Әһли Бејт -АБНА- хәбәр аҝентлијинин вердији хәбәрә әсасән: Мәсәләнин мараглы тәрәфи ондан ибарәтдир ки, авропалы гонаглар дүнән Иҹтимаи Палатадан садәҹә 3 нәфәрлә топланты кечирибләр вә бу топланты сон ана гәдәр ҝизли апарылыб вә медиаја һеч бир ачыглама верилмәјиб. Амма партијаларын клуарларында мүәјјән сөһбәтләр апарылыр .
Дүнәнки топлантыдан сонра партија лидерләри өз әтрафлары илә ахшам топлантысы кечирибләр. Авропалы дипломатларла мүзакирә олунан мәсәләләр барәдә сөһбәт едән партија рәһбәрлији јерләрдә ишләрин ҝүҹләндирилмәси барәдә сәлаһијјәтли шәхсләрә ҝөстәриш верибләр.
Елә бу мәгсәдлә дә бу ҝүн сәһәр реҝионлара емиссарлар ҝөндәрилиб. Иҹтимаи Палатада тәмсил олунан партијаларын рајон тәшкилатларынын ишләрини бирләшдирәрәк 16 апрел митингинә дәстәк мәгсәдијлә бөлҝәләрдә дә аксијаларын кечирилмәси барәдә ҝөстәриш верилиб.
Иҹтимаи Палата дахилиндә реҝионларда ишләрин ҝүҹләндирилмәси гәрара алыныб. Вә даһа чох иш апарылмасы нәзәрдә тутулан реҝион кими Ҝәнҹәбасар нәзәрдә тутулуб. Даһа сонра исә бу мәлумат өз тәсдигини тапды вә ИП-нин әсасән Ҝәнҹәбасар бөлҝәсиндә олан бир нечә рајонда шөбәләринин јарадылдығы илә бағлы ачыглама верилди. Хәбәрдә һәмчинин гејд олунурду ки, бу шөбәләр Бакыда кечириләҹәк 16 март митингинә дәстәк мәгсәдијлә Ҝәнҹәдә дә аксија кечирәҹәкләр. Вә бу хәбәрдә өз тәсдигини тапды. Һәмин шөбәләрин бирҝә шәкилдә Ҝәнҹәнин Сабир бағында аксија кечирәҹәкләри билдирилир.
Иҹтимаи Палатанын бу ҝүн кечирилән топлантысында дүнәнки ҝөрүш барәдә үмуми мәлумат верилсә дә, етибарлы мәнбәдән алдығымыз мәлумата ҝөрә, Авропаны тәмсил едән дипломатик корпусун нүмајәндәликләри дә ИП сәлаһијјәтлиләринә реҝионларда ишләри ҝүҹләндирмәсәләр, пајтахт Бакыда һеч нәјә наил ола билмәјәҹәкләри месажыны чатдырыблар. Вә артыг бунун үчүн мүхалифәт дүшәрҝәси тап һазырлыг вәзијјәтинә ҝәтирилиб, әввәл апрел ајынын 16-на тәјин олунан аксијанын вахты дәјишдирилиб. Митинг апрел 17-дә кечириләҹәк.
Топлантыда апарылан мүзакирәләрдән исә артыг һакимијјәт даирәләринин дә хәбәри олдуғу вә нараһатчылыг кечирдији билдирилир. Дүнән ахшам саатларында тәҹили шәкилдә топланан игтидар мәнсублары сәлаһијјәтли шәхсләрә ҝөрүшүн там деталлары барәдә мәлумат топламаг ҝөстәриши верибләр. Бундан әлавә иҹтимаијјәтин рәғбәтини газанмаг вә кәскин ислаһатлара башландығы ҝөрүнтүсүнү јаратмаг үчүн јахын ҝүнләрдә 2 назири вәзифәдән чыхармаг вә онларын табелијиндә олан идарәләрдә јохламалара башланылараг бәзи рәһбәр шәхсләрин һәбс едилмәси гәрара алыныб. Башга бир назири исә Фәрһад Әлијев вә Әли Инсановун талеји ҝөзләјир.
Диггәт: Хәбәрдән истифадә етдикдә мәнбәјә истинад лазымдыр.
