БМТ-нин Инсан Һаглары Шурасы ҹүмә ахшамы ҝүнү Ҹеневрәдә Иранда инсан һаглары вәзијјәтини писләмәк вә сон иғтишашлара дәстәк вермәк мәгсәди илә иҹлас кечириб. Бир чох гәрб өлкәләринин Иранын инсан һаглары сијасәтини тәнгид етмәсинә бахмајараг, бәзи өлкәләр шураны икили стандартлар јүрүтмәкдә иттиһам едибләр.
Ҝөрүшүн әввәлиндә Иран президентинин гадын вә аилә мәсәләләри үзрә көмәкчис Хәдиҹә кәрими Гәрб өлкәләринин инсан һагларындан сијаси мәгсәдләр үчүн истифадә етмәсини утанҹвериҹи адландырыб вә дејиб: Алманијанын Ирандакы инсан һагларынын вәзијјәти илә бағлы сијаси мотивли аддымы ҝизли нијјәтли мүтәшәккил бир пландыр, лакин һеч бир нәтиҹә вермәјәҹәк".
Кәрими әлавә едиб: "Америка режиминин Ирана гаршы биртәрәфли санксијалар тәтбиг етмәси вә Авропа өлкәләринин, хүсусилә Алманија, Инҝилтәрә вә Франсанын бу сәрт санксијалары һәјата кечирмәси сәбәбиндән Иран халгынын һүгуглары дырнагарасы инсан һаглары гәһрәманлары тәрәфиндән ҝениш шәкилдә позулдуғу һалда, Ирандакы инсан һагларынын вәзијјәтиндән нараһатлыг ифадә етмәк вә хүсуси иҹлас кечирмәк алдадыҹы вә фырылдагчылыгдыр".
О, гејд едиб ки, бу ҝүн Иранла бағлы хүсуси иҹласын кечирилмәсинә сәбәб олан инсан һаглары иддиачылары Иран халгына гаршы гәддар санксијалар тәтбиг етмәклә, онларын фундаментал һүгугларыны, хүсусән дә Иранда гадын, гыз вә ушагларын һүгугларыны ҹидди вә кобуд шәкилдә позурлар. Онлар бу ҹүр гејри-инсани һәрәкәтләрлә Иранда гадын, гыз вә ушагларын һүгугларыны дәстәкләдикләрини иддиа едә билмәзләр.
Ҝөрүшүн давамында Чинин БМТ-нин Инсан Һаглары Шурасындакы сәфири вә нүмајәндәси дејиб: "Инсан һаглары вә Инсан Һаглары Шурасы өлкәләрин дахили ишләринә гарышма васитәсинә чеврилмәмәлидир".
Чин нүмајәндәси өлкәсинин Ирана гаршы хүсуси иҹласын кечирилмәсини дәстәкләмәдијини билдирәрәк, әлавә едиб: "Ирана гаршы залымҹасына санксијалар бу өлкәнин халгына ҹидди зијан вуруб вә буна сон гојулмалыдыр".
Венесуеланын даими нүмајәндәси дә Гәрб өлкәләринин Инсан Һаглары Шурасында Иранла бағлы хүсуси иҹласын кечирилмәсини тәләб етмәләрини бу өлкәләрин Инсан Һаглары Шурасындан өз сијаси мәгсәдләри үчүн суи-истифадә етмәләри илә бағлы сијаси ојунбазлыгларынын давамы кими характеризә едиб.
Кубанын сәфири вә даими нүмајәндәси исә Иран әлејһинә хүсуси иҹласын кечирилмәсинә гаршы чыхараг, дејиб: "Бу иҹласын кечирилмәси Гәрб һөкумәтләринин Инсан Һаглары Шурасындакы ајры-сечкилик давранышынын диҝәр бир нүмунәсидир".
Пакистан, Сурија, Никарагуа, Шимали Кореја вә Зимбабве нүмајәндәләри БМТ-нин Инсан Һаглары Шурасынын даими иҹласында Ирана гаршы санксијаларын давам етдирилмәсиндән нараһатлыг ифадә едибләр вә билдирибләр ки, БМТ-нин Инсан Һаглары Шурасынын Иран мөвзусу илә хүсуси иҹлас кечирмәси гејри-конструктивдир вә Инсан Һаглары Шурасында вәзијјәти даһа да мүрәккәбләшдирир.
342/
