Үч ҝүн әввәл сәһәри шәһид хәбәри илә ачмышдыг. Сентјабрын 27-дән 28-ә кечән ҝеҹә тәмас хәттиндә дүшмәнин фәаллашмаг ҹәһдинин гаршысыны аларкән Фүзулинин Алаханлы кәндиндә 3 һәрбчимизи итирдик. Вәлијев Рауф Фәхрәддин оғлу, Әһмәдзадә Неман Испәндијар оғлу вә Мустафазадә Зөһраб Намиг оғлу вәтән јолунда шәһид олду.
Бу ҝүн онларын өлүмүнүн 3-ҹү ҝүнүдүр. Мәһәммәди кәндиндәјик. Зөһрабҝилдә. Даһа доғрусу Зөһрабын 3 мәрасиминдә. Гапыда бир гыз әјләшиб. Сағында вә солундакы гадынлар овҹуну овур, үзүнә су вурурлар. Өјрәнирик ки, бу, Мәдинәдир. Зөһрабын бөјүк баҹысы. Дејирләр, гардашынын шәһид хәбәри ешидәндән бәри беләдир. Тез-тез һалы писләшир, үзүнә су вуруб өзүнә ҝәтирирләр.
Јахынлашырыг. Нә гәдәр һалсыз олдуғу үз-ҝөзүндән бәллидир. Ҝөзләрини галдырыб үзүмә бахыр. Нәсә дејәҹәјини дүшүнсәм дә, динмир. Данышмаја да һеји галмајыб. Бир нечә санијә үзүмә бахыб, ҝөзләрини јерә дикир јенә.
Гадынлар олан мәҹлисә кечирик. Анасы Көнүл хала лап башда әјләшиб. Диҝәр гадынларын јанында. Јанындакы јашлы гадын онун сол әлини өз овҹунда бәрк-бәрк сыхыб. Ағламыр. Тохтамыш ҝөрүнүр. Мәтанәт ҝөстәрир. Һәрдән јанағындан бир дамла сүзүлүр вә дәрһал өзүнү топлајыр вә әввәлкиндән дә дик дајаныр.
Мустафазадәләр аиләси илк иткисинин илләр әввәл вериб. 2 ил әввәл сүрәтлә ҝәлән тәҹили јардым машыны аилә башчысынын һәјатына сон гојур. Јолу кечмәкдә олан Намиг Мустафазадә елә гәза јериндәҹә ҹан вериб. 2 илдир ушагларына һәм аталыг, һәм аналыг едән Көнүл хала Зөһрабы әсҝәрлијә јола салдыгдан сонра аиләнин јүкүнү тәк дашымалы олуб. Она гәдәр Зөһраб чилинҝәр ишләјәрәк анасына вә баҹыларына бахырмыш.
3 баҹынын јеҝанә гардашы олан Зөһраб аиләнин икинҹи өвладыдыр.
Јашасајды декабрын 9-да 19 јашы олаҹагды. Өзүндән бөјүк бир, өзүндән кичик даһа 2 баҹысы вар. Мәдинә аиләнин илк өвладыдыр. Тәләбәдир. Мәрјәмлә Ајдан исә мәктәбли.
Зөһрабын анасы дејир ки, ҹәбһәдән һәр шәһид хәбәри ҝәләндә елә һеј дејәрмиш, ҝөрәсән, оғлум дејил ки?! Санки үрәјинә данмыш кими һәр хәбәрдән диксинир, һәр хәбәрдән горхурмуш. Будур, горхдуғу башына ҝәлди...
- Ишдәјдим. “Кәнд совет”индән зәнҝ етдиләр ки, сујла бағлы шикајәтиниз вар? Дедим, јох. Дедиләр, бәс сизин телефондан бизә зәнҝ ҝәлиб. Дурдум ҝетдим евә. Иҹрадан, бәләдијјәдән ҝәлмишдиләр. Онлары гаршыладым. Дајымын нөмрәсини истәдиләр, вердим. Јенә дә һеч нә баша дүшмәдим.
Давам едә билмир. Мәҹлис боју өзүнү сыхан гадын санки о дејилди. Тәкликдә галдығымыздан истифадә едиб ағлајыр. Ағлаја-ағлаја да “бағышлајын”, дејир. Нә үчүн үзр истәдијини анлаја билмирик. Нә мән, нә дә фотографымыз Фәхри. Ону тәсәлли едәҹәк сөз дә тапмырыг. Дејиләҹәк бүтүн сөзләр индијә гәдәр дејилмишди она.
Бәлкә сакитләшәр дејә, әлини тутурам. Бармагларымы овҹунда сыхыб даһа да һөнкүрүр. Бирдән Фәхри дилләнир:
- Һәр адама нәсиб олмур шәһидлик!
Санки бу сөз ону өзүнә ҝәтирир. Ҝөзүнү силиб башыны дикәлдир, галдығы јердән давам едир:
- Дајымын нөмрәсини истәјәндән сонра нәсә раһатлыг һисс еләдим. Чыхдым бајыра. Ҝөрдүм гапымызда машынлар дајаныб. Машындан чохлу адамлар дүшдү. Бири дә молла. Молланы ҝөрүнҹә, үрәјим сыхылды. “Кәнд совет”инин бөјүјүнү таныјырдым. Ҝөрдүм ҝөзләри долуб. Дедим, өвладым шәһид олуб? Деди, "һә".
Бир-ики ҝүн габаг һисс еләмишдим...
Сентјабрын 25-дә ҹәбһәдә ҝедән гызғын дөјүшләрдә Азәрбајҹан Силаһлы Гүввәләри даһа бир әсҝәрини итирмишди. 23 јашлы Елшән Вагиф оғлу Мәммәдову. Телевизорда Елшәнин шәһид олмасы һаггында хәбәри ешидән Көнүл хала өз баласыны итирмиш кими отуруб ағлајыр.
- Бүтүн өвладлар шәһид оланда ҝөз јашы төкүрдүм. О ҝүн шәһид хәбәри ешидәндә гызларла отуруб ағладыг. Дедим, Аллаһ анасына сәбр версин! Намаза отурдум. Бејнимдә дә ејни суал варды. Дедим, ҝөрәсән, балам шәһид олса, мән нә һиссләр кечирәҹәм?!
Бу һадисәдән 2 ҝүн сонра оғлунун шәһид хәбәрини алыр. Зөһраб топчу олуб. Әсҝәр јолдашларынын дедијинә ҝөрә, дүшмәнлә ҝедән ағыр дөјүшләрдә һазыр вәзијјәтдә дајанан топчуларын арасына мәрми дүшүр. Гәлпәләрдән бири Зөһрабын алнына, диҝәри исә дүз үрәјинә дәјир. Әсҝәрләрдән бири ағыр јараланса да, диҝәр үчү јериндәҹә кечинир. Зөһраб Мәһәммәди кәндинин илк шәһидидир.
Јәгин, чохларыныза да мараглы олар. Зөһрабын севдији вардымы? Анасы дејир ки, ҹәми бир дәфә араларында белә бир сөһбәт олуб. Онда да ҝүлүб, кечиб.
- Деди, Аллаһ һаггы, јохумду. Дедим, ола билмәз ахы, 18 јашында оғланын үрәјиндә кимсә олмаја?! Деди, әсҝәрлијә ҝедим-ҝәлим баҹыларымы охудум, сонра бахарыг. Фикри-зикри биздәјди. Баҹылары вә анасы. Чох истәјирди ки, баҹылары али тәһсил алсын. Өзү дә охујаҹагды. Әсҝәрликдән ҝәләндән сонра техникума сәнәд верәҹәкди. Гисмәт олмады...
- Ахырынҹы дәфә нә вахт данышмышдыныз?
- Өлүмүндән ики ҝүн әввәл, Гурбан бајрамында. Өзү зәнҝ еләмишди. Деди, мама, бајрамын мүбарәк! Нечә-нечә бајрамлара чыхасан! Бирҹә дәфә демәди ки, чыхаг. “Чыхасан”, деди. Деди, елә дарыхмышам сәндән өтрү! Ијин үчүн...
Вә јенә башлајыр ағламаға.
- Әсҝәрлијә јола саланда, дедим, гагаш, өлүм о дүнјада да вар, бу дүнјада да. Алны ачыг ҝет, алны ачыг ҝәл! Дедим, Аллаһ нәсиб еләсә, сән дә шәһид олаҹагсан. Амма маман гурбан, бирҹә горхма! Билмирәм нијә елә дедим?! Аллаһ дедиздирди, елә бил. Оғлум али зирвәјә чатды! Һәр дәфә онун забитијлә данышанда дејирди, Зөһраб бизә һеч бир проблем јаратмыр. О гәдәр сакит ушаг иди ки... Гәлбим ган ағлајыр. Аллаһ һеч бир анаја ҝөстәрмәсин, бала! Ајдан дејир, мама шәһид һагда шеир дејәндә гүрурла дејәҹәм! Әсҝәрлијә тәзә ҝетмишди, хәстәләнди. Ҝөндәрдиләр, “Папанин”ә мүалиҹәјә. Елә һеј ҝилејләнирди ки, наһаг мәни бура ҝәтирдиләр. Мән гајытмаг истәјирәм. Дедим, ај бала, дөјүшмәк үчүн дә ҝәрәк сағлам оласан да. Анан вә анан кими аналары горумаг үчүн. Сағаландан сонра 2 һәфтәлик мәзунијјәт вердиләр. Ахырынҹы дәфә мајда ҝөрмүшдүм баламы. Бир дә о ҝүн ҝөрдүм. Үчрәнҝли бајраға бүрүмүшдүләр...
Мәзунијјәтә ҝәләндә һәм дә чохлу шәкилләр чәкдирир Зөһраб. Әсҝәр палтарында. Анасы дејир ки, гүрурла дашыјырды о форманы. Ҝејиниб мәғрур ҝәзирмиш. Јахшы ки, о шәкилләри чәкдириб. Чүнки Зөһрабдан о шәкилләр галыб. Бир дә бајраг. Нәшинин бүкүлүб ҝәтирилдији. Инди о бајраг мәзары үстүндә галыб.
Зөһраб 2 ҝүн әввәл Мәһәммәди кәнд гәбиристанлығында торпаға верилиб. Дәфниндә Абшерон рајон иҹра һакимијјәтинин нүмајәндәләри, кәнд бәләдијјә сәдри, һәрби һиссә командири, забитләр дә иштирак едиб. Аиләнин мадди вәзијјәти јахшы олмадығындан шәһидин јас мәрасимини вә диҝәр хәрҹләри рајон Иҹра Һакимијјәти вә кәнд бәләдијјә сәдри өз бојнуна ҝөтүрүб.
Диггәт: Хәбәрдән истифадә етдикдә мәнбәјә истинад лазымдыр
