Әли Кәримли Османгызы Интернет Телевизијасына вердији мүсаһибәдә дејиб: “Әлијевин бу сөзләри даһа чох дахили аудиторијаја көкләниб, чүнки Әлијев һакимијјәти Азәрбајҹан Республикасында игтисади проблемләри, коррупсија мәсәләләрини вә диҝәр чатышмазлыглары һәлл етмәк игтидарында дејил вә о, чох ҝөзәл билир ки, ҹәмијјәт етник шүарлара һәссасдыр вә онлары бәјәнир. Бу сәбәбдән Илһам Әлијев бир мүддәт Гарабағ вә Зәнҝәзур шүары илә иҹтимаи рәји манипулјасија едәрәк халгы мәшғул етди вә инди дә проблемләрә реаксија вермәмәк вә диггәтләри өлкәдә јашанан фаҹиәләрдән јајындырмаг үчүн халгы “Ҝүнеј Азәрбајҹан” шүары илә мәшғул етмәјә чалышыр”.
Партија сәдринин гәнаәтинҹә, инсанларын сосиал шәбәкәләрдә ҝөстәрдији реаксијалар Илһам Әлијевин инсанлары алдада билмәјәҹәјини сүбут едир. “Чох адам јазыр ки, сиз Азәрбајҹан Республикасынын 10 милјон вәтәндашыны пис ҝүнә салмысыныз, јердә галан 30-40 милјон инсаны да бу вәзијјәтә салмаг истәјирсиниз? Инсанлар һәмчинин јазыр ки, өз халгынын һүгугуну бу гәдәр тапдалајан һакимијјәт неҹә башгаларынын һүгугларыны мүдафиә етмәк иддиасында ола биләр?”- дејә Әли Кәримли вурғулајыб.
АХҸП сәдри сөһбәтинин сонунда тајфа режиминә белә бир суал үнванлајыб: “Илһам Әлијев 20 илдир ки, Азәрбајҹан Республикасына рәһбәрлик едир вә Иран азәриләри мәсәләси ону нараһат едирсә, бу 20 илдә бирҹә дәфә олсун, нијә бу мәсәләни ҝүндәмә ҝәтирмәјиб?”
342/
