Әһли Бејт - АБНА – Хәбәр Аҝентлијинин вердији хәбәрә әсасән, Түркијәдә бу јахынларда сон дөврләрин ән бөјүк әмәлијјатларындан олан “рүшвәт әмәлијјаты" һәјата кечирилди. Азәрбајҹанда даһа чох иш адамы Рза Зәррабын һәбс олунмасы илә јадда галан бу әмәлијјат һаггында мүхтәлиф фикирләр вар.
Артыг сирр дејил ки, Түркијәдә бу әмәлијјатын әсас сәбәби “нурчулар” дедијимиз Фәтуллаһ Ҝүлән шәбәкәси илә Әрдоған һөкумәти арасындакы проблемләрдир.
Түркијә һөкүмәтиндә бир чох назирин истефасы вә бир чох инсанын һәбсинә сәбәб олан бу әмәлијјат башлајандан Түркијә нурчуларынын лидери Фәтуллаһ Ҝүләнлә Рәҹәб Тајјиб Әрдоған арасында зиддијјәтләр ачыг мүстәвијә кечди, јени сијаси вә информасија савашы башлады.
Артыг бу савашын гығылҹымлары Азәрбајҹан медиасына вә сијасәтинә дә сычрајыб. Әрдоған рәсми Бакыја да ачыг месажлар верди, Ҝүлән шәбәкәсинин Түркијәдән сонра Азәрбајҹанда да дәрин көк салдығы вә дөвләтчилијимизә ҹидди тәһлүкә мәнбәји олдуғу вурғуланды.
Ардынҹа Азәрбајҹан медиасында бир чох галмагаллы сәнәдләр чап олунду, бу шәбәкәни һимајә едән бир чох јүксәк чинли мәмурларын, милләт вәкилләринин, иш адамларынын адлары чәкилди.
Мүзакирәләр һәтта Милли Мәҹлисә гәдәр узанды. Азәрбајҹан һөкүмәтиндә отуруб, “Ҝүлән хилафәти” гуранларын, Азәрбајҹаны “нурчулар”ын сијаси вә бизнес империјасынын ишғалына сүрүкләјәнләрин кимликләри үзә чыхмаға башлады.
Истәр-истәмәз суал јараныр: Фәтуллаһ Ҝүлән Азәрбајҹандакы “хилафәтини” неҹә идарә едир, координасија һарадан апарылыр? Бу вәзифәни јеринә јетирән тәшкилат вә ја шәхсләр кимләрдир?
Өнҹә сизи бир тәшкилатла таныш едәк: Диалог Авропа Платформасы.
Бејнәлхалг иҹтимаи тәшкилат олан Диалог-Аврасија Платформасы (ДАП) 15 сентјабр 1998-ҹи ил тарихиндә Авропа вә Асијанын мүхтәлиф өлкәләрини тәмсил едән журналист вә јазычыларын Истанбулда кечирилән топлантысында тәсис едилиб.
Платформанын јарадылмасынын тәшәббүскарларындан чохунун ады мәлум олмаса да, бунлардан биринин ады бүтүн рәсми мәнбәләрдә ачыг ашкар ҝөстәрилир. Бу шәхс Фәтуллаһ Ҝүләндир. Ситат: “Бу ҝүн бүтүн Аврасија өлкәләриндә јахшы танынан Диалог-Аврасија Платформасынын вә еләҹә дә ДА дәрҝисинин әсас тәшәббүскары да елә Фәтһуллаһ Ҝүләндир. Бу платформанын һәр ил дүнјанын мүхтәлиф өлкәләриндә кечирилән тәдбирләриндә халглар вә дөвләтләр арасында сүлһ, динләрарасы диалог бир нөмрәли мүзакирә мөвзусуна чеврилир. Артыг Русијанын, Шәрги Авропанын вә еләҹә дә түрк республикаларынын танынмыш фикир адамлары бу платформада бирләшиб Аврасијанын сабаһыны дүшүнүрләр”.
ДАП Азәрбајҹанда 1999-ҹу илдән фәалијјәт ҝөстәрир. ДАП-ын түрк версијасында гурумун Азәрбајҹан голу Фәтуллаһ Ҝүләнин Азәрбајҹандакы рәсми тәмсилчилиији кими ҝөстәрилир.
Мараглыдыр ки, Азәрбајҹанда бу тәшкилатын тәсисчиси вә фәхри президенти сабиг милләт вәкили, халг јазычысы, Азәрбајҹан Јазычылар Бирлијинин сәдри Анар Рзајевдир. Анар мүәллим бир вахтлар һәмчинин бејнәлхалг платформанын да дөнәм башганы олуб.
Һазырда исә ДАП-ын Азәрбајҹанын Милли Комитәсинә Анарын јахын досту, милләт вәкили Низами Ҹәфәров рәһбәрлик едир.
ДАП-ын мәтбу органы олан ДА журналы исә Түркијә, Русија вә Азәрбајҹан башда олмагла, Аврасијанын 16 өлкәсиндә нәшр олунур.
ДАП-ын диҝәр өлкәләрдә олдуғу кими, Азәрбајҹандакы фәалијјәти дә һеч вахт һај-күјлү формада медиада ишыгландырылмајыб. Ән јахшы һалда, “ДАП белә бир тәдбир кечирди” башлығы илә материаллар јајымланыб.
Бу сәбәбдән ДАП-ын Азәрбајҹандакы фәалијјәти илә бағлы медиадан әтрафлы мәлумат топламаг мүмкүн олмады. Анҹаг мараглысы будур ки, ДАП-ын Азәрбајҹан фәалијјәти вә бу гурумда тәмсил олунан шәхсләрлә бағлы ачыг формада мәлумат Фәтуллаһ Ҝүләнин рәсми сајтында јерләшдирилиб.
Гурумун мүхтәлиф вахтларда јајдығы мәлуматларда исә тәшкилатын үзвү олан вә ја тәшкилатла бирбаша әмәкдашлыг едән вә өлкәдә чох ҹидди нүфуз саһиби олан бир чох шәхләрин адына раст ҝәлмәк олур.
Гајнар.инфо ДАП-ын рәсми үзвләри олан вә бир чох мәнбәләрдә ады кечән шәхсләрин сијаһысыны сизләрә тәгдим едир:
Милләт вәкили Низами Ҹәфәров (ДАП МК сәдри);
Милләт вәкили Мәлаһәт Ибраһимгызы (ДАП Идарә Һејәтинин үзвү);
АЈБ сәдри Анар Рзајев (тәсисчи);
МТРШ сәдри Нуширәван Мәһәррәмли (Идарә Һејәтинин үзвү);
Танынмыш журналист Гулу Мәһәррәмли (Идарә Һејәтинин үзвү);
"525-ҹи гәзет"ин баш редактору Рәшад Мәҹид (Идарә Һејәтинин үзвү);
ТуризмУниверситетининректоруҸәфәрҸәфәров (ИдарәҺејәтининүзвү);
Чағ Өөјрәтим Азәрбајҹан курсларынын рәһбәри Әнвәр Өзәрән (Идарә Һејәтинин үзвү).
Әлдә етдијимиз мәлуматларда ДАП-да тәмсил олунанларын арасында милләт вәкилләри Ҹејһун Османлы, Рәбијјәт Асланова, Фазил Мустафа, Ҝәнҹләр вә Идман назиринин мүавини Интигам Бабајевин дә ады кечир. Ады чәкилән шәхсләрин гурумда рәсми тәмсилчилијини исә арашдырмаға давам едирик.
Гејд едәк ки, Фәтуллаһ Ҝүләнин рәсми сајтында Диалог Аврасија Платформасы илә бағлы јерләшдирилмиш хәбәрләрдә Ҝәнҹләр вә Идман назиринин мүавини Интигам Бабајевин дә ады һалланыр. Анҹаг назирлијин мәтбуат хидмәти билдирир ки, Интигам Бабајев гурумун тәдбирләриндә иштирак етсә дә, тәшкилатын рәсми үзвү дејил.
Бу гурум нә ишлә мәшғулдур?
Нурчуларын Азәрбајҹандакы сијаси, идеоложи вә игтисади ишғалыны һәјата кечирән, дөвләт гурумларына дәрин көк салан, өз телеканалы, сајсыз-һесабсыз медиа гурумлары, университетләри, тәһсил оҹаглары, јүзләрлә ширкәти олан Ҝүлән шәбәкәсинин координасијасыны һәјата кечирән бу гурум икили фәалијјәтлә мәшғулдур.
Ҝөрүнән тәрәфи будур ки, ДАП мүтәмади олараг конфранслар, семинарлар кечирир, Азәрбајҹан зијалыларыны, журналистләрини шәбәкәјә ҹәлб едир, онларын Түркијә сәфәрләрини тәшкил едир, Мәтбуат Шурасы, ГҺТ Форуму, дөвләт гурумлары илә сых әмәкдашлыг едир вә с. Әслиндә исә гурум Азәрбајҹанын мәшһур сималарыны, зијалыларыны, рәсми шәхсләрини әтрафына бирләшдирмәклә өзүнә “горујуҹу зиреһ” јарадыр, мәшһур тиҹарәт мәркәзләринин бириндәки сәс кечирмәјән шүшәләр архасындакы офисиндә исә ҝүндәлик олараг Ҝүләнин Азәрбајҹандакы империјасыны координасија едир, онун тапшырыг вә тәлиматларынын јеринә јетирилмәсинә нәзарәт едир. Гурумун тәсисчи вә тәмсилчиләри танынмыш азәрбајҹанлылар олса да, пәрдә архасындакы иҹрачылары – гуруму ҝүндәлик олараг офисдән јөнәлдән шәхсләри исә ҹәмијјәт танымыр. Бу шәхсләр Түркијәдән “һизмет” адыјла Азәрбајҹана езам олунмуш шәхсләр вә онларын системиндә “јетишдирилән”, бејни јујулмуш азәрбајҹанлы ҝәнҹләрдир. Онлардан јалныз ДАП-ын Азәрбајҹан үзрә координатору Мустафа Саатчынын адыны дәгигләшдирә билдик.
Диггәт: Хәбәрдән истифадә етдикдә мәнбәјә истинад лазымдыр.
