Әһли Бејт -АБНА- хәбәр аҝентлијинин вердији хәбәрә әсасән: Нојабрын 17-дә Азәрбајҹан Президенти Илһам Әлијевин вә Иран Президенти Маһмуд Әһмәдинежадын нүмајәндә һејәтләринин иштиракы илә ҝениш тәркибдә данышыглары олуб.
Гонаглары сәмими саламлајан Президент Илһам Әлијев мүбарәк Гурбан бајрамы мүнасибәтилә Президент Маһмуд Әһмәдинежады вә Иран халгыны тәбрик едиб. "Бу бајрам ҝүнләриндә Азәрбајҹана сәфәриниз хүсуси мәна дашыјыр. Бу, бир даһа ону ҝөстәрир ки, Азәрбајҹан Сизин доғма евиниз, доғма вәтәниниздир. Мән чох шадам ки, биз бу ҝүн Сизинлә чох ҝениш фикир мүбадиләси апардыг, ҝүндәлијимизин, демәк олар ки, бүтүн мәсәләләрини әһатә етдик. Бир даһа ҝөрдүк вә әмин олдуг ки, Иран илә Азәрбајҹан арасындакы мүнасибәтләр достлуг, гардашлыг зәмининдә сүрәтлә инкишаф едир. Биз бүтүн саһәләрдә јахшы нәтиҹәләри ҝөрүрүк, сијаси әлагәләримиз ҝүҹләнир. Игтисади, енержи, нәглијјат саһәләриндә ишләр јахшы ҝедир. Јәни, бизим үчүн ваҹиб олан бүтүн саһәләр диггәт мәркәзиндәдир", Илһам Әлијев дејиб.
Президент Илһам Әлијев Иран Президентинин Азәрбајҹана рәсми сәфәринин јахшы нәтиҹәләри олаҹағыны вурғулајыб. "Сәфәриниз икитәрәфли әлагәләрә јени ҝүҹлү тәкан верәҹәкдир. Һәмишә олдуғу кими, бундан сонра да Иран илә Азәрбајҹан арасында мүнасибәтләр сүрәтлә инкишаф едәҹәк вә ики гардаш халга уғурлар, хошбәхтлик ҝәтирәҹәкдир", Азәрбајҹан Президенти билдириб.
Мүбарәк Гурбан бајрамы мүнасибәтилә Президент Илһам Әлијеви вә Азәрбајҹан халгыны тәбрик едән Иран Президенти Маһмуд Әһмәдинежад белә хош бир ҝүндә Азәрбајҹана сәфәр етдијиндән мәмнунлуғуну ифадә едиб. "Арамыздакы мүнасибәтләр гардашлыг мүнасибәтләридир. Өз евимиздә, гардашларымызын јанындајыг. Әминәм ки, Ирана сәфәриниз заманы Сиз дә һәмин һиссләри кечирирсиниз. Биз ики дост вә ики гардаш өлкәјик. Неҹә ки, Сиз гејд етдиниз, мүнасибәтләримиз чох сәмими мүнасибәтләрдир. Әлагәләримизин инкишафына һеч бир манеә јохдур. Чох сәмәрәли данышыглар кечирдик, бүтүн мүштәрәк мөвзулар барәдә мүзакирәләр апардыг", Маһмуд Әһмәдинежад дејиб.
Иран Президенти өлкәләримиз арасында мүнасибәтләрин бундан сонра да инкишаф едәҹәјинә әминлијини вурғулајыб. "Биз һәмишә бир-биримизин јанындајыг вә бејнәлхалг тәшкилатларда, дүнја бирлијиндә бир-биримизин һүгугуну гәтијјәтлә мүдафиә едәҹәјик", Иран Президенти гејд едиб.
Диггәт: Хәбәрдән истифадә етдикдә мәнбәјә истинад лазымдыр
