Әһли Бејт АБНА хәбәр аҝентлијинин вердији хәбәрә әсасән: Илһам Әлијев Астарада рајон иҹтимаијјәти илә ҝөрүшдә дејиб: “Биз 1990-ҹы илләрин әввәлләрини јахшы хатырлајырыг. О вахт Азәрбајҹанын талеји һәлл олунурду. Биз мүстәгиллијимизи 1991-ҹи илдә бәрпа етдик. Анҹаг 1993-ҹү илдә өлкәмиздә ҝедән хошаҝәлмәз просесләр вә јашанан ҝәрҝинлик, бөһран фактики олараг мүстәгиллијимизи дә суал алтына гојуб. О вахт Азәрбајҹана рәһбәрлик етмиш шәхсләр вәзифә борҹуну лајигинҹә јеринә јетирә билмәјибләр вә чәтин вәзијјәтлә үзләшәрәк вәзифәләрини дондурдулар, өлкәдән дә гачдылар”.
Онун сөзләринә ҝөрә, халг өлкәмизин јени мүстәгиллик газандығы илләри јахшы хатырлајыр: “Һазырда о адамларын јенә дә һансыса иши ҝөрмәк ҹәһдләри бөјүк диггәтә лајиг дејил. Бунлара һеч әһәмијјәт дә вермәјин. Бунлар садәҹә ҝөрүнтү наминә атылан аддымлардыр вә Азәрбајҹанда нә сабитлији сарсыда, нә дә уғурлу инкишафа хәләл ҝәтирә биләр. Чүнки 90-ҹы илләрин әввәлләриндә Азәрбајҹанда вәтәндаш мүһарибәсини башламыш, ондан сонра горхагҹасына өлкәдән гачмыш инсанлара өлкәмизин сијаси сәһнәсиндә јер јохдур. О адамлар артыг тарихин архивиндәдир”.
Президент бәјан едиб ки, вахташыры һәр һансы бир өлкәдә баш верән һадисә бунлары да нисбәтән ҹанландырыр, руһландырыр: “Буну 2005-ҹи илдә ҝөрмүшүк. О вахт МДБ мәканында баш вермиш һадисәләр бунлары да бир нөв һәрәкәтә ҝәтирмишди. О вахт да онлар киминсә тәҹрүбәсини јамсыламагла мәшғул иди. Нарынҹы лентләри, бантлары јахшы хатырлајырыг. О вахт да һәмин ҹәһдләр ифласа уғрады. Чүнки халг онларын һәрәкәтләрини дәстәкләмәди. Бу дәфә дә үмумијјәтлә бу мәсәлә илә бағлы һеч данышмаға еһтијаҹ јохдур. Чүнки дөвләт о гәдәр ҝүҹлүдүр, Азәрбајҹанда иҹтимаи-сијаси сабитлик о гәдәр мөһкәмдир ки, ишимизә мане олмаг, Азәрбајҹанын уғурлу инкишафына зәрбә вурмаг истәјән, бәзи һалларда хариҹи даирәләрдән ҝөстәришләр алан үнсүрләрә халг чохдан јох дејиб”.
“Бу ҝүн Азәрбајҹан сөзүн әсл мәнасында нәинки өз мүгәддәратыны, өз талејини өзү мүәјјән едир, бөлҝәдә ҝедән просесләрә дә тәсир имканларымыз артыр” - дејән дөвләт башчысынын фикринҹә, бу ҝүн Азәрбајҹанын марагларыны нәзәрә алмадан бөлҝәдә һеч бир мәсәлә өз һәллини тапа билмәз: “Бу ҝүн Азәрбајҹан реҝионал амилә чеврилиб вә артан ҝүҹүмүз вәтәндашлары, достларымызы севиндирир, амма бизә пис мүнасибәт бәсләјән гүввәләри гыҹыгландырыр. Әфсуслар олсун ки, өлкәдә һәлә дә елә гүввәләр вар. Онлара һеч гүввә дә дејә билмәрәм”.
Диггәт: Хәбәрдән истифадә етдикдә мәнбәјә истинад лазымдыр
