Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан президенти дејиб ки, бу вида ҝүнү кәдәрли олмагла јанашы һәм дә шәрәфлидир: “Мүбаризлә Фәрид Вәтән уғрунда өз торпағында һәлак олублар. Онлар әсл гәһрәманлыг, рәшадәт ҝөстәрибләр. Мүбариз Ибраһимов гејри-бәрабәр дөјүшдә 5 дүшмәни мәһв едәрәк, 3-нү јаралајараг шәһид олуб. Мүбариз јахшы билирди ки, о дөјүшдән сағ-саламат чыха билмәјәҹәк. Анҹаг Вәтән, торпаг севҝиси, онда олан вәтәнпәрвәрлик руһу ону шәһидлик зирвәсинә уҹалтды. Мүбариз бүтүн ҝәнҹләр үчүн өрнәкдир, нүмунәдир”.
Президент дејиб ки, Фәрид Әһмәдов да дөјүш вәзифәсини иҹра едәркән һәлак олуб: “Һәр икиси өлүмүндән сонра Азәрбајҹан дөвләти тәрәфиндән јүксәк мүкафатларла тәлтиф олунублар. Мән шәһидләримизин валидејнләринә, онларын гоһумларына, јахынларына башсағлығы верирәм. Аллаһ онлара рәһмәт еләсин!
Шәһидләримизин валидејнләринә миннәтдарлығымы билдирмәк истәјирәм ки, онлар Вәтән үчүн белә гәһрәманлар бөјүдүбләр. Онларын вердији тәрбијә - вәтәнпәрвәрлик тәрбијәси Мүбаризи вә Фәриди мәнәвијјат зирвәсинә уҹалдыб. Тәмас хәттиндә һәр бир итки бизи сарсыдыр, һәр бир итки бизим үчүн ағырдыр. Анҹаг биз мүһарибә шәраитиндә јашајырыг вә Мүбаризлә Фәрид өз һәјаты илә, өз гәһрәманлығы илә дүшмәнә сүбут етдиләр ки, Азәрбајҹан халгы, Азәрбајҹан ҝәнҹләри Вәтән уғрунда ҹанларындан кечмәјә дә һазырдырлар. Бу, бөјүк гәһрәманлыг, һүнәр, вәтәнпәрвәрлик нүмунәсидир”.
Президент өтән ајлар әрзиндә бүтүн Азәрбајҹанын Фәридин, Мүбаризин аиләләринин јанында олдуғуну, халгын һәмрәјлик ҝөстәрдијини билдириб: “Мән билирәм, бүтүн бу ајлар әрзиндә вәтәндашларымыз, мүхтәлиф бөлҝәләрдә јашајан вәтәндашлар шәһид өвладларымызын аиләләринә баш чәкиб башсағлығы вермиш, өз һәмрәјлијини ҝөстәрмишләр. Мүбаризин вә Фәридин гыса вә шәрәфли һәјаты Азәрбајҹан халгыны даһа да бирләшдирди. Бу ҝүн, ејни заманда, чох шәрәфли бир ҝүндүр. Чүнки биз өз өвладларымызы бурада бөјүк еһтирамла сон мәнзилә јола салырыг. Әминәм ки, онларын әзиз хатирәси Азәрбајҹан халгынын гәлбиндән һеч вахт силинмәјәҹәк. Бизим ордумузда минләрлә, он минләрлә Мүбариз, Фәрид кими гәһрәманлар вар. Онлар Али Баш Команданын әмрини ҝөзләјирләр. Онлар өз доғма торпагларыны азад етмәк үчүн һәр ан һазырдырлар. Азәрбајҹан Ордусу Ҹәнуби Гафгазда ән гүдрәтли, ән пешәкар, ән мүбариз ордудур вә шәһидләримизин гәһрәманлығы буну бир даһа сүбут едир. Биздә нәинки бөјүк сајда силаһ-сурсат, һәрби техника, дөјүш имканлары вардыр, ејни заманда, ордумузда бөјүк руһ јүксәклији вар. Чүнки бизим ишимиз һагг ишидир. Биз һеч бир өлкәнин торпағыны зәбт етмәмишик. Бизим торпагларымыз узун илләрдир ки, ишғал алтындадыр. Бизим һеч бир башга дөвләтин торпағына иддиамыз јохдур. Амма өз торпағымыздан һеч кимә бир гарыш вермәјәҹәјик. Биз өз әрази бүтөвлүјүмүзү бәрпа едәҹәјик. Мүбаризлә Фәрид башга өлкәнин әразисиндә һәлак олмајыблар, өз доғма торпағында шәһид олублар”.
Президент дејиб ки, ҝүн ҝәләҹәк Азәрбајҹан өз әрази бүтөвлүјүнү бәрпа едәҹәк: “Биз истәјирик ки, буну данышыглар јолу илә һәлл едәк. Биз истәмирик ки, ҝәнҹләримиз шәһид олсун. Биз истәјирик ки, ҝәнҹләримиз јашасынлар, охусунлар, Вәтән үчүн, дөвләт үчүн чалышсынлар. Һәр бир дөјүш бөлҝәсиндә верилмиш итки бизим үчүн ағырдыр. Она ҝөрә биз чалышырыг ки, бу мәсәлә өз һәллини сүлһ јолу, данышыглар јолу илә тапсын. Данышыглар просесиндә Азәрбајҹанын мөвгеләри ҝетдикҹә ҝүҹләнир. Нәинки сијаси вә һүгуги һәгигәт бизим мөвгејимизи дәстәкләјир, бу ҝүн истәнилән параметр үзрә Азәрбајҹан Ермәнистандан бир нечә дәфә үстүндүр. Бу үстүнлүјү биз јаратмышыг, Азәрбајҹан халгы јарадыб. Һәм сијаси, һәм игтисади, һәм һәрби ҹәһәтдән үстүнлүјүмүз артыг һәр кәс үчүн ачыг-ајдын ҝөрүнүр. Анҹаг бунунла бәрабәр, бу ҝүн бу шәрәфли ҝүндә бир даһа бәјан етмәк истәјирәм ки, биз данышыглары садәҹә олараг данышыглар наминә апармајаҹағыг.
Данышыгларын имитасијасы илә мәшғул олмаг үчүн Ермәнистана имкан вермәјәҹәјик. Биз о вахта гәдәр данышыглар апараҹағыг ки, әрази бүтөвлүјүмүзү бу јолла бәрпа едә биләҹәјимизә үмидимиз галаҹагдыр. Әҝәр ҝөрсәк ки, бу мүмкүн дејил, онда Азәрбајҹан дөвләти һәрби јолдан истифадә едәрәк, өз әрази бүтөвлүјүнү бәрпа едәҹәк. Мән шүбһә етмирәм ки, бунун үчүн биздә бүтүн имканлар - дөјүш һазырлығы, мадди-техники тәҹһизат, кифајәт гәдәр силаһ-сурсат, пешәкар орду, руһ јүксәклији вә Азәрбајҹан халгынын ирадәси вар. Биз әрази бүтөвлүјүмүзү истәнилән анда һәрби јолла бәрпа едә биләрик. Дүшмән дә буну билмәлидир вә билир”.
Өлкә башчысы Азәрбајҹанын әрази бүтөвлүјүнүн данышыглар мөвзусу олмадығыны вә олмајаҹағыны да билдириб: “Азәрбајҹан әрази бүтөвлүјүнү бәрпа едәҹәк, Дағлыг Гарабағ бизим доғма, әзәли торпағымыздыр. Әсрләр боју Азәрбајҹан халгы Дағлыг Гарабағда вә әтраф бөлҝәләрдә јашајыб, јарадыб. Буҝүнкү Ермәнистан дөвләти тарихи Азәрбајҹан торпаглары үзәриндә гурулуб. Ирәван ханлығы, Зәнҝәзур маһалы бизим тарихи торпагларымыздыр. Биз һеч вахт имкан верә билмәрик ки, доғма торпағымыз олан Дағлыг Гарабағда икинҹи ермәни дөвләти јарадылсын. Һеч вахт Азәрбајҹан халгы бу вәзијјәтлә барышмајаҹагдыр. Бу ҝүн мәсәләни һәлл етмәк үчүн бүтүн имканларымыз вар. Садәҹә олараг чалышырыг ки, данышыглар просесиндән максимум дәрәҹәдә истифадә едәк. Биз истәмирик ки, мүһарибә олсун. Ким истәјәр ки, мүһарибә олсун. Анҹаг биз бу вәзијјәтлә дә һеч вахт барышмајаҹағыг. Биз бу ҝүн бүтүн сәјләримизи сәфәрбәр етмишик ки, гаршыда дуран вәзифәни иҹра едәк. Бу ҝүн шәһид өвладларымызын шүҹаәти, гәһрәманлығы бир даһа ону ҝөстәрир ки, биз буна гадирик”.
Диггәт: Хәбәрдән истифадә етдикдә мәнбәјә истинад лазымдыр
