Әһли Бејт -АБНА- хәбәр аҝентлијинин вердији хәбәрә әсасән: Бу ҝүн НАТО Лиссабон зирвә топлантысы чәрчивәсиндә дөвләт вә һөкумәт башчылары Шимали Атлантика Шурасынын ишиндә иштирак едибләр. Иҹласын јекунларына даир Лиссабон Саммити Бәјанаты гәбул едилиб.
Бәјанатын 35-ҹи маддәсиндә Алјанс Азәрбајҹанын әрази бүтөвлүјү, мүстәгиллији вә суверенлијини таныдығыны бир даһа тәсдиг едиб.
Бәјанатда Авро-атлантик Алјанс Ҹәнуби Гафгаз вә Молдовадакы узун мүддәт давам едән реҝионал мүнагишәләрин һәлә дә давам етмәсиндән олдугҹа нараһат олдуғуну билдирир вә бүтүн тәрәфләри бу мәсәләләрдә конструктивлик вә сијаси ирадә нүмајиш етдирәрәк, бу мүнагишәләри сүлһ јолу илә һәлл етмәјә вә һал һазырда ҝедән данышыглара һөрмәтлә јанашмаға вә бүтүн тәрәфләрдән реҝионал стабиллији вә тәһлүкәсизлији поза биләҹәк аддымлардан чәкинмәјә чағырыр. Сәнәддә ејни заманда, Алјанс Ҝүрҹүстан, Азәрбајҹан вә Молдованын әрази бүтөвлүјү, мүстәгиллији вә суверенликләрини бир даһа таныдығыны вурғулајараг, һәр бир мүнагишәнин принсипини нәзәрә алмагла, бу реҝионал мүнагишәләрин сүлһ јолу илә һәлли истигамәтиндә сәјләри дәстәкләјәҹәјини бәјан едир.
Хатырладаг ки, НАТО-нун 1994, 2006, 2008 вә 2009-ҹу илләрдәки зирвә топлантыларында да Азәрбајҹанын әрази бүтөвлүјүнә дәстәк ифадә олунмушду. Тәшкилатын сонунҹу Страсбург-Кеһл саммитиндән сонра НАТО өлкәләри тәрәфиндән Азәрбајҹанын әрази бүтөвлүјүнә дәстәјин верилмәмәси үчүн Ермәнистан ҹидди дипломатик сәјләр ҝөстәриб вә бу илин мај ајында Ермәнистанын президенти Серж Саркисјан бу мәгсәдлә Брүсселә - НАТО-нун гәрарҝаһына сәфәр етмишди. О, тәшкилатын баш катиби Андерс Фог Расмуссенлә бирҝә кечирдији мәтбуат конфрансында ачыг шәкилдә НАТО-нун Азәрбајҹанын әрази бүтөвлүјүнә дәстәк вермәмәсини истәмишди. Бундан әлавә, С. Саркисјан Азәрбајҹан тәрәфиндән мүмкүн һәрби әмәлијјатларын башлајаҹағы тәгдирдә, НАТО-ну һәрби мүдахилә етмәјә чағырмышды. Лакин Ермәнистанын бу истигамәтдә узун мүддәт давам едән сәјләринә бахмајараг, НАТО өлкәләри Азәрбајҹанын әрази бүтөвлүјү вә суверенлијини дәстәкләдикләрини бу ҝүн бир даһа бәјан едиб.
Алјанс өлкәләри бу дәстәји һәлә 1994-ҹү илдә ифадә етмиш, һәмин ил гәбул олунан Сүлһ Наминә Тәрәфдашлыг чәрчивә сәнәдинин принсипләринә ујғун олараг, фәал тәрәфдашлардан һесаб олунан Азәрбајҹанын әрази бүтөвлүјү, суверенлији вә сијаси мүстәгиллијинә дәстәк вермишдиләр.
Ермәнистан президентинин Лиссабон зирвә топлантысында иштиракдан имтина етмәси үзв өлкәләр тәрәфиндән чох мәнфи гаршыланыб.
Гејд едәк ки, НАТО Азәрбајҹанын әрази бүтөвлүјүнү таныды лакин ҝөрәсән бунун Азәрбајҹанын әлдән вердији торпаглары ҝери гајтармасында нәкими ролу олаҹаг. Ҝөрәсән НАТО Азәрбајҹана дәстәк олараг Ермәнистана бсгын едиб Азәрбајҹан торпагларыны ермәни ишғалчыларындан алыб азәрбајҹанлылара верәҹәкми? Јохса Ермәнистанла сәмими әлагәләринә сон гојаҹагмы? Бәлкә Ермәнистана сијаси вә игтисади ембарголар тәтбиг едәҹәк? Вә.с
Бу кими ишләр тәкҹә дүшмән Ермәнистан дөвләтинин хејринә чалышмагдан башга бир шеј дејил. Белә бәјанатлар һеч бир дәрдә дәјмир. Әксинә биразда дүшмәнләрин Азәрбајҹанын ишғал алтындакы торпағында раһатҹа јашамаларын тәмин едир. Неҹәки ишғалчы сионистләрин ишғал етдикләри Фәләстин торпагларында раһат јашадыглары кими. 60 илдән чохдур ки, сионистләр Фәләстини ишғал едибләр бу илләр әрзиндә дәфәләрлә БМТ-дә вә саир тәшкилатларда Исраил ишғалчы кими таныныб вә мүнагишәнин сүлһ јолу илә һәллини тәләб едибләр амма јенәдә көһнә һамам көһнә тас Исраил өз истәдијини едир вә ҝүнү ҝүндән дә әразисини Фәләстинин јени торпагларыны ишғал етмәклә артырыр.
Диггәт: Хәбәрдән истифадә етдикдә мәнбәјә истинад лазымдыр
