Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Бакыда Азәрбајҹан Дөвләт Нефт Ширкәти (АРДНШ) вә Иран Милли Газ Ихраҹы Ширкәти арасында тәбии газын алгы-сатгысына даир сазишин әсас шәртләри имзаланыб.
Мүгавиләни АРДНШ президенти Рөвнәг Абдуллајев вә Иранын нефт назири, Нефт Ихраҹатчысы Өлкәләри Тәшкилаты (ОПЕҸ) конфрансынын сәдри Сејјид Мәсуд Мирказеми имзалајыб.
Мүгавиләјә әсасән Азәрбајҹан артыг февралын 1-дән Ирана газ ихраҹына башлајыр. АРДНШ президенти Рөвнәг Абдуллајев билдириб ки, мүгавилә Азәрбајҹандан Ирана 5 ил әрзиндә газ нәглини нәзәрдә тутур: «Бу мүгавиләјә ҝөрә, биз ҝәләҹәк илләрдә артырылмасы имканы илә, һәләлик бу ил Ирана 1 милјард кубметр газ нәгли едәҹәјик».
Р.Абдуллајевин сөзләринә ҝөрә, һәр ил нәгл едиләҹәк газын һәҹми ајрыҹа мүәјјәнләшдириләҹәк. Јери ҝәлмишкән, назир С.М.Мирказеми артыг ҝәлән ил Ирана нәгл едилән газын һәҹминин 2 млрд. кубметрә чатдырылаҹағыны билдириб.
Р.Абдуллајев билдириб ки, Иран тәрәфинә АРДНШ газы нәгл едиләҹәк: «Ирана газ нәгл етмәк үчүн Азәрбајҹан кифајәт гәдәр газ һәҹмләринә маликдир. Бу, бизә имкан верир ки, Русија, Ҝүрҹүстан вә Түркијә илә ејни вахтда артыг Ирана да газ нәглинә башлајаг».
АРДНШ президенти әлавә едиб ки, Ирана ихраҹ олунан газын гијмәти Азәрбајҹанын Түркијәјә вә Русијаја сатдығы газын гијмәтиндән ашағы дејил вә игтисади бахымдан тамамилә сәрфәлидир: «Бизим газ ихраҹы илә бағлы сијасәтимиз мәлумдур, о да газы јүксәк гијмәтә сатмагдыр вә биз бу сијасәти һәјата кечиририк».
Р. Абдуллајев гејд едиб ки, бунун үчүн лазым олан бүтүн техники мәсәләләр һәлл олунуб. Газын Ирана нәгли үчүн мүвафиг инфраструктур јениләниб, о ҹүмләдән Астара газ компрессор стансијасынын тикинтиси баша чатыб: «Астара газ компрессор стансијасы артыг һазырдыр вә она ҝөрә, артыг февралын 1-дән биз ихраҹа башлајаҹағыг».
Гејд едәк ки, Азәрбајҹанла Иран арасында газ саһәсиндә әмәкдашлығын ҝенишләндирилмәси Иран президенти Маһмуд Әһмәдинеҹатын Бакыја сәфәри заманы ики өлкәнин президентләри арасында данышыгларда гәрара алыныб.
Хатырладаг ки, индијәдәк Азәрбајҹан вә Иран арасында газ мүбадиләси апарылыб. Амма бу әмәкдашлыг Нахчыван Мухтар Республикасынын газла тәмин олунмасы үчүн апарылан своп әмәлијјатлары вә Ирана гыш ајларында гысамүддәтли ихраҹла мәһдудлашыб.
Диггәт: Хәбәрдән истифадә етдикдә мәнбәјә истинад лазымдыр
