Әһли Бејт -АБНА- хәбәр аҝентлијинин вердији хәбәрә әсасән: Түркијәнин танынмыш јазарларындан бири Ҹаһит Кылыч бу өлкәнин “һаберх.ҹом” хәбәр порталында Франса президенти Никола Саркозинин Ҹәнуби Гафгаза сәфәри контекстиндә Азәрбајҹан рәһбәрлијини сәрт шәкилдә тәнгид едиб.
Саркозинин Ирәванда ујдурма “ермәни сојгырымы”ны Түркијәнин танымалы олдуғу һагда бәјанат вердијини хатырладараг, әслиндә Анкаранын белә “ағҹаганад вызылтыларына” өјрәнҹәли олдуғуну јазан мүәллиф, бу мәнада диггәти Франса президентинин Бакыдакы ҝөрүшүнә јөнәлдир.
“Мәни марагландыран Ирәвандан сонра Бакыја кечән Саркозијә Илһам Әлијевин нә дедијидир. Игтисади мүгавиләләр-филан имзаланмыш, ону анладыг, "торпагларынын јүздә ијирмиси ермәни ишғалы алтында олан” дөвләтин башчысы нә етди, Саркози илә нә данышды, бах ону анламадыг”, - дејә давам едән Ҹаһит Кылыч даһа сонра Әлијевләрин сијасәтини вә Азәрбајҹандакы дуруму бүтүн чылпаглығы илә ортаја гојур:
Илһам Әлијев өз аләминдәдир
“Әслиндә анлајаҹаг һеч бир шеј јох ортада. Һәзрәт (Илһам Әлијев нәзәрдә тутулур – ред.), ханымыјла, гызыјла, оғлу илә отурдуғу мөвгенин зөвгүнү јашајыр, сәфасыны сүрүр. Ишғал алтындакы торпагларла әлагәдар да ара-сыра бир нечә кәлмә данышыб халгы јухуја верир...
Даһа чох өз дүнјасы илә мәшғулдур о. Мәсәлән, бир мүддәт әввәл икинҹи гызыны евләндирмиш. Тәјјарәләр Авропаја уғултујла ҝетмиш, ҝәлмиш. Јемәк командалары Чех Республикасындан, салонун ишыгландырма вәсаитләриндән тутмуш фишәнҝләрә гәдәр һәр шеј Италијадан ҝәтиртилмиш. Ҝерисини сиз анлајын артыг...
Иши-ҝүҹү бурахыб ҝөстәри үчүн, шәһәрдә ән кичик бир јералты вә ја јерүстү кечидин ачылышыны белә, ҹәнаб президент едир. Һарада бир ачылыша ҝетсә, халгы әсҝәр кими дүздүрүб нитг сөјләјир.
Бир гисим әрәб өлкәләриндә “Баһар ингилаблары” јашанаркән, диҝәрләриндә неҹә деспотик режимләр ајагдадырса вә неҹә парылты ичиндә јашајырса, бурда да бу, ејнилә елә јашајыр.
Падшаһ кими президент
Ҝуја халг тәрәфиндән сечилмиш бир президент. Ҝуја өлкәдә парлемент вар. Ҝуја халга сөјкәнән бир режим, јәни "республика".
Амма нә һикмәтдирсә вә неҹә бир демократијадырса һәр шеј президентин ики додағынын арасындадыр. Ганун да, низам да, һүгуг да, һагг да онун додагларындан төкүлән сөзләрлә мәһдудлашыр...
Падшаһ кими фәрман-нәшр бир президент һансы демократик өлкәдә вар?
Ганунвериҹи мәҹлиси десәниз, кичик ганунларла, дүзәлишләрлә филан мәшғул олур. Мәсләһәт шурасы кими бир шеј јәни...
Јалтаг вә һоггабаз әтраф
Мүхалифәтин сәси чохдан боғулмуш. Халгын сәси онсуз да чыха билмәз. Пычылтыјла дејилән етиразлар белә горху ичиндә дејилир. Чүнки, һеч ким һәјатынын мәһв олмасыны истәмир...
Һәр өлкәдә, һәр авторитар лидерин әтрафында олдуғу кими бунун да әтрафыны јалтаг-јалаглар, һоггабазлар, мәнфәәти үчүн гырх ҹилдә ҝирәнләр сармыш. Дөвләтин ҝәлирләрини елит бир груп сүмүрүб ударкән, халгын бөјүк әксәријјәти јохсуллугла чарпышыр.
Һејдәр Әлијев Фонду дејә гурдуглары бир фондла тәшкил едилән парылтылы јығынҹаглар, зијафәтләр, сәфәрләр, мәнасыз дәвәтләр, микрофонлардан сүзүлән Фирст Ладј чыхышлары, бәлағәтли сөзләр вә ҝурултулу алгышлар… Бунларын һамысы јахшы, ҝөзәл, хош, амма бәс ишғал алтындакы торпаглар нә олаҹаг? Белә бир "вур патласын, чал ојнасын" батаглығына батмыш зөвгү- сәфа ханәданымы о торпаглары ҝери гајтараҹаг? Ҹәнаб президент Илһам Әлијев нә ҝөзләјир, ја да нәји ҝөзләјир?..
Милләтин гырылан шәрәфи
Мөвҹуд ханәданын о торпаглары гуртармаг кими бир дәрди јохдур. Ачыг сорушаг: даһа нә гәдәр ҝөзләниләҹәк? Бир милләт, әлиндән алынан торпағынын, гырылан шәрәфинин аҹысыны даһа нә гәдәр јашајаҹаг? Јүз илми?
Мәсәлә пул-пара мәсәләсими? Бәлкә, пул олмадығындан силаһ алына билмир?! Бу гәдәр нефтин, газын пуллары һара ҝедир ки, Авропадакы, Америкадакы аҹ ермәниләрин гурдуғу лоббинин јарысы гәдәр белә, бир лобби фәалијјәти гурулмур?
Даһа чох суал вар сорушулаҹаг, амма дүшмән гаршысында бу гәдәрини соруша, бу гәдәр тәнгид едә билирәм. Дүшмән белими гырыр, дүшмән дилимин өнүнә сәдд чәкир...
Амма дост, дүшмән һәр кәс билсин ки, о торпаглар бир ҝүн мүтләг ҝери алынаҹаг. Буна һеч кимин шүбһәси олмасын!
Әлијев ханәданы истәдији гәдәр парылтылы һәјаты ичиндә үзсүн вә әсир торпаглары унутсун. Елимин, обамын озанларынын дилиндә һәр ҝүн әсир торпагларымыз вар. Бәли, һеч ким баҹармаса белә, озанларын шеирләри, фәрјадлары, бајатылары бу јараны ҹанлы тутмаға давам едәҹәк вә бир ҝүн мүтләг һүнәр саһиби биринин лидерлијиндә әсир олан о вәтән торпаглары гуртарылаҹаг.
Мән инанырам. Сиз дә инанын!..”.
Гејд: Ҹаһит Кылыч 1954-ҹү илдә Гарсда доғулуб. Узун илләр идарәчилик тәҹрүбәси вар. Һазырда тәгаүддәдир. Сијаси мәгаләләрлә јанашы әдәби арашдырмалар вә шеирләр дә јазыр.
Диггәт: Хәбәрдән истифадә етдикдә мәнбәјә истинад лазымдыр
