Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, мәрасимдә Русија президенти Владимир Путин, бир сыра мүсәлман өлкәләринин нүмајәндәләри, сәфирләр вә Русијада фәалијјәт ҝөстәрән диҝәр дини конфенсијаларын рәһбәр шәхсләри иштирак едибләр.
Ачылыш мәрасими "Фатиһә" сурәсинин охунмасы илә башлајыб.
Сонра Русија Мүфтиләр Шурасынын сәдри Равил Гајнутдин чыхыш едиб. Мәсҹидин инша едилмәсиндә В. Путин вә Москва мери Серҝеј Собјанинин хүсуси хидмәтләри олдуғуну сөјләјән баш мүфти дағыстанлы иш адамы Сүлејман Кәримова ҝөстәрдији мадди дәстәјә ҝөрә миннәтдарлығыны билдириб.
Фәләстин президенти Маһмуд Аббас исә чыхышы заманы дүнја мүсәлманлары үчүн хүсуси өнәми олан Әл-Акса мәсҹидинә олан һүҹумлардан данышыб. Дүнјанын ҝөзү гаршысында Исраилин Әл-Акса мәсҹидинә һүҹум етдијини сөјләјән Фәләстин лидери дүнја иҹтимаијјәтини гынајыб.
В. Путин исә чыхышында мәсҹид ачылышыны Русија мүсәлманлары үчүн бөјүк тарихи һадисә адландырыб: "Ислам Русијанын әнәнәви динләриндән биридир. Мәсҹидин реконструксијасына ҝөрә, гардаш өлкәләр олан Түркијә вә Газахыстана тәшәккүрүмү билдирирәм. "Гуран"да дејилдији кими јахшы ишләр ҝөрмәјә сәј ҝөстәрин. Мүсәлман изи һәр заман тарихимиздә олуб. Буну пајтахт Москванын күчәләринә бахдыгда да ҝөрмәк олар. Сон 20 илдә Русијада исламла бағлы ибадәт јерләринин сајы дәфәләрлә артыб. Минләрлә инсан Русијадан һәр ил Һәҹҹә ҝедир.
Бу ҝүн Јахын Шәргдә сијаси мәгсәдләрлә инсанларын дини һиссләриндән истифадә олунур. Ислам ады алтында һансы вәһшиликләрин төрәдилдијини, инсанларын вә тарихи абидәләрин мәһв едилдијини ҝөрүрүк".
Гејд едәк ки, 19 мин квадратметр саһәјә малик 3 мәртәбәдән вә ики минарәдән ибарәт олан мәсҹид Авропанын ән бөјүк мәсҹидләриндән биридир. Мәсҹидин һүндүрлүјү 46 метрдир. Мәсҹидин минарәләриндә гурашдырылмыш ејванлардан бүтүн шәһәри сејр етмәк мүмкүндүр. Мәсҹидин тикинтисинә 170 милјон доллар хәрҹләниб.
Диггәт: Хәбәрдән истифадә етдикдә мәнбәјә истинад лазымдыр
