Әһли Бејт -АБНА- хәбәр аҝентлијинин вердији хәбәрә әсасән: Назирлијин мәтбуат хидмәтинин шөбә рәиси Орхан Мансурзадә АПА-ја ачыгламасында билдириб ки, ики ил әввәл Азәрбајҹан Дөвләт Нефт Академијасында баш вермиш фаҹиәли һадисәнин илдөнүмү илә әлагәдар шүбһәсиз ки, һәмин тәһсил оҹағында тәләбә вә мүәллим һејәтинин иштиракы илә аным мәрасими кечириләҹәк: “Фаҹиә гурбанларынын хатирәсини анмаг истәјән һәр бир вәтәндаш, һәмин төрәнә гатыла, дүнјасыны дәјишмиш шәхсләрә бу јолла еһтирамыны билдирә биләр. Лакин иҹтимаи асајиши, сабитлији позмаг истәјән мүәјјән гүввәләр бу фаҹиәдән сијаси мәгсәдләри үчүн истифадә едәрәк Академијанын гаршысында вә јахуд она јахын әразидә шәһәр иҹра һакимијјәти илә разылашдырылмамыш һәр һансы аксија кечирмәјә ҹәһд ҝөстәрәрсә, бунун гаршысы полис әмәкдашлары тәрәфиндән алынаҹаг”.
Гејд едәк ки, бир груп ҝәнҹ сосиал шәбәкәләрдә, апрелин 30-да Азәрбајҹан Дөвләт Нефт Академијасында (АДНА) баш вермиш ганлы һадисәнин гурбанларыны јад етмәк мәгсәди илә чағырыш едиб. Онлар чағырышларында апрелин 30-у саат 14:00-да Ҹәфәр Ҹаббарлынын һејкәлинин әтрафында топлашаҹагларыны гејд едибләр вә өлкә ҝәнҹләрини бу аксијада иштирак етмәјә чағырыблар.
Хатырладаг ки, 2009-ҹу ил апрелин 30-да АДНА-нын Бакы шәһәри Диларә Әлијева күчәси, 227 сајлы үнванда јерләшән икинҹи корпусуна дахил олан намәлум шәхсин инзибати бинанын биринҹи мәртәбәсиндән алтынҹы мәртәбәсинәдәк гаршысына чыхан шәхсләрә “Макаров” типли тапанчадан атәш ачмасы нәтиҹәсиндә 12 нәфәр өлүб, 13 нәфәр мүхтәлиф дәрәҹәли бәдән хәсарәтләри алыб. Һадисәни төрәдән шәхс сонра өзүнү вуруб. Онун Ҝүрҹүстан вәтәндашы, 1980-ҹи ил тәвәллүдлү Гәдиров Фәрда Әсәд оғлу олдуғу мүәјјән едилиб.
Диггәт: Хәбәрдән истифадә етдикдә мәнбәјә истинад лазымдыр
