Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Русијанын Тәһсил вә Елм Назирлији заһири әламәтләринә ҝөрә тәләбәләрин али мәктәбләрә чыхышыны мәһдудлашдырмағы јолверилмәз адландырыб. Бу барәдә назирлијин мәтбуат хидмәтиндән РИА Новости аҝентлијинә Һиҹаблы абитуријентлә бағлы вәзијјәти шәрһ едәркән билдирилиб.
“Али тәһсил үзрә тәһсил тәшкилатларына бу сәбәбләрә ҝөрә истәнилән имкан мәһдудлашдырылмасы јолверилмәздир. Тәләбәләрин хариҹи ҝөрүнүшү үзрә тәләбләр али мәктәбин дахили низам-интизам гајдалары илә мүәјјән едилмәлидир, али мәктәбин администрасијасы исә бу тәләбләрин јеринә јетирилмәсинә нәзарәт етмәлидир. Русијада тәһсил һүгугу ҹинсиндән, иргиндән, миллијјәтиндән, дилиндән, мәншәјиндән, әмлак, сосиал вә вәзифә вәзијјәтиндән, јашајыш јериндән, динә мүнасибәтиндән, әгидәсиндән, иҹтимаи бирликләрә мәнсубијјәтиндән вә диҝәр һаллардан асылы олмајараг зәманәт едилир." - дејә, назирлијин мәтбуат хидмәтиндән верилән ачыгламада дејилир.
Гејд едәк ки, бир мүддәт өнҹә КИВ-дә Москва Дөвләт Бејнәлхалг Мүнасибәтләр Институтунун мүһафизәсинин Һиҹаблы абитуријенти бурахмагдан имтина етмәси мәлуматлары јајылмышды. МДБМИ - Русијанын Хариҹи Ишләр Назирлијинин али мүәссисәсидир.
Русијанын тәһсил оҹагларында Һиҹаб ҝејими мәсәләси дәфәләрлә мүзакирә едилмиш, өлкәнин президенти бу бахымдан "Русијанын тәһсил мүәссисәләриндә Һиҹаб ҝејинмәкдән јахшы һеч нә јохдур" дејә билдирмишди.
Диггәт: Хәбәрдән истифадә етдикдә мәнбәјә истинад лазымдыр
