Сон ҝүнләр Русија Мүдафиә Назирлији вә сүлһмәрамлы континҝентинин Азәрбајҹан Республикасынын јашајыш мәнтәгәләринин адларыны ермәниләрин дедикләри кими адландырмасы рәсми Бакынын реаксијасына сәбәб олуб. Анҹаг бу реаксијалар нәдәнсә Русија МН-јә јахуд сүлһмәрамлыларына ја да Русија сәфирлијинә дејил мәтбуата ачыгланыр.
Дүнән ҝеҹә Азәрбајҹан Республикасы МН бир даһа мәтбуата ачыгламасында билдириб ки,
Азәрбајҹан Республикасы әразисиндәки јашајыш мәнтәгәләринин адларынын ујдурма ермәни топонимләри илә гејд олунмасы, о ҹүмләдән "Дағлыг Гарабағ әразиси" ифадәсинин ишләнмәси илә бағлы бир даһа гејд етмәк истәјирик ки, бу ЈОЛВЕРИЛМӘЗДИР.
Азәрбајҹан Республикасы МН мәтбуата ачыгламасында ејни заманда бу кими һалларын тәкрар олунмајаҹағына садәҹә үмидварлығыны билдирмәклә кифајәтләниб:
“Русија Федерасијасынын сүлһмәрамлы континҝентини рәсми мәлуматларында гејд етдијимиз јанлыш ифадәләрдән истифадә етмәмәјә чағырырыг вә бу чағырышымыза әмәл олунаҹағына үмид едирик.”
МН нечәнҹи дәфә олараг Русија мүдафиә назирлији тәрәфиндән јајылан хәритәјә дүзәлиш едилмәсини истәјиб: “Өлкәмизин адынын да пајлашдыглары хәритәдә дүзҝүн гејд олунмасыны тәләб едирик.
Бир даһа хатырлатмағы өзүмүзә борҹ билирик ки, Русија Федерасијасынын Мүдафиә Назирлијинин рәсми интернет сәһифәсиндә дәрҹ олунан Русија Федерасијасынын сүлһмәрамлы континҝентинин 29.11.2022-ҹи ил тарихли рәсми мәлуматында "Дағлыг Гарабағ әразиси" кими гејд олунан әрази Гарабағ игтисади рајонудур, “Мардакерт” вә "Мартуни" кими адландырылан Азәрбајҹан јашајыш мәнтәгәләринин рәсми адлары исә мүавафиг олараг АҒДӘРӘ, ХОҸАВӘНДДИР.”- МН-нын бәјанатында дејилир.
“Сүлһмәрамлы континҝентин һәмин мәлуматда гејд етдији ҝуја Азәрбајҹан Ордусунун бөлмәләри тәрәфиндән Шуша истигамәтиндә атәш ачылмасы вә нәтиҹәдә ики нәфәрин јараланмасы барәдә хәбәрин дә һеч бир реал әсасы јохдур, тамамилә јаландыр. Бу мәлуматы гәти сурәтдә тәкзиб едирик”,- дејә Азәрбајҹан Республикасы Мүдафиә Назирлијинин мәтубуата ачыгламасында билдирилиб.
342/
