АБШ-ын Азәрбајҹанда узун мүддәтдир бош галан сәфир посту нәһајәт ки, мүвәггәти дә олса саһибини тапды. Мејту Брајза дүнән аиләси илә бирҝә Бакыја ҝәиб. Амма јени сәфир бир ил әрзиндә Сенат тәрәфиндән тәсдигләнмәзсә, вәзифәсинә хитам вериләҹәк. Чүнки М.Брајза Сенатын дејил, АБШ президенти Барак Обаманын хүсуси сәлаһијјәтијлә бу вәзифәјә тәјин олунуб.
Бәс, Метју Брајзанын Азәрбајҹана сәфир тәјинатындан нә ҝөзләмәк олар? Бу барәдә ФактХебер.ҹом-ун суалыны политолог Елхан Шаһиноғлу ҹавабландырыб: “Әслиндә сәфирин Метју Брајза олмасы марағы бир гәдәр дә артырыр. Чүнки бөјүк ҝөзләнтиләр вар ки, Брајза сәфир ишләјәркән бөјүк уғурлар газаныла биләр. Амма мән бу ҹүр үмидләрлә јашамырам. Буна сәбәб дә М.Брајзанын һәмсдәр ишләдији дөнәми хатырламамдыр. О һәмин вахт чох чалышса да бир нәтиҹә әлдә едә билмәди. Әксинә, бәзән елә ифадәләр ишләдирди ки, сонрадан тәкзиб етмәли олурду. Азәрбајҹанда бир сөз данышырды, Ермәнистанда башга сөз. Тәсадүфи дејил ки, буна ҝөрә мән ону “тәкзиб устасы” адландырмышдым. Дүздүр о ҝәлмәздән әввәл ачыглама вермишди ки, Гарабағ мүнагишәсинин һәллиә өз төһфәсини верәҹәк. Амма бу о гәдәр дә мүмкүн дејил. О сәфирдир вә бу сәлаһијјәтләрдән кәнара чыха билмәз, АБШ-ын һәмсәдри башга адамдыр. Бундан әлавә унутмаг олмаз ки, Брајзанын сәфир кими сәлаһијјәтләри Сенатда тәсдиг олунмајыб. Онун тәсдигинә мане оланлар ермәнипәрәст Демократлардыр, Республикачылар да Сенатда азлыг тәшкил едирләр.
Үмумијјәтлә ҝөтүрдүкдә исә, онун тәјинаты чох чәтин замана дүшүб. Чүнки ики өлкә арасында чох сојуг мүнасибәтләр вар. Обама президент сечилдикдән сонра Азәрбајҹан президентини Америкаја дәвәт етмәјиб. Бундан әлавә Вашингтонда кечирилмиш нүвә топлантысына Гафгазадан садәҹә Ермәнистан вә Ҝүрҹүстан дәвәт олунмушду. Инди Брајзадан ҝөзләнти одур ки, Вашингтонда Гарабағла бағлы мәсәләләрә диггәти артыра вә ики өлкә арасындакы ҝедиш-ҝәлишә тәсир едә биләр.
Бир мәсәләни дә диггәтдә сахламаг лазымдыр ки, Брајза Азәрбајҹана һәјат јолдашы Зејно Баранла ҝәлиб вә о АБШ-дакы бир нечә апарыҹы бејин мәркәзиндә фәалијјәт ҝөстәрир. Вә Ҹәнуби Гафгазы һәјат јолдашындан һеч дә аз танымыр.
Һәр һалда јазын ајларда Брајзанын нә кими уғурлар әлдә едәҹәјини бирҝә мүшаһидә едәҹәјик.”
Елхан бәјин “Брајзанын сәфәри Азәрбајҹанда сијаси активлији артыра биләрми” суалына ҹавабы исә белә олду: “Һесаб етмирәм ки, һәр һансы бир фәалијјәт вә ја ачыглама, киминсә тәјинатына бағлы олсун. Әлбәттә, Орта Шәргдә чох фәал просесләр ҝедир. Авторитар режимләр бир-биринин ардынҹа сүгут едир. Артыг Гәрбдә белә бир анлајыш вар ки, бахмајараг авторитар режимләр бәзән Гәрбин марагларыны тәмин едирләр, амма онлар өз өлкәләриндә дајаныглы дејилләр. Ну Мисирдә бир даһа өзүнү ҝөстәрди. Она ҝөрә дә ҝәләҹәкдә Гәрбдә демократија, инсан һаглары вә коррупсијаја даһа чох диггәт јетириләҹәји ҝөзләнилир. Амма бүтүн бунларын Азәрбајҹана нә кими тәсир ҝөстәрәҹәјинә бирмәналы ҹаваб вермәк чәтиндир. Бу бирбаша Азәрбајҹандакы дурумла әлагәдардыр. Дүздүр, Азәрбајҹанда да демократија вә коррупсија илә бағлы ҹидди проблемләр вар. Мүхалифәт дә ҝүҹлү олсајды, мәсәләләрә тәсир едә биләрди. Сәфир өз әлкәсинин марагларыны вә тәһлүкәсизлијини горумагла сәлаһијјәтлидир. Брајза Азәрбајҹана ҝәлмәмишдән әввәл Вашингтондакы демократија вә инсан һагларына көкләнмиш бир мәркәздә өлкәмизлә бағлы фикир мүбадиләси апарыб, амма дүшүнмүрәм ки, онун ҝәлиши Азәрбајҹанда демократик просесләрин инкишафына тәкан верә биләр.”
