Әһл Бејт-АБНА-хәбәр аҝентлијинин хәбәринә әсасән Азәрбајҹан вә азәрбајҹанлылар Әфганыстандан Авропаја ҝедән һероин вә башга наркотик васитәләр трафикиндә өнәмли јер тутур. БМТ-нин Наркотикләр вә Ҹинајәтлә Мүбаризә Тәшкилатынын һазырладығы «Дүнја Наркотикләр һесабатында» белә дејилир. «Азадлыг Радиосу»нун һесабатла бағлы һазырладығы материалда мараглы фактлар әксини тапыб. Һесабата ҝөрә, Әфганыстандан Авропаја наркотик дашыјанларын јени - «Шимали Балкан јолу» адландырдығы маршрут мәһз Азәрбајҹандан кечир: Әфганыстан, Иран, Азәрбајҹан, Ҝүрҹүстан вә Гара дәниз васитәсилә Болгарыстана илдә үмуми һероин дөвријјәсинин 7 фаизи дашыныр. БМТ-нин һесабатына ҝөрә, Әфганыстандан Авропаја ҝедән һероин тиҹарәтинин - 80-85 тонунун 80 фаизи мәһз Иран Азәрбајҹанындан ҝедир вә Түркијәјә - күрдләрин чохлугда олдуғу әразиләрдән кечмәклә Авропа сәрһәдләринә кими узаныр. БМТ-нин Наркотикләрлә Мүбаризә Идарәсинин һесабатына ҝөрә, Түркијәнин Һаккари вә Ван бөлҝәсинә һәр ил 95 тон һероин кечир. малын бир һиссәси дә Азәрбајҹан Республикасына јөнәлир. Алманија, Италија, Һолландија, Британија базарларына һероин мәһз бу маршрутларла ҝедир. Һесабата ҝөрә, Түркијә әразисијлә наркотик дашынмасына бирбаша олараг јерли тајфалар - әсасән дә күрдләр нәзарәт едир. Азәрбајҹана вә Гафгаза наркотикләр Түркмәнистанын Түркмәнбашы лиманы васитәсилә Бакыдан да дахил олур. Үмумиликдә Әфганыстан-Орта Асија-Хәзәр дәнизи - Русија маршруту да һероин гачагмалчылығында өнәмли јер тутур. Чүнки Русијада иллик һероин истеһлакы 70 тона чатыр. Үмумиликдә Азәрбајҹана илдә 11 тон һероин ҝәлир. Бунун 4 тону Азәрбајҹан, Ҝүрҹүстан вә үмумиликдә Гафгазда истеһлак олунур. Галан 7 тонун 6 тону Ҝүрҹүстана вә Гара дәниз васитәсилә Болгарыстана чатдырылыр. 1 тону исә Украјнаја дашыныр. Азәрбајҹана кичик јолларла дашынан наркотик әсасән Дағыстан вә Шимали Гафгазда сатылмаг үчүн нәзәрдә тутулан наркотик васитәләрдир. БМТ-нин һесабатында о да билдирилир ки, Гафгазда вә реҝионда сепаратчы режимләрин нәзарәтиндә олан әразиләр - хүсусән дә Дағлыг Гарабағ вә Абхазија һероин трафикиндә өнәмли јер тутур. Ҝүрҹүстан вә Русија арасындакы мүһарибәдән сонра Абхазија вә Гара дәниз васитәсилә наркотик дөвријјәсинин артмасы да бу иддиалары ҝүҹләндирир. Үстәлик, һесабата ҝөрә,Түркијәдә наркотрафики идарә едәнләр дә әсасән һөкумәтин нәзарәтиндә олмајан дағлардакы силаһлы күрд јараглыларыдыр. БМТ-нин наркотикләрлә бағлы һесабатында һәмчинин билдирилир ки, Азәрбајҹан-Түркијә- маршрутундан чыхан наркотик артыг манеәсиз һәрәкәт едир. Експертләр буну сонрадан трафики һәјата кечирән Балкан мафијасынын даһа сәмәрәли ишләмәси вә јерли органларын коррупсијаја даһа чох гуршанмасы илә изаһ едирләр. Мүгајисә үчүн Түркијәдә илдә тәхминән 16, Иранда исә 32 тон һероин мүсадирә едилир. Шәрги вә Ҹәнуби Авропанын 11 өлкәсиндә исә бирликдә 3 тона јахын һероин ашкарланыр. Һесабата әсасән, Азәрбајҹан вә Ҹәнуби Гафгазда үмумиликдә илдә 4 тона гәдәр һероин истифадә олунур вә ја ашкарланыб, мүсадирә едилир. БМТ-нин рәгәмләринә ҝөрә, Азәрбајҹанда 15-64 јаш арасындакы әһалинин 0.2 фаизи тирјәк, 3.5 фаизи исә нәшә чәкир. Башга сөзлә, БМТ-нин фикринҹә, һәр 500 нәфәрдән бири тирјәк, һәр 33 нәфәрдән бири исә нәшә чәкәндир.Амма реал фактлар бунун даһада ҹох олмасыны ҝөстәрир.
