Әһли-Бејт (әлејһимус сәлам) – Бејнәлхалг Хәбәр Аҝентлији- АБНА: Испанија Парламенти Испанијада иҹтимаи јерләрдә нигаб вә бурка тахылмасыны гадаған едән сағчы “Вох” партијасы тәрәфиндән тәклиф едилән ганун лајиһәсинә гаршы сәс вериб.
Сәсвермә чәршәнбә ахшамы кечирилән пленар иҹласда баш тутуб. Вох иҹтимаи јерләрдә нигаб вә бурка тахылмасыны гадаған етмәји тәләб едиб "Гадынларын Ләјагәтинин Горунмасы вә Иҹтимаи Тәһлүкәсизлији" адлы ганун лајиһәсини парламентә тәгдим едиб.
Мүһафизәкар Халг Партијасы вә Наварра Халг Бирлији ганун лајиһәсини дәстәкләсә дә, ҝениш дәстәк газана билмәјиб.
Канар Адалары Коалисијасы битәрәф галыб, һаким Сосиалист Ишчи Партијасы вә мүттәфигләри исә әлејһинә сәс верибләр.
Дебат заманы солчу депутатлар Вох-у нифрәт јајмагда ҝүнаһландырыблар вә билдирибләр ки, ганун лајиһәси "гадынлара көмәк етмир" вә әксинә сосиал ҝәрҝинлији артырыр.
Гејд етмәк лазымдыр ки, Франса, Белчика, Һолландија, Австрија, Данимарка, Исвечрә вә Болгарыстан да дахил олмагла бир сыра Авропа өлкәләри иҹтимаи јерләрдә нигаб вә бурканын тахылмасыны гадаған едиб. Бәзи мәһдудијјәтләр вә ја гисмән гадағалар Норвеч, Алманија, Испанија вә Италија кими диҝәр өлкәләрдә дә мөвҹуддур.
Sizin rəyiniz