Әһли Бејт -АБНА- хәбәр аҝентлијинин вердији хәбәрә әсасән: Бир нечә јүз адам Бузовна-Маштаға јолуну бағламагла һөкумәтин диггәтини ҹәлб етмәјә чалышыб. Етираз аксијасыны дағытмаг үчүн әразијә әлавә полис дәстәләри ҹәлб едилиб. Полис кәнд сакинләринә һүҹум едиб, тоггушма баш вериб. 6 нәфәрин ағыр јараландығы барәдә хәбәр вар.
Кәнд сакинләри билдирирләр ки, бурада ев тикмәк үчүн һәјәтјаны саһә алынмасына күлли мигдарда пуллар верилиб: “Биз буралары өз башына зәбт етмәмишик. Һәјәтјаны саһә үчүн 10 мин, 12 мин манат пул верилиб. Инди ҝәлирләр ки, һансыса мәмур ганунсуз иш ҝөрүб, бурада ев тикилә билмәз вә евләриниз сөкүлмәлидир. Бузовна тәрәфдә, “Тағыјевнефт”ә мәхсус әразини дә беләҹә бошалтмышдылар. О әразиләрдәки евләри учирандан сонра бошалмыш саһәләри мафиозлара, олигархлара сатдылар. Инди һеч ким шүбһә етмир ки, сон гәпик-гурушуну бурада ев тикмәк үчүн хәрҹләјән касыб-кусубу бурадан говуб бу торпаглары да пуллу мәмурлара сатаҹаглар. Биз нејләјәк, бу харабада бизим јашамаг һаггымыз јохдур?!”.
“Бу әразидә тикилән евләр кимләрә мәхсусдур”, суалына ҹаваб олараг кәнд сакини билдирди ки, “гачгынлар да вар, јерли сакинләр дә. Һеч нә, касыб-кусуб. Она ҝөрә бизи ганымыза гәлтан еләјирләр дә”.
Иш ҝүнү олмадығындан дөвләт идарәләриндән кимсәни тапыб Бу һадисә илә бағлы башга хәбәр өјрәнмәк мүмкүн олмады.
Диггәт: Хәбәрдән истифадә етдикдә мәнбәјә истинад лазымдыр.
