Әһли Бејт -АБНА- хәбәр аҝентлијинин вердији хәбәрә әсасән: Бејнәлхалг Гызыл Хач Комитәсинин Азәрбајҹан нүмајәндәлијинин әмәкдашлары Бакы Истинтаг Тәҹридханасында аҹлыг аксијасы кечирән халг һәрәкаты фәалы Немәт Пәнаһлыја баш чәкибләр. Вәкил Самир Исајев ачыгламасында дејиб ки, БГХК-нын нүмајәндәләри аҹлыг аксијасынын сәбәбләрини сорушублар.
Самир Исајев билдириб ки, ијулун 13-дә өзү дә Немәт Пәнаһлы илә ҝөрүшүб: “Аҹлыг аксијасыны давам етдирир. Онун мәдәси хәстәдир, деди ки, мәдәсиндә ағрылар башлајыб. Амма әһвалы јахшыдыр. Мәнә деди ки, енержисинә гәнаәт едир вә белә ҝетсә, аҹлыг аксијасыны 40 ҝүн давам етдирә биләр. Аксија мүәјјән нәтиҹә вериб, аҹлыға башлајандан сонра ајры-сечкилик гисмән арадан галдырылыб, психи вә физики тәзјигләр дајаныб. Мән дә мәсләһәт ҝөрдүм ки, аҹлығы дајандырсын. Чүнки аксија мәгсәдинә чатыб, иҹтимаијјәт вә бејнәлхалг тәшкилатлар вәзијјәтдән хәбәр тутуб, тәзјигләр гисмән дајаныб”.
Вәкилин сөзләринә ҝөрә, Немәт Пәнаһлы ијулун 2-дән аҹлыг едир, лакин һәлә дә диҝәр мәһбуслардан тәҹрид олунмајыб, тәҹридхананын тибб мәнтәгәсинә көчүрүлмәјиб: “Јенә дә әввәлки камерасында сахланыр. Бакы Истинтаг Тәҹридханасынын рәиси Елхан Садыговла ҝөрүшдүм. Рәис деди ки, кәнардан мүлки һәкимләр дәвәт едибләр вә онлар Немәт Пәнаһлыны компелкс мүајинә едәҹәкләр. Елхан Садыгов билдирди ки, мүајинәнин нәтиҹәләринә ујғун олараг Немәт Пәнаһлы ја тибб мәнтәгәсинә көчүрүләҹәк, ја мәҹбури гидаландырылаҹаг, ја да Пенитенсиар Хидмәтин мәркәзи мүалиҹә мүәссисәсинә ҝөндәриләҹәк”.
Бу илин јанварында дөјмә вә хулиганлыг иттиһамлары илә тутулан Немәт Пәнаһлы ијунун 17-дә Нәсими Рајон Мәһкәмәсинин гәрары илә 6 ил мүддәтиндә азадлыгдан мәһрум едилиб.
Немәт Пәнаһлы Бакы Истинтаг Тәҹридханасында үзләшдији ајры сечкилијә, пис рәфтара, психи вә физики тәзјигләрә етираз олараг аҹлыг аксијасы кечирир.
Диггәт: Хәбәрдән истифадә етдикдә мәнбәјә истинад лазымдыр
