Әһли Бејт -АБНА- хәбәр аҝентлијинин вердији хәбәрә әсасән: Е. Сабироғлу билдириб ки, тәлимләрин кечирилмәси елә бир мүрәккәб мәсәләдир ки, о, әввәлҹәдән планлашдырылмалы вә дәгигликлә өлчүлүб-бичилмәлидир: “Бу исә кифајәт гәдәр вахт тәләб едир. Тәлим кечирмәк елә дә асан иш дејил ки, истәдијин заман ону һәрәкәтә ҝәтирә биләсән вә истәдијин нәтиҹәни әлдә етмиш оласан. Бунун үчүн бир сыра ваҹиб амилләр, хүсусилә дә күллү мигдарда вәсаит тәләб олунур. Мәлум олдуғу кими, бу ҝүн Ермәнистан ордусунда вә онун ишғал етдији Азәрбајҹан әразиләриндә ҹәмләшдирдији һәрби гүввәләрдә белә имканлар јохдур. Игтисадијјаты дармадағын олан бир өлкәдә һәрбијәнин нә вәзијјәтдә олдуғуну өзүнүз тәсәввүр един. Бу ҹүр һијләҝәрликлә онлар һеч кәси алдада билмәзләр. Ахшам јатыб, сәһәр јухудан дуруб тәлим кечирмәклә дөјүш һазырлығыны јүксәлтмәк олмур”.
Е. Сабироғлу диггәти диҝәр бир әсаслы мәгама јөнәлтмәк истәдијини дејиб: “Нә заман ки, Азәрбајҹанда Ермәнистанын дүшдүјү бәрбад вә позуҹу вәзијјәтлә бағлы һәр һансы доғру, јахуд мүнагишәнин һәлли истигамәтиндә гәти мүнасибәт ачыглананда Дағлыг Гарабағда 5-6 танкы вә 1-2 диҝәр дөјүш машыныны чыхарыр, һәрдән дә бир-ики атәш ачыр, сонра да адыны гојурлар ҝенишмигјаслы һәрби тәлим. Бунлар алдадыҹы фәндләрдир. Белә һоггаларла иҹтимаи фикир формалашдырылмыр. Чох тәәссүф ки, ермәниләр һәлә дә бу јаланчы һәрәкәтләрдән әл чәкә билмәјибләр. Јәгин бунун өзү дә бир хәстәлик вә ја чарәсизликдир. Саркисјан да, Оһанјан да, диҝәр јанлар да белә гурама тәлимләрә ҝәлә биләрләр. Лакин онлар там әмин олмалыдырлар ки, бу ҹүр уҹуз ҝөрүнтүләр јаратмагла нәјисә дәјишмәк вә ја нәјәсә тәсир етмәк мүмкүн дејил”.
Диггәт: Хәбәрдән истифадә етдикдә мәнбәјә истинад лазымдыр
