Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, бу ҝүн 6 мај 2016 тарихинә тәсадүф едән Һиҹри Гәмәри тарихи илә 28 Рәҹәб ајы Исламын ән бөјүк зәһмәткеши, Мөмүнләрин Ағасы, Ислам Пејғәмбәринин (сәлләллаһу әлејһи вә алиһ) Мәккә мүшрүкләри гаршысында һимајәдары, һәзрәти Муһәммәд Пејғәмбәрин (сәлләллаһу әлејһи вә алиһ) ән севимли әмиси һәзрәти Әбу Талиб ибн ӘбдүлМүттәлибин вәфат ҝүнүдүр. О, Бесәтин (һәзрәти Пејғәмбәрин пејғәмбәрлијә сечилдији ҝүн) 10 –ҹу илиндә Рәҹәб ајынын 28-дә (милади тарихи илә 619-ҹу илдә) Шиби Әбу Талибдә (Әбу Талибин (ә) иҹад етдији јашајыш мәнтәгәси) Лә Иләһә Илләлләһ вә Муһәммәдән рәсулилләһ кәлмәсини дилинә ҝәтирәрәк фани дүнја илә видалашыр.
Биз АБНА олараг бу һүзүнлү вә кәдәрли ҝүнү башда Имам Заман һәзрәтләринә, Онун һагг наиби Имам Хаменеијә, Али Тәглид Мәрҹәләринә вә бүтүн Ислам Аләминә дәрин һүзнлә баш сағлығы веририк.
Һәзрәти Әбу Талибин (ә) Һәјаты Һагда Гыса Мәлумат
Һәзрәти ӘбдүлМүтәллиб оғлу һәзрәти Әбу Талиб (әлејһи сәлам) милади тарихи илә 540-ҹы илдә мөмүн бир аиләдә дүнјаја ҝәлмишдир. О, Талибин атасы олдуғу үчүн Әбу Талиб Ләгәбини дашыјырды. Бәни Һашим гәбиләсинин башчысы,Һз.Мәһәммәдин әмиси, шиәләрин илк имамы вә сүннүләрин дөрдүнҹү хәлифәси һәзрәти Әлинин атасыдыр. Ислам пејғәмбәри һәзрәти Мәһәммәдин (сәлләллаһу әлејһи вә алиһ) атасы һәзрәти Әбдүллаһ (әлејһи сәлам) илә анадан биридиләр. Һәзрәти Әбу талиб гардашы һәзрәти Әбдүллаһын (әлејһи сәлам) вәфатиндан сонра һәзрәти Мәһәммәд Мустафанын гәјјумлуғуну өһтәсинә ҝөтүрүр.
Пејғәмбәр һимајәдары Әбу Талиби хејир-дуа илә јад едирди
Һәзрәти Муһәммәд Пејғәмбәр (с) Әбу Талибә нәинки сағлығында сонсуз еһтирам бәсләмиш, һәтта вәфатындан сонра да онун руһуну рәһмәт вә хејирхаһлыг арзусу илә јад етмишдир. Ашағыдакы рәвајәтләрдән бу, ашкар ҝөрүнүр:
а) Бир дәфә Пејғәмбәрин әмиси Аббас ондан сорушур: "Ја Рәсулуллаһ, Әбу Талиб үчүн Аллаһдан нә исә диләјирсәнми?". Пејғәмбәр белә ҹаваб верир: "Рәббимдән бүтүн хејир вә јахшылығы онун үчүн диләјирәм" ("Әл-Ғәдир", ҹилд 7, сәһ. 373). Риҹал алимләри сөјләмишләр ки, бу һәдисин бүтүн равиләри сиггәтдир (јәни мөтәбәрдир).
б) Әбу Талибин оғлу Әгил Исламы гәбул едәндән сонра Пејғәмбәр она хитабән сөјләди: "Еј Әбу Језид! Мәним сәнә икигат мәһәббәтим вар. Әввәла, она ҝөрә ки, мәнә гоһумсан. Икинҹиси, она ҝөрә ки, әмим Әбу Талибин сәни чох севдијини билирәм" ("Әл-Ғәдир", ҹилд 7, сәһ. 375).
ҹ) Пејғәмбәр Әбу Талибин вәфат хәбәрини ешидәндә сонсуз дәрәҹәдә кәдәрләнмиш, ағламыш, онун дәфниндә шәхсән иштирак етмиш вә онун руһу үчүн хејир-дуа етмишдир. Рәвајәт едирләр ки, Әбу Талиб вәфат едәркән Һәзрәти Муһәммәд Пејғәмбәр (с) өз кәдәрини белә ифадә етмишди: "Вај ата! Вај Әбу Талиб! Сәнин вәфатына ҝөрә чох һүзнлүјәм. Неҹә буна сәбир едим ки, мән кичик оланда сән мәни тәрбијә етдин, бөјүјәндә дәвәтими гәбул етдин. Сән мәни ҝөз бәбәји вә бәдәндәки руһ гәдәр севирдин! " ("Тәфсири-нүмунә", ҹилд 5, сәһ. 196).
ч) Әбу Талибин дәфниндән гајыдандан сонра Пејғәмбәр ҹамаатын ичиндә дуруб белә сөјләмишди: "Валлаһи, гијамәт ҝүнүндә әмим үчүн елә шәфаәт едәҹәјәм ки, бүтүн инсанлар вә ҹинләр һејрәт ичиндә галаҹаглар" ("Әл-Ғәдир", ҹилд 7, сәһ. 386).
Әбу Талибин вәсијјәти
Әбу Талибин Һәзрәти Муһәммәдә (с) бир пејғәмбәр вә дин башчысы кими әһәмијјәт вермәси вә онун тәһлүкәсизлији барәдә нараһат олмасы өлүмгабағы гүрејшиләрә сөјләдији вәсијјәтдән дә ашкар ҝөрүнүр: "...Сизә бу евә (јәни Кәбәјә) һөрмәтли олмағы вәсијјәт едирәм; Рәббин разылығы, рузинин давамлылығы вә чәтинликләр гаршысында дөзүм бундан асылыдыр. Гоһумларла әлагәни сыхлашдырын, үзмәјин, чүнки гоһумларла меһрибанлыг өлүмү узаглашдырар вә артымы чохалдар. Зүлмдән әл чәкин, сиздән әввәлкиләр зүлмкарлыг үзүндән һәлак олдулар. Чағырана һај верин, јардым истәјәнин дадына чатын, һәм һәјатын, һәм дә өлүмүн шәрәфи бундадыр. Сөзүнүздә дүрүст вә етибарлы олун ки, ҹамаат ичиндә еһтирамыныз олсун!
Сизләрә Муһәммәдлә мүнасибәтдә јахшы давранмағы вәсијјәт едирәм. О, Гүрејшин әманәтдары, әрәбләрин ән дүрүстү вә сизә вәсијјәт етдикләримин һамысыны өзүндә бирләшдирәндир. О, сизин үчүн елә бир дин ҝәтирмишдир ки, гәлб вә руһлар гәбул едир, амма дилләр истеһза вә тәнә горхусундан инкар едир..." ("Әл-Ғәдир", ҹилд 7, сәһ. 366).
Нәтиҹә
Сонда бүтүн дејиләнләри үмумиләшдирәрәк, охуҹулара бу суалла мүраҹиәт едирик: Һәзрәти Муһәммәдин (с) доғумундан әввәл Әбу Талиб онун пејғәмбәр олаҹағыны билмиш вә онун дининә иман ҝәтирдијини елан етмишдир. Пејғәмбәримизин дәвәтинин илк дөврләриндән башлајараг, Әбу Талиб ону мүдафиә етмиш, һәтта өз оғуллары Әли вә Ҹәфәри, гардашы Һәмзәни мүсәлман олмаға һәвәсләндирмишдир. Гүрејшин бүтүн тәзјигләринә сәбир вә дәјанәтлә дөзән бу гоҹаман шәхс бир ан да олса, өз һимајәсини Пејғәмбәрин үзәриндән ҝөтүрмәмишдир. Мүшрикләр мүсәлманлара гаршы үмуми бојкот елан едиб онлары Мәккәдән говдугда, Әбу Талиб дә онлара гошулду вә өзүнә мәхсус олан әразидә (Әбу Талиб дәрәси кими мәшһурдур) мүсәлманлара јер верди. Орада сонсуз әзијјәтләрә, аҹлыға, сојуға, мүхтәлиф әзаблара синә ҝәрди вә елә бу ишҝәнҹәләр нәтиҹәсиндә сағламлығы тамамилә позулараг, гыса мүддәтдән сонра вәфат етди. Нәзәрә алмаг лазымдыр ки, бу заман Әбу Талиб гәбилә рәиси вә кифајәт гәдәр нүфуза малик шәхс иди. О, сакит јашамаг хатиринә Пејғәмбәрә арха чевирә дә биләрди. Лакин Әбу Талиб дахилиндән ҝәлән иманын тәсири илә Сонунҹу Пејғәмбәрә сонунҹу дини јајмаг ишиндә јардымчы олмағы үстүн тутду. Бүтүн бунлардан сонра ону мүшрик вә кафир сајмаг мәнтигә вә инсафа нә дәрәҹәдә ујғундур?
Диггәт: Хәбәрдән истифадә етдикдә мәнбәјә истинад лазымдыр
_57275947950ed_572cc3ebb44d1.jpg)
