Әһли Бејт -АБНА- хәбәр аҝентлијинин вердији хәбәрә әсасән: Бу ҝүнләрдә “WikiLeaks” сајтында ачыгланмыш материаллар арасында АБШ-ын Бакыдакы сәфири Енн Дерсинин 2006-ҹы илин нојабрында “Азадлыг” гәзети редаксијасынын көчүрүлмәси вә АНС телеканалынын бағланмасы барәдә мәлумат да вар. Сәфир бүтүн бунларын неҹә баш вердијини вә нојабрын 24-дә Илһам Әлијевлә сөһбәтини әтрафлы тәсвир едир. О заман мәлум олуб ки, Милли Телевизија вә Јајым Шурасы нојабрын 25-дән АНС телеканалынын бағланмасы барәдә гәрар гәбул едиб.
“Әлијев деди ки, Азәрбајҹанын имиҹинә зәрәрин дәрәҹәсини баша дүшүр, лакин буна мәтбуат азадлығына гаршы аддым кими бахмаг лазым дејил. О дејиб ки, Рамиз Меһдијевә вә Әли Һәсәнова тапшырыб ки, вәзијјәтдән чыхыш јолу тапсынлар”, - дејә Енн Дерси јазыр.
Әлијев АНС-лә бағлы нә дејиб?
Әлијев сәфири инандырмаға чалышыб ки, бурада сијаси мотив јохдур вә Милли Телерадио Шурасы “бу аддымы” атмаға мәҹбур олуб, чүнки бир илдир ки, АНС милли ганунлар чәрчивәсиндә фәалијјәт ҝөстәрилмәси илә бағлы тәләбләрә мәһәл гојмур.
Һәмчинин Әлијев билдириб ки, бу телеканалла һеч бир шәхси проблеми јохдур вә 2005-ҹи илдә телеканалын дәстәкләнмәси илә бағлы бәјанатыны да хатырладыб. Белә ки, о заман телеканал президентин әмисинин һүҹумларына мәруз галмышды.
“Һүгуги мәсәләләр низамланана гәдәр канал өз фәалијјәтини бәрпа едә биләрми?” суалынын ҹавабында Әлијев дејиб ки, АНС ганунун тәләбләринә риајәт етмәкдән бојун гачырыб.
Сәфир хатырладыб ки, әҝәр вәзијјәт тез һәллини тапмаса, бу, икитәрәфли мүнасибәтләрә вә Азәрбајҹанын репутасијасына мәнфи тәсир ҝөстәрәҹәк.
Сәфир АБШ-а мәктубунда “Азәрбајҹан шокдадыр” јазыб
Һәмин ҝүн ахшам Бакы Игтисад Мәһкәмәси “Азадлыг”, “Бизим јол” гәзетләринин, “Туран” аҝентлијинин вә Халг Ҹәбһәси Партијасынын Хагани, 33 үнванындакы бинадан чыхарылмасы барәдә гәрар гәбул едиб. Бинадан чыхарылма Бакы полисинин рәис мүавини Јашар Әлијевин рәһбәрлији илә һәјата кечирилиб.
Үч ҝүндән сонра Дерси јени телеграм ҝөндәрәрәк АНС-ин бағланмасы вә апарыҹы КИВ-ләрин өз офисләриндән чыхарылмасы илә бағлы Азәрбајҹан иҹтимаијјәтинин шока дүшдүјүнү билдириб. Дерси гејд едиб ки, Р.Меһдијев һәмин КИВ-ләрә вә АХҸП-јә адекват јерләр вә имканлар вәд етсә дә, бу, баш вермәјиб. Нојабрын 27-дә ХИН рәһбәри Елмар Мәммәдјаровун Енн Дерси илә ҝөрүшүндә сөјләдији фикирләри исә сенсасија һесаб етмәк олар. Белә ҝөрүнүр ки, Дерси Мәммәдјарова ҝүҹлү тәзјиг ҝөстәрәрәк билдириб ки, әҝәр проблем һәллини тапмаса, ҝәләҹәк икитәрәфли мүнасибәтләр суал алтына дүшә биләр. Назир Р.Меһдијевә вә диҝәрләринә зәнҝ вурараг вәзијјәти мүзакирә етмәјә разылашыб. Лакин мәјус ҝөрүнән Мәммәдјаров сөһбәти бу фраза илә битириб: “Баш верәнләрин һамысы “мәмур ахмаглығынын” нәтиҹәсидир”.
Әмр Рамил Усубовдан ҝәлиб
Сәфир сонра јазыр ки, һакимијјәт “Азадлыг” гәзетинин редаксијасындан чыхарылмыш тәшкилатларын мүлкијјәти илә бағлы вәдләрини јеринә јетирмәјиб. Һәмин КИВ-ләр вә АХҸП өз әшјаларыны ҝөтүрмәк үчүн бинаја бурахылмајыб. Бинаны мүһафизә едән полисләр билдирибләр ки, әшјаларын апарылмасына иҹазә верилмәмәси үчүн назир Рамил Усубовун әмри вар. Бу, “Азадлыг”, “Бизим јол” гәзетләринин вә “Туран” аҝентлијинин ишинә ҹидди зијан вуруб.
Сонракы ҝүнләр Дерси Вашингтона бу мөвзуда даһа бир нечә телеграм ҝөндәриб. Сонунҹу мәктуб 11 декабр тарихлидир. Сәнәддә телеканалын фәалијјәтинин бәрпа олундуғу билдирилир.
Һәмин ҝүн МТРШ-нин рәһбәри Нуширәван Мәһәррәмли билдириб ки, АНС-ә јајымы бәрпа етмәјә иҹазә верилиб. О, бунун сәбәбини чохсајлы мүраҹиәтләринин олмасы илә изаһ едиб. Верилишләрин характериндәки дәјишиклијә ҝәлинҹә, сәфирлијин телеграмында гејд олунур ки, АНС чәтин ки әввәлки кими олсун.
Диггәт: Хәбәрдән истифадә етдикдә мәнбәјә истинад лазымдыр
