Әһли Бејт -АБНА- хәбәр аҝентлијинин вердији хәбәрә әсасән: Лејла Јунусун рәһбәри олдуғу Сүлһ вә Демократија Институту Ислам Партијасынын (АИП) сәдри Мөвсүм Сәмәдовун һәбс олунмасы илә бағлы бәјанат вериб. Бәјанатда Мөвсүм Сәмәдовун һәбс олунмасы писләнилир.
Бәјанатда билдирилир ки, М.Сәмәдовун һәбс олунмасы вә она гаршы террора, асајишин позулмасына һазырлыг иттиһамларынын ирәли сүрүлмәси әслиндә сөз азадлығынын позулмасыдыр: “Мөвсүм Сәмәдов Ислам Партијасынын Мәҹлисиндә һакимијјәти тәнгид руһунда чыхыш едиб. Онун чыхышы интернетдә јајылыб. Мәһз бундан бир нечә ҝүн сонра Мөвсүм Сәмәдова гаршы ағыр иттиһамларла ҹинајәт иши ачылыб вә о һәбс едилиб. Бурада ачыг-ајдын ҝөрүнүр ки, Ислам Партијасынын сәдри азад фикир билдирмәк һүгугундан истифадә етдији үчүн һакимијјәтин гәзәбинә ҝәлиб вә онун ағыр иттиһамларла мәсулијјәтә ҹәлб олунмасы гәрары верилиб. Сүлһ вә Демократија Институту һесаб едир ки, Азәрбајҹанда сијаси партијаларын үзвләри, иҹтимаи тәшкилатларын үзвләри, үмумијјәтлә вәтәндашлар сөз азадлығы һүгугундан мәһрумдурлар. Бу һүгугдан истифадә едәнләри ағыр ҹәза ҝөзләјир”.
Сүлһ вә Демократија Институту сөз азадлығына гаршы репрессив үсулларла давранмаја сон гојулмасына чағырыр.
Бәс, Мөвсүм Сәмәдовун вә Немәт Пәнаһлынын һәбси Азәрбајҹанда јени сијаси мәһбус проблемини јарадаҹагмы?
Сүлһ вә Демократија Институтунун директору Лејла Јунус билдирди ки, Мөвсүм Сәмәдовун сијаси мәһбус сијаһысына салынаҹағы шүбһәсиздир: “Мән она ҝөрә мәһз Мөвсүм Сәмәдов һагда дәгиг фикир билдирирәм ки, онун чыхышыны интернетдә шәхсән динләмишәм. О чыхышда һакимијјәт сәрт тәнгид едилир. Онун һәбсинә бу чыхышын сәбәб олдуғуна шүбһә етмирәм. Сүлһ вә Демократија Институту Мөвсүм Сәмәдову сијаси мәһбус сијаһысына дахил едәҹәк вә бејнәлхалг тәшкилатлара һәмин сијаһыны ҝөндәрәҹәк”.
Диггәт: Хәбәрдән истифадә етдикдә мәнбәјә истинад лазымдыр.
