Әһли Бејт -АБНА- хәбәр аҝентлијинин вердији хәбәрә әсасән: Сәбаил Рајон Мәһкәмәси Иҹтимаи Палатанын апрелин 2-дә Бакыда кечирдији етираз аксијасында иштирак етмиш Елнур Исрәфилов барәсиндә 2 ајлиг һәбс гәтимкан тәдбири сечиб. Гәрар апрелин 27-си ахшам саатларында верилиб. Елнур Исрәфилов Ҹинајәт Мәҹәлләсинин 233-ҹү маддәси илә (иҹтимаи гајданын позулмасына сәбәб олан һәрәкәтләри тәшкил етмә вә ја бу ҹүр һәрәкәтләрдә фәал иштирак етмә) иттиһам олунур.
Вәкил Јалчын Иманов дејиб ки, Елнур Исрәфилов ҝөздән әлилдир вә һимајәсиндә јеткинлик јашына чатмамыш ики өвлады вар: “Мәһкәмә бу амилләри нәзәрә алыб онун барәсиндә һәбс гәтимкан тәдбири сечмәмәли иди. Гәрардан апеллјасија шикајәти вериләҹәк”.
Апрелин 25-дән Сәбаил Рајон Полис Идарәсиндә сахланан Јевлах рајон сакини Елнур Исрәфилова вәкили илә јалныз дүнән ахшам саатларында ҝөрүш верилиб. Јалчын Имановун сөзләринә ҝөрә, онун иштиракы олмадан кечирилән диндирмәләрдә Елнур Исрәфиловдан АХҸП фәалы, Иҹтимаи Палатанын үзвү олан дајысы Мәммәд Ибраһимин әлејһинә ифадәләр алыныб: “Елнур Исрәфилова тәзјигләр ҝөстәрәрәк апрелин 2-дә кечирилән митингә дајысы Мәммәд Ибраһимин тәкиди илә гатылдығыны, бундан пешман олдуғуну вә митинги тәшкил едәнләрә ләнәтләр јағдырдығы барәдә илкин ифадә алыблар. Лакин мәним иштиракымла кечирилән диндирмәдә Елнур дедикләрини тәкзиб етди вә илкин ифадәнин ондан зорла алындығыны билдирди”.
Вәкилин сөзләринә ҝөрә, иттиһам тәрәфи Елнур Исрәфиловун аксија заманы полис автобусуна тәпик атдығыны, зор ишләтдијини иддиа едир.
Диггәт: Хәбәрдән истифадә етдикдә мәнбәјә истинад лазымдыр
