Әһли Бејт -АБНА- хәбәр аҝентлијинин вердији хәбәрә әсасән:
Ислам Партијасынын үзвү Мурад Оруҹов бу ил јанварын 2-дә кечирилән иҹласда Мөвсүм Сәмәдовун чыхышыны тәсдигләјиб. О билдириб ки, партија сәдри тәһсил назири тәрәфиндән һиҹаб гадағасыны гојулмасына гаршы чыхыш едиб вә мәмурларын вәзифә сәлаһијјәтлини ашмаларындан данышыб.
М.Оруҹов јанварын 2-дә кечирилән иҹласда Вагиф Абдуллајевин чыхыш етмәдијини билдириб: “Мән баша дүшә билмирәм ки, бу инсанлары нијә тутублар. Биз бу инсанлара бахыб әхлаг дәрсләри өјрәнирик. Мөвсүм Сәмәдовун јәһудиләрә гаршы, һакимијјәти зорла әлә кечирмәклә бағлы чыхышлары олмајыб. Һәбс олунанлардан һеч бири һеч вахт Конститусија әлејһинә, дөвләт чеврилиши етмәклә бағлы һеч бир чыхыш етмәјиб”.
Ибтидаи истинтаг вахты верилән ифадәләрлә, мәһкәмәдә верилән ифадәләрин зиддијјәт тәшкил етмәси барәдә суала ҹаваб верән шаһид билдириб: “Мән белә сөзләр демәмишәм. Бу мәним вердијим ифадә дејил. Орада бир чох шејләр артырылыб”.
Даһа сонра мәһкәмәдә шаһид гисминдә Үзејир Һејдәров ифадә вериб: “Бу ҝүн Авропа баш сындырыр ки, сојунмуш гызларыны неҹә ҝејиндирсин. Биздә исә ҝејинәнләримизи сојундурмаг истәјирләр".
Ү.Һејдәров вурғулајыб ки, Мөвсүм Сәмәдов јанварын 2-дә бир аз емосијалы чыхыш едиб: “Онун бу чыхышы Мисир Мәрдановун вердији гәрарын нәтиҹәсидир. Мөвсүм Сәмәдов һәмишә чыхышларында һакимијјәтлә диалога чағырарды”.
Партијанын фәалијјәти барәдә дөвләт иттиһамчысынын суалыны ҹавабландыран Ү.Һејдәров билдириб ки, доғурдан да партијанын гејдијјаты олмајыб, амма партијанын фәалијјәтинә гадаға да олмајыб. Иттиһам олунанларын һеч бириндән чеврилиш вә дөвләт гурулушуну дәјишмәклә бағлы һеч вахт, һеч бир чағырыш ешитмәмишәм.
Һаким Үзејир Һејдәровун да ибтидаи истинтаг вахты вердији ифадәләрин мәһкәмә истинтагына вердији ифадәләрлә дүз ҝәлмәдијини билдириб. Буна әјани сүбут кими һаким Һејдәровун ибтидаи истинтага вердији ифадәни сәсләндириб.
Ү.Һејдәров ҹавабында дејиб: “Бу мәним илкин истинтаг вахты дедијим фикирләр дејил. Мән бу сөзләрдән истифадә етмәмишәм”.
Просесдә һаким Елдар Исмајылов вә вәкил Мәзаһир Шаһмаров арасында инсидент баш верди. Вәкилин дедикләрини рәдд едән һаким она јериндән данышмамаға чағырды. Вәкил исә өз нөвбәсиндә һакими објектив олмаға вә ҝүнаһсыз адамлары иттиһам етмәмәјә чағырыб.
Хатырладаг ки, Мөвсүм Сәмәдов бу ил јанварын 7–дә сахланылараг барәсиндә 13 суткалыг инзибати һәбс сечилиб. Нәсими рајон мәһкәмәси тәрәфиндән јанварын 20-дә М.Сәмәдов барәсиндә 3 ајлыг һәбс гәтимкан тәдбири сечылыб вә Азәрбајҹан Республикасы Баш Прокуролуғунун ағыр ҹинајәтләрә даир ишләр идарәсиндә истинтага башланылыб. АИП сәдри һакимијјәти зорла әлә кечирмә ҹәһдиндә вә ја ону зорла сахлама, ганунсуз олараг одлу силаһдан вә ја силаһ гисминдә истифадә олунан васитәләрдән истифадә етмәклә ҹинајәтә һазырлыгда иттиһам олунур.
Диггәт: Хәбәрдән истифадә етдикдә мәнбәјә истинад лазымдыр
