Әһли Бејт -АБНА- хәбәр аҝентлијинин вердији хәбәрә әсасән: Тәбрикдә дејилир: “Пејғәмбәрләрин сәләфи Һәзрәт Ибраһим әлејһиссәламын јадиҝары олан Ејдүл-Әзһа – Гурбан бајрамы ислам үммәтинин ән мүгәддәс вә шәрәфли ҝүнләриндәндир. Бәшәр нәслинин Уҹа Јараданына тәгва вә мәһәббәтинин Рәббимизин өз бәндәләринә лүтф вә мәрһәмәтинин тәҹәссүмү олан мүгәддәс Гурбан бајрамы әсрләр боју инсанларын һәмрәјлијинә, мәнәви сафлашмасына вә иманларынын камилләшмәсинә хидмәт едир.
Һәм мүгәддәс Мәккеји-мүкәррәмәдә, һәм дә Азәрбајҹан мәсҹидләриндә дуалар едән мөмин мүсәлманлар Вәтәнимизин талејинин ән чәтин анларында бизә улу өндәр олмуш, милләтимизи фаҹиәләрдән гуртармыш Һејдәр Әлијев һәзрәтләринин руһу үчүн рәһмәт диләјир, онун ән лајигли давамчысы мөһтәрәм президент Илһам Әлијевин мүстәгиллијимизи тәмин етмәк, халгымызы фираван ҝәләҹәјә апармаг, Азәрбајҹанын һагг ишинин тәнтәнәси јолунда фәалијјәтинә јардымчы олмасыны Аллаһдан арзулајырлар. Ислами дәјәрләрә саһиб дуран мүдрик дөвләтчилијимизин гајғысы сајәсиндә биз бу мүбарәк мәгамы 2 ҝүн бајрам етмәк шәрәфинә наил олмушуг.
Бу әзиз ҝүндә шәһидләримизин руһларына рәһмәт диләјәрәк, Аллаһ-Таалаја торпагларымызын ишғалчылардан тәмизләнмәсиндә, Вәтәнимизин әрази бүтөвлүјүнү бәрпа етмәкдә, Азәрбајҹанын дөвләт бајрағыны тезликлә доғма Гарабағда уҹалтмагда бизләрә јардымчы олмасы үчүн дуалар едирик.
Гачгын, көчкүн, кимсәсиз сојдашларымыза бу мүбарәк бајрамы һамы илә бирҝә көнүл хошлуғу илә кечирмәк имканы јаратмаг, онун севинҹини еһтијаҹы оланлара јашатмаг Аллаһа хош ҝедән саваб әмәлләрдәндир”.
Мүраҹиәт бу сөзләрлә битир: “Шејхүлислам олараг Азәрбајҹан халгына хејир-дуаларымы јетирир, Уҹа Аллаһын нәзәринин үзәримиздә даим бәргәрар олмасыны диләјирәм. Аллаһ-Таала гурбанларымызы гәбул, үлви нијјәтләримизи мүстәҹаб етсин, иншаллаһ! Амин!
Аллаһ Гурбан бајрамынызы мүбарәк етсин!”
Диггәт: Хәбәрдән истифадә етдикдә мәнбәјә истинад лазымдыр
