Әһли Бејт -АБНА- хәбәр аҝентлијинин вердији хәбәрә әсасән: Түркијә јенидән Азәрбајҹана дәстәк верә биләҹәјини дејиб. Азәрбајҹан әразиләринин ишғалдан азад олунмасында Түркијәнин фәал јардым етмәси үчүн исә илк нөвбәдә рәсми Бакынын истәји лазымдыр. Буну да Түркијәнин баш дипломаты Әһмәд Давудоғлу дејиб.
Түркијәнин јенидән бу тәшәббүслә чыхыш етмәси һансы мәгсәдләрдән хәбәр верир?
Хатырладаг ки, рәсми Анкара заман-заман белә тәшәббүсләрлә чыхыш едиб вә Азәрбајҹана јахындан көмәк етмәк имканында, истәјиндә олдуғуну билдириб. Фәгәт бир чох һалларда бејнәлхалг даирәләрин мәлум, бәзи мәгамларда исә рәсми Бакынын намәлум аддымлары бу истәјин реаллашмасына мане олуб. Түркијәнин јенидән бу нијјәти сәсләндирмәсинин архасында дајанан бир чох амилләр ола биләр. Ылк нөвбәдә исә Анкара илә Бакынын мүнасибәтләринин корланмасынын Түркијә вә Азәрбајҹан халгынын мүнасибәтләринә, проблемләринә дәхли олмадығыны ҝөстәрмәк жести ола биләр. Амма даһа тутарлы сәбәбләр дә олмамыш дејил.
АБШ јенидән ҹәһд едир?
Ҝөрүнүр, Путинин јенидән президентлијә намизәд олаҹағы барәдә хәбәрләр реҝионда мараглы гүввәләрин кефини позуб. Хүсусилә Вашингтонда белә һесаб едирләр ки, Путин Гафгазда тәзәдән вә даһа көклү шәкилдә бәркимәк истәјәҹәк. Әнәнәви рус сијасәтинә ујғун олараг, о, өзүнә гаршы даһа чох сәһв етмиш вә сијаси бахымдан сәриштәли олмајан лидерләрлә ишләјәҹәк. Бу бахымдан Путинин јенидән Русија президенти олмасы Ылһам Әлијевин даһа чох сыхышдырылаҹағы, амма һакимијјәтдә бәркидиләҹәји демәкдир. Онун бәркимәси үчүн исә Русија Ҹәнуби Гафгазда ганлы сијаси гәтлләрә белә, әл ата биләр. Бу ссенари Ермәнистана да аиддир. Бу исә бөлҝәдәки Гәрб лајиһәләринин бирдәфәлик тарихин архивинә ҝетмәси демәкдир. Бу бахымдан аз вахт әрзиндә АБШ Ҹәнуби Гафгазда мөвгеләрини ҝенишләндирмәк барәдә дүшүнүр. Буна ҝөрә дә Түркијә Азәрбајҹан сијасәтинә дәстәк вермәк нијјәтиндәдир. Түркијәнин Ҹәнуби Гафгазда ҝүҹләнмәси Русијанын механики зәифләмәси демәкдир. Русијада КГБ полковникинин јенидән һакимијјәтә ҝәлмәси милитар нәзарәтдә олан Ермәнистанын Москваја бир көјнәк даһа јахын сыхылмасы демәк олаҹаг. Бу бахымдан бүтүн просесләрин мәркәзи кими Азәрбајҹан дүшүнүлүр. Буна ҝөрә дә Әһмәд Давудоғлу “Ермәнистан вә Азәрбајҹан арасындакы мүнагишәнин һәлли”ндән дејил, “Азәрбајҹан торпагларынын ишғалдан азад олунмасындан данышыр”. Бу исә о демәкдир ки, јенә дә бөјүк ојунун кичик галиби олмаг имканымыз вар. Биз Русијанын ҝүҹләнмәсини истәмәјән Гәрбин дәстәји илә Москванын нәзарәтиндә ишғал олунмуш торпагларымызы ҝери гајтармаг үчүн дәстәк газана биләрик. Бу дәстәјин сәмими олаҹағына гарант исә Түркијәнин просесдә әсас рол ојнајаҹағыдыр.
Сәркисјан дишини ҝөстәрди...
Мараглыдыр ки, Путинин јенидән президентлијә намизәд олаҹағы хәбәриндән дәрһал сонра Сәркисјан Түркијәни вә Азәрбајҹаны тәнгид атәшинә тутуб. Ајдын олур ки, кечмиш һәрби ҹинајәткар өзү үчүн даһа раһат реҝионал мүстәвинин формалашаҹағыны дүшүнүр. Сөһбәт ондан ҝедир ки, Гәрблә мүнасибәтләри гајдасында олан Медведевин рәһбәрлији дөврүндә Сәркисјан өзүнү “дил билән” кими апармаға мәҹбурдур.
Диггәт: Хәбәрдән истифадә етдикдә мәнбәјә истинад лазымдыр
