Әһли Бејт -АБНА- хәбәр аҝентлијинин вердији хәбәрә әсасән: Ҹүмһуријјәт Халг Партијасынын (ҸҺП) лидери Камал Кылыҹдароғлу Италијанын "Ла Стампа" гәзетинә мүсаһибәсиндә билдириб ки, Түркијәдә исламлашдырма риски јохдур.
Кылыҹдароғлу дејиб ки, ону өлкәдә сөз азадлығы илә бағлы вәзијјәт даһа чох нараһат едир.
"Түркијәнин АИ-јә гошулмаға сәј ҝөстәрмәси фонунда 57 журналстин азадлыгдан мәһрум олунмасы бизи нараһат едир", - о гејд едиб.
Кылыҹдароғлу гејд едиб ки, Түркијәнин демократикләшмәси үчүн Авропа моделинин тәтбиги лазымдыр. Өлкәнин Баш назири Рәҹәб Тајјиб Әрдоғаны тәнгид едәрәк о әлавә едиб ки, Түркијәдә јалныз ҸҺП һакимијјәтә ҝәлдикдән сонра Анкара идарәетмәнин Авропа моделини ҝөрәҹәк.
Кылыҹдароғлу гејд едиб ки, Баш назир Әрдоған өлкәни тәкбашына идарә едир вә һәр шеји өзү һәлл едир. "Вә бу тамамилә демократик дејил", - о әлавә едиб.
Партија лидеринин сөзләринә ҝөрә, ҸҺП-нин мәгсәди Анкаранын Гәрблә јахынлашмасыдыр. О, Әрдоғаны Түркијәни әрәб өлкәси етмәјә чалышмагда да ҝүнаһландырыб.
Түркијәдә парламент сечкиләри ијунун 12-нә тәјин олунуб. Әрдоғанын партијасы 2002-ҹи илин нојабрындан өлкәдә һакимијјәтдәдир. 2007-ҹи ијунунда кечирилән сонунҹу парламент сечкиләриндә о, сечиҹиләрин тәхминән 47 фаизинин сәсини топлајыб вә тәкпартијалы һөкумәти формалашдырыб.
Диггәт: Хәбәрдән истифадә етдикдә мәнбәјә истинад лазымдыр
