Мәрһум Тәбәрси (р) “Мәҹмәүл-бәјан”да јазыр:
“Һәзрәт Пејғәмбәрдән (с) Гуран сурәләри арасында һансы сурәнин диҝәрләриндән даһа үстүн олдуғу сорушулду. Һәзрәт Пејғәмбәр (с) бујурду: “Бәгәрә сурәси даһа үстүндүр.” Сорушдулар: “Бәс Бәгәрә сурәсиндә олан ајәләрин һансы даһа үстүндүр?” Пејғәмбәр (с) бујурду: “Ајәтәл-күрси.” (“Тәфсири-нурус-сәгәлејн”, ҹ. 1, с. 26; “Мәҹмәүл-бәјан”, ҹ. 1, с. 32; “Тәфсири-нүмунә”, ҹ. 1, с. 59)
Имам Әли ибн Һүсејн (ә) Пејғәмбәрин (с) белә бујурдуғуну нәгл едир:
“Һәр кәс “Бәгәрә” сурәсинин башланғыҹындан 4 ајә, “Ајәтәл-күрси”, ондан сонракы ики ајәни вә Гуранын диҝәр бир јериндән 3 ајә охуса, мал вә ҹанында һеч бир хошаҝәлмәзлик ҝөрмәз. Шејтан һәмин шәхсә јахынлашмаз вә бу шәхс һеч заман Гураны јаддан чыхармаз.” (“Тәфсире-нүмунә”, ҹ. 1, с. 59; “Тәфсире-нурус-сәгәлејн”, ҹ. 1, с. 26; “Сәвабул-әмал”, с. 237)
Башга бир јердә Имам Ризанын (ә) јатмаздан өнҹә вә һәр намаздан сонра Ајәтәл-күрси охујан шәхс һаггында белә бујурдуғу нәгл едилир:
“Һәр кәс јатмаздан өнҹә “Ајәтәл-күрсини” охуса, әҝәр Аллаһ-таала истәсә, һеч заман ифлиҹ олмаз. Һәр кәс бу ајәни намаздан сонра охуса, јыртыҹы һејванлар һеч заман она зәрәр јетирмәз.” (“Сәвабул-әмал”, с. 239)
“Али-Имран” сурәсини охумағын фәзиләти вә мүкафаты
Һәзрәт Пејғәмбәр (с) бујурур:
“Һәр кәс “Али-Имран” сурәсини тилавәт етсә, бәрзәх көрпүсүндә һәмин шәхсә сурәнин ајәләри сајында аман вериләр.” (“Мәҹмәүл-бәјан”, ҹ. 1 вә ҹ. 2, с. 405)
Имам Садиг (ә) бу һагда бујурур:
Бир шәхс “Бәгәрә” вә “Али-Имран” сурәләрини охуса, бу сурәләр Гијамәт ҝүнү ики булуд тәк онун үзәринә көлҝә салар.” (“Тәфсири-нурус-сәглејн”, ҹ. 1, с. 309)
“Ниса” сурәсини охумағын фәзиләт вә мүкафаты
Һәзрәт Пејғәмбәр (с) бујурур:
“Һәр кәс “Ниса” сурәсини охуса, бу сурә әсасында ирс апараҹаг һәр мүсәлман гәдәр Аллаһ јолунда инфаг етмиш кимидир вә она гул азад етмиш шәхсин мүкафаты вериләр.” (“Тәфсири-нүмунә”, ҹ. 3. с. 275)
Әмирәл-мөминин Әли (ә) бујурур:
“Һәр кәс ҹүмә ҝүнү “Ниса” сурәсини охуса, гәбр сыхынтысындан азад олар.” (“Сәвабул-әмал”, с. 239)
“Маидә” сурәсини охумағын фәзиләт вә мүкафаты
Имам Багир (ә) бујурур: “Һәр ҹүмә ахшамы “Маидә” сурәсини охујан шәхс, халга зүлмдән узаг олар вә һеч вахт Аллаһа шәрик гәрар вермәз.” (Һәмин мәнбә)
“Әнам” сурәсини охумағын фәзиләт вә мүкафаты
Ибн Аббас дејир: “Әнам” сурәсини һәр ҝеҹә охујан шәхс гијамәтдә ниҹат тапмышлардан олар вә ҹәһәннәм аловуну һеч вахт ҝөзләри илә мүшаһидә етмәз.” (“Сәвабул-әмал”, с. 241, һ. 378)
Имам Садиг (ә) бујурур: “Әнам” сурәси бирдәфәјә назил олду. Бу сурә һәзрәт Мәһәммәдә (с) чатанадәк 70 мин мәләк тәрәфиндән мүшајиәт едилди. Бу сурәни уҹа тутун. Чүнки сурәдә Аллаһын “исми-әзәми” 70 мәгамда зикр едилмишдир. Әҝәр сурәдә олан сирләри билсәјдиниз, һеч вахт ондан узаглашмаздыныз.” (Һәмин мәнбә)
Мигдад Ејвазов
Мәнбә: “Гуран вә һәјат”
