Әһли Бејт -АБНА- хәбәр аҝентлијинин вердији хәбәрә әсасән: Нәсими Рајон Мәһкәмәсинин Мөвсүм Сәмәдов барәдә чыхардығы 3 ајлыг һәбс гәти-имкан гәрарындан 8 сутка кечмәсинә бахмајараг, Азәрбајҹан Ислам Партијасынын һәбсдә олан сәдри һәлә дә Дахили Ишләр Назирлијинин Баш Мүтәшәккил Ҹинајәткарлыгла Мүбаризә Идарәсиндә сахланылыр. Бу барәдә Мөвсүм Сәмәдовун вәкили Анар Гасымов мәлумат вериб. Онун сөзләринә ҝөрә, Азәрбајҹан Республикасынын ганунларына әсасән, Мөвсүм Сәмәдовун Мүтәшәккил Ҹинајәткарлыгла Мүбаризә Идарәсиндә сахланылмасы ганунсуз олса да, һүгугларыны горудуғу шәхс һәлә дә тәҹридханада сахланылыр. “Бу ҝүн Мөвсүм Сәмәдовла ҝөрүшмүшәм. О һәлә дә Мүтәшәккил Ҹинајәткарлыгла Мүбаризә Идарәсиндә сахланылыр. Сәһһәти нормалдыр вә өзүнү јахшы һисс едир”-дејә вәкил билдириб.
Артыг сабаһдан етибарән Мөвсүм Сәмәдовун Мүтәшәккил Ҹинајәткарлыгла Мүбаризә Идарәсиндән чыхарылмајаҹағы тәгдирдә, баш верән ганунсузлугла әлагәдар бүтүн адијјаты органлара шикајәт јазаҹағыны сөјләјән Анар Гасымов, “Мөвсүм бәјлә ҝөрүшдән сонра, онун ишини апаран Баш Прокурорлуғун мүстәнтиги Меһди Мирзәјевлә дә әлагә сахламышам. Һәмишә мәнә бир вахт дејиб башларындан едирдиләр. Сөзүмү мүстәнтигә дедим вә о мәнә сабаһ Мөвсүм бәјин Мүтәшәккил Ҹинајәткарлыгла Мүбаризә Идарәсиндән чыхарылҹағына даир сөз вериб”-дејә әлавә едиб.
Гејд едәк ки, Азәрбајҹан Ислам Партијасынын һәбсдә олан сәдри Мөвсүм Сәмәдовун мүдафиәси илә бағлы јени мәлумат верән онун вәкили, һәмчинин билдириб ки, Авропа Инсан Һүгуглары Мәһкәмәсинә дә сәнәд тәгдим етмәјә һазырлашыр. “Мөвсүм Сәмәдов барәдә сечилән һәбс гәти-имкан тәдбиринин ләғв едилмәси вә барәсиндә ҹинајәт иши ачылан маддәләрин ләғв олунмасы үчүн Авропа Инсан Һүгуглары Мәһкәмәсинә мүраҹиәт едәҹәјик. Бу просес тәгрибән бир ај әрзиндә реаллашаҹаг”-дејә Мөвсүм Сәмәдовун вәкили Анар Гасымов сөјләјиб.
Диггәт: Хәбәрдән истифадә етдикдә мәнбәјә истинад лазымдыр
