Әһли Бејт -АБНА- хәбәр аҝентлијинин вердији хәбәрә әсасән: Октјабрын 11-дә Али Мәһкәмәдә Немәт Пәнаһлынын шикајәтинә бахылыб. Вәкил Самир Исајев дејиб ки, мәһкәмә шикајәти тәмин етмәјиб.
Халг һәрәкатынын лидерләриндән олмуш Немәт Пәнаһлы бу ил јанварын 8-дә досту Ҹејһун Фәрзуллајевлә бирҝә тутулуб. Онлар силаһдан вә ја силаһ гисминдә истифадә едилән әшјалары тәтбиг етмәклә хулиганлыг вә гәсдән сағламлыға аз ағыр зәрәр вурмада иттиһам едилибләр. Иттиһамын әсасында вәтәндаш Елдәниз Рзајевин шикајәти дајаныр. Шикајәтә ҝөрә, Немәт Пәнаһлы вә Ҹејһун Фәрзуллајев јанварын 7-дә Бакынын Мирәли Гашгај күчәсиндә Елдәниз Рзајеви дөјүб, она јумруг вә метал әшја илә зәрбә ендирибләр. Ијунун 17-дә Нәсими Рајон Мәһкәмәси Немәт Пәнаһлыны 6, Ҹејһун Фәрзуллајеви 4 ил мүддәтинә азадлыгдан мәһрум едиб.
Самир Исајевин сөзләринә ҝөрә, Бакы Апеллјасија Мәһкәмәсинин илкин бахыш гәрарындан вердикләри шикајәтә октјабрын 11-дә Али Мәһкәмәнин Ҹинајәт Коллеҝијасында һаким Ҝүлзар Рзајеванын сәдрлији илә бахылыб: “Биз Нәсими Рајон Мәһкәмәсинин һөкмүндән Бакы Апеллјасија Мәһкәмәсинә шикајәт етмишдик. Апеллјасија инстансијасында мәһкәмә истинтагынын тәзәләнмәси вә бәзи истинтаг һәрәкәтләринин апарылмасы, јени експертизанын кечирилмәси вә шаһидләрдән биринин ифадәсинин һадисә јериндә јохланылмасы һагда вәсатәтләр вердик. Һәмчинин һәбс гәтимкан тәдбиринин дәјишдирилмәсини истәдик. Һаким вәсатәтләри тәмин етмәди вә апеллјасија шикајәтинә мәһкәмә истинтагы апарылмадан бахылмасы гәрарына ҝәлди. Биз дә илкин бахышын гәрарындан Али Мәһкәмәјә кассасија шикајәти вермишдик.
Октјабрын 11-дә кечирилән просесдә Али Мәһкәмәдә мән вә Ҹејһун Фәрзуллајевин вәкили Елчин Әлијев кассасија шикајәтини мүдафиә етдик. Бакы Апеллјасија Мәһкәмәсинин бахыш гәрарынын дәјишдирилмәсини, шикајәтә мәһкәмә истинтагынын тәзәләнмәси илә бахылмасыны истәдик. Һаким бизи динләди, амма шикајәти тәмин етмәди. Али Мәһкәмәнин гәрары әдаләтсиз вә әсассыздыр”.
Вәкилин сөзләринә ҝөрә, јахын ҝүнләрдә Бакы Апеллјасија Мәһкәмәсиндә Нәсими Рајон Мәһкәмәсинин гәрарындан верилмиш шикајәтә бахылмасы давам етдириләҹәк: “Мәһкәмә јалныз сүбутлара гијмәт верәҹәк. Амма Али Мәһкәмәдә һаким билдирди ки, просесин ҝедишиндә еһтијаҹ јаранарса, һансыса сүбутлара мәһкәмә истинтагынын тәзәләнмәси илә бахылмасы һагда вәсатәт верә биләрсиз. Биз бу һүгугдан истифадә едәҹәјик”.
Диггәт: Хәбәрдән истифадә етдикдә мәнбәјә истинад лазымдыр
