинајәт Мәҹәлләсинә дәјишикликләри мүзакирә едиб. Тәклиф олунан дәјишикликләр әсасән дини фәалијјәт, еләҹә дә дини китаб вә әшјаларын ганунсуз сатышы, идхалына гојулан ҹәримәләри даһа дә ағырлашдырыр, ејни заманда һәбс ҹәзасы нәзәрдә тутулур. Дәјишикликләрә ҝөрә, дини әдәбијјат вә әшјаларын ганунсуз јајылмасына сәрт ҹәзалар мүәјјән олунур. Тәклиф олунан әлавәләр диндарлар тәрәфиндән бирмәналы гаршыланмајыб. Бир чохлары буну өлкәдә дини фәалијјәти даһа чох нәзарәт алтына алмаг ҹәһди сајыр. Гејд едәк ки, Азәрбајҹан ганунвериҹилијиндә һөкумәтин разылашдырмадығы дини әдәбијјаты јајмаг, сатмаг вә ја өлкәјә ҝәтирмәк гадағандыр.
Дүнән пајтахтын дини китаб сатылан мағазаларына баш чәкиб мараглы мәлуматлар әлдә етдик. Метро вә кечидләрдә дини китаб сатышы илә мәшғул оланлар ганунвериҹилијә едиләҹәк дәјишиклији етиразла гаршыладылар. Дини китаб сатышы илә мәшғул олан Елхан Оруҹлу дејир ки, дини китабларын сатышдан чыхарылмасы дүзҝүн дејил: “Дини Гурумларла Иш үзрә Дөвләт Комитәси бир нечә илдир ки, метроларда дини китабларын сатышыны гадаған едиб. Һәтта инди Гуран, шәриәт китаблары, һәдисләр вә Мәһәммәд Пејғәмбәрин (с.ә.с.) һәјатына даир китаблары тапмаг мүшкүлә чеврилиб. Биз нә едә биләрик ки? Имкан вермирләр сатмаға. Бакы Метрополитен Идарәсиндән тапшырыг верилиб ки, дини секталара аид китаблары вә бир чох китаблары сатанлар бурадан говулаҹаг. Инди бу китаблары анҹаг интернетдән тапыб охумаг олар”.
Диҝәр мүсаһибимиз Мөвлуд бәјин сөзләринә ҝөрә, дүнјанын һеч јериндә белә бир ганун јохдур: “Мән Асијаны да, Авропаны да ҝәзмишәм. Анҹаг һеч бир јердә нә Инҹилә, нә Гурана гадаға јохдур. Мүсәлман өлкәсиндә бу ҹүр гадаға гојмаг дүзҝүн дејил. Лисензија мәсәләси исә ҹамаатдан пул гопармаг үчүндүр. Һәтта Рамазан ајында да дини китаб сатмаға иҹазә вермирләр”.
“Ислам” дини маллар мағазасында сатыҹы ишләјән ханым дејир ки, һазырда даһа чох сатылан китаблар арасында Имам Әлинин һәдисләри вә Иранын дини алимләринин тәфсирләрини садаламаг олар: “Амма Ирандан ҝәтирилән китабларын сатышына иҹазә верилмир. Дејиләнә ҝөрә һәмин китаблар гадаған едилиб”.
Вәһһабилик, нурчулуг, бәһаилик, кришначылыг, јәһова вә диҝәр мәзһәбләрин вә миссионерлијин тәблиғинә хидмәт едән әдәбијјата исә әксәр дини китаб мағазасында раст ҝәлмәк мүмкүндүр. Бу китабларын сатышы илә мәшғул олан, адынын чәкилмәмәсини истәјән шәхс дејир ки, сатышы гадаған олунан китаблар арасында Мәһәммәд Тиҹанинин китаблары вар. Бу китаблар Иранда ҝениш шәкилдә јајылыр, амма Азәрбајҹанда она гадағалар вар: “Һәтта Түркијәдә дә сәрбәст сатышда олан, Дијанәт Ишләри Башганлығынын иҹазә вердији бәзи китаблар Азәрбајҹана бурахылмыр, онлар да гадаған олунмуш китаблар сијаһысындадыр. Дүшүнүрәм ки, әдәбијјат зијанлы, зәрәрли фикир тәблиғ едирсә, мәһкәмәјә мүраҹиәт етмәклә һәмин китабын јајылмасынын гадаған едилмәсинә наил олмаг олар. Анҹаг дини китабларын һәр биринин сатышыны гадаған етмәк гануназиддир”.
Китаб мағазасында бизимлә һәмсөһбәт олан шәхс исә мараглы ачыглама верди. Дејир ки, китабларын јығышдырылмасы кампанијасы һүгуг-мүһафизә органларынын сон ҝүнләр радикал дини тәригәт нүмајәндәләринә, хүсусилә дә радикал вәһһабиләрә гаршы башладығы әмәлијјатларла бағлыдыр: “Бу сәбәбдән дә һүгуг-мүһафизә органлары әсасән радикал дини тәригәтләрә аид олан дини әдәбијјатларын сатышдан чыхарылмасы истигамәтиндә ишә башлајыб. Амма бу кампанија чәрчивәсиндә диҝәр дини әдәбијјатлар да јығышдырылыр. Һәм дә китаблары һеч ким мүсадирә етмир, садәҹә китабларын сатышдан јығышдырылмасына даир хәбәрдарлыг едилир”.
“Мүслүм-шоп”, “Зәһра”, “Әл-Һуда”, “Китаб еви” вә диҝәр дини әдәбијјатлар сатылан мағазаларда апардығымыз рејдләрдән ајдын олду ки, рәфләрдә сатышы гадаған олунан китаблар һәлә дә вар. Анҹаг сатыҹылар һәмин китабларын шәкилләрини чәкмәјә иҹазә вермәдиләр. Мағазанын сатыҹысы дејир ки, бурада даһа чох Ирандан ҝәтирилән китаблар сатыша чыхарылыр: “Даһа чох ”Мәһәррәмлик" вә “Тәкамүл” тәрҹүмә мәркәзиндә чап едилән Сејид Әли Әкбәр Оҹагнежадын мүәллифи олдуғу “Мәһәррәмлик һагда суал-ҹаваб” китаблары сатылыр. Һәмчинин “Кәрбәла шәһидләринә ағламаг” (Муса Ҝүнәш, Ҹәфәр Бәндидәрја) вә “Вәһһабилијин ајинләри” (ајәтуллаһ Ҹәфәр Сүбһани) китаблары сатылыр. Анҹаг бунлары ҝизли шәкилдә вә сифариш әсасында сатырыг. Һәр кәс билир ки, бу китабларын сатышы гадаған едилиб".
Мүсаһибимизин сөзләринә ҝөрә, бу китабларын әксәријјәтини шиә алимләри јазыблар.
Шәһәрдә јерләшән вә вәһһабиләрә мәхсус олдуғу дејилән “Мүслим-шоп” дини мағазасындан дәфәләрлә сатышы гадаған олунан дини әдәбијјатлар, диск вә 2 аудиокасет мүсадирә олунуб. Буранын мүштәриләри дејир ки, буна бахмајараг һәлә дә бу мағазада белә китаблар ҝизли јолла сатылыр.
Мүшаһидәләримизә әсасән, бу мағазаларда сатыҹы гисминдә бир гајда олараг диндар инсанлар чалышыр вә онларын ҝејими дә спесифик олур. Вәһһабиләрин саһиб олдуғу мағазаларын сатыҹылары исә белә дејир: “Гадаған едирләр, етсинләр. Инди интернет васитәсилә истәнилән дини әдәбијјаты әлдә етмәк олур”.
Китабларын гијмәтинә ҝәлинҹә исә онлар 2-30 манат арасындадыр. “Јәһова шаһидләри”нин, кришначыларын, нурчуларын әдәбијјаты исә вәтәндашлар арасында пулсуз пајланыр.
Дини китаб сатан мағазанын саһиби Һаҹы Әрәстун Аллаһвердијев дејир ки, инди зәрәрли дини әдәбијјат ады илә зәрәрсиз әдәбијјаты да гара сијаһыја салырлар: “Мән дини, ирги ајры-сечкилији тәблиғ едән китабларын сатышынын әлејһинәјәм. Чох ҝүман ки, белә китабларын өлкәјә ҝәтирилмәсиндә әсас мараг бизнеслә бағлыдыр. Садә вәтәндашлар дини китаблары өлкәјә ҝәтирмәклә бизнес марагларыны ҝүдүрләр”.
Диггәт: Хәбәрдән истифадә етдикдә мәнбәјә истинад лазымдыр
