Әһли Бејт -АБНА- хәбәр аҝентлијинин вердији хәбәрә әсасән: Кечмиш депутатлыға намизәд, һазырда һәбсдә олан ҝәнҹ фәал Бәхтијар Һаҹыјевин аилә үзвләри, еләҹә дә “Бәхтијара дәстәк!” кампанијасынын тәшкилатчылары дүнән мәтбаут конфрансы кечирдиләр.
“Бәхтијар Һаҹыјевә дәстәк!” кампанијасынын тәшкилатчыларындан Раил Аббасов билдирди ки, онлары медиа гаршысына чыхмаға вадар едән сәбәб мүдафиә етдикләри шәхсә гаршы дөвләт сәвијјәсиндә башланан чиркин кампанијадыр.
Һакимијјәтјөнлү гәзетләрдә вә “Лидер” телеканалында Бәхтијар Һаҹыјев барәсиндә тәһгирамиз материалларын јајылмасыјла иҹтимаи рәји чашдырмаға ҹәһд ҝөстәрилдијини дејән Аббасовун сөзләринә ҝөрә, бирҹә факт “Лидер”ин чохүзлүлүјүнү сүбут едир: “2008-ҹи илдә АБШ-да Һиллари Клинтонун сечки кампанијасынын јеҝанә азәрбајҹанлы иштиракчысы олан Бәхтијардан о заман ”Лидер" мүсаһибә алмышды. Бу мүсаһибәдә Бәхтијар “өлкәмизә гүрур јашадан адам” кими характеризә едилиб. Инди исә елә һәмин телеканал Бәхтијары гејри-етик фикирләр, мәнәвијјатдан узаг деди-годуларла тәһгир едир. Бу һал нәинки ганунсузлугдир, үмумијјәтлә, журналистә вә инсана јарашмајан һәрәкәтдир".
Раил Аббасов гејд етди ки, јалтаг олмајан, сағлам дүшүнҹәли инсанлар Бәхтијары мүдафиә едир, она гаршы шәр кампанијасыны писләјирләр. “Бәхтијара дәстәк!” кампанијасы артыг өлкә боју “Бәхтијар Һаҹыјев кимдир?” мөвзусунда мәктублар јајыр.
“Бизим мәгсәдимиз телевизијанын јаланларына ҹаваб вермәкдир, ҹәмијјәтә Бәхтијарын кимлијини танытмагдыр”, - дејә Раил Аббасов билдириб.
Бәхтијарын анасы Солидә Мөвлајева дә ҝәнҹ фәала гаршы чиркин кампанијаны писләјиб: “Инди она ”бакенбард"ларынын узун олмасыны ирад тутурлар. Һеч дәхли вар? Јәгин ки, сабаһ да гашларынын галынлығыны тәнгид едәҹәкләр. Оғлуму тутублар, инди нә истәјирләр?"
1994-ҹү илдә ЈАП-на үзв олдуғуну дејән Солидә ханым һакимијјәтин Бәхтијара, еләҹә дә диҝәр ҝәнҹләрә гаршы ганунсуз вә әдаләтсиз әмәлләриндән сонра бу партијадан истифа вердијини ачыглајыб. Һәмчинин мәтбуат конфрансындан сонра ЈАП үзвлүјүнә даир вәсигәсини апарыб Һејдәр Әлијевин мәзарынын үстүнә гојаҹағыны билдириб.
Солидә Мөвлајева да вурғулајыб ки, Бәхтијарын һеч бир ҝүнаһы јохдур, садәҹә, о, бу һакимијјәтин сијасәтини тәнгид етдијинә ҝөрә бу ҝүн дәмир бармаглыглар архасындадыр.
Бәхтијарын гардашы Вүгар Һаҹыјев исә криминал даирәләрдән онларын аиләсинә дахил олан шүбһәли зәнҝләр барәдә данышыб. Билдириб ки, бу зәнҝләрлә онлары тәхрибата чәкмәјә ҹәһд ҝөстәрилир: “Бизә дејирләр ки, Бәхтијарын јанына кечмәјә имканымыз вар, нә истәјирсинизсә, она о шәраити орада јарадаг. Киминсә Бәхтијара сәмими көмәк етмәк фикри варса, чох сағ олсун. Анҹаг биз бүтүн бу јардымларын ганун чәрчивәсиндә олмасында мараглыјыг”.
Вүгар Һаҹыјев һәмчинин тәкҹә гардашыны дејил, бүтөвлүкдә сијаси бахышларына ҝөрә һәбсдә олан һәр бир сијаси мәһбусу мүдафиә етдикләрини вурғулајыб.
***
Мәтбуат конфрансындан сонра Солидә Мөвлајева ЈАП-нын үзвлүк вәсигәсини Һејдәр Әлијевин гәбринин үстүнә гојуб. Һәмин вахт һадисә јеринә ҝәлән Хүсуси Дөвләт Мүһафизә Хидмәтинин әмәкдашлары Бәхтијар Һаҹыјевин анасыны вә орада чәкилиш апаран Репортјорларын Азадлығы вә Тәһлүкәсизлији Институтунун (РАТИ) мүхбирини сахлајыб. Билдирибләр ки, Солидә Мөвлајева вә РАТЫ-нин әмәкдашыны бу мәсәләни ајдынлашдырмаг үчүн апарырлар.
Јарым саат диндирилдикдән сонра Хүсуси Дөвләт Мүһафизә Хидмәтинин әмәкдашы Бәхтијар Һаҹыјевин анасы Солидә Мөвлајеваја билдириб ки, онун партија вәсигәси ЈАП-ын иҹра катиби Әли Әһмәдова чатдырылаҹаг. Бундан сонра Солидә Мөвлајева сәрбәст бурахылыб.
РАТИ-нин Фәхри Хијабанда камера илә чәкдији видеоҝөрүнтүләр исә силиниб.
Натиг
Диггәт: Хәбәрдән истифадә етдикдә мәнбәјә истинад лазымдыр
