“ФАТИМЕЈИ-ЗӘҺРА” МӘСҸИДИНИН МӘСӘЛӘСИ АЛИ МӘҺКӘМӘНИН ПЛЕНУМУНА ЧЫХАРЫЛАҸАГ

Әһл Бејт-АБНА-хәбәр аҝентлијинә верилән хәбәрә әсасән Гафгаз Мүсәлманлары Идарәсинин (ГМИ) рәһбәри шејхүлислам Һаҹы Аллаһшүкүр Пашазадә Јени Ҝүнәшлидәки “Фатимеји-Зәһра” мәсҹидинин ҝәләҹәк талеји илә бағлы данышыб. “Туран” информасија аҝентлијинин мәлуматына ҝөрә, шејх президент Илһам Әлијевин ҝөстәришилә мәсҹидин ГМИ-нин сәрәнҹамына верилдијини дејиб, мәсҹидин бүтүнлүклә идарәнин табечилијинә кечмәси үчүн исә мәһкәмә проседурундан кечмәсини ваҹиб сајыб: “Бундан сонра мәсҹидлә бағлы диҝәр мәсәләләрин дә һәллини тапаҹаг”. Бәзи мәлуматлара ҝөрә, “Фатимеји-Зәһра (с.ә.)” мәсҹиди барәдә әсассыз мәһкәмә гәрарларынын Али Мәһкәмәнин Пленумунда ләғв едиләҹәји барәдә гәрарын гәбул едиләҹәји дә ҝөзләнилир. Мәсҹидин дини иҹмасынын вәкили Аслан Исмајыл “Јени Мүсават”а ачыгламасында Али Мәһкәмәнин пленумуна артыг касасија шикајәти верилдијини билдирди: “Өлкә башчысы мәсҹидин ачылмасы үчүн сәрәнҹам вермәклә ирадә нүмајиш етдирди. Ону дејә биләрәм ки, һазырда мәсҹид һеч кимин сәрәнҹамында дејил. Чүнки Али Мәһкәмә мәсҹидин сөкүлмәси һаггында гәрар вериб. Мәһкәмә бундан өнҹәки гәрарлары ләғв етдикдән сонра дини иҹма илә ГМИ өз араларында мәсҹидин кимин сәрәнҹамына верилмәси һаггында гәрар гәбул етмәлидирләр”. Дини Етигад вә Виҹдан Азадлыгларынын Мүдафиәси Мәркәзинин сәдри Илгар Ибраһимоғлу да дејерлер.орҝ-а ачыгламасында “Фатимеји-Зәһра (с.ә.)” мәсҹиди әтрафында нараһатлыгларын там чөзүлмәси үчүн мүвафиг һүгуги проседурларын тәтбиг едилмәсинин бөјүк әһәмијјәти олдуғуну дејиб. Онун сөзләринә ҝөрә, бу мөвзу һәлә дә иҹтимаијјәтин диггәт мәркәзиндәдир: “Мүраҹиәтләрдән бәлли олур ки, инанҹ кәсими "Фатимеји-Зәһра (с.ә.)" мәсҹиди барәдә бир нечә ај өнҹә гәбул едилмиш мүсбәт гәрардан мәмнунлуг һисси кечирсәләр дә, бунун мүфавиг һүгуги тәртибатынын һәјата кечирилмәси бахымындан мүәјјән ниҝаранлыг мөвҹуддур". И.Ибраһимоғлунун фикринҹә, Али Мәһкәмәнин пленумунун бу ситуасијаја мүәјјәнлик ҝәтирәҹәји барәдә хәбәр - нараһатлыгларын там арадан ҝетмәси бахымындан әһәмијјәтли ола биләр.