Алимәгамлы Рәһбәрин офисинин информасија порталынын вердији мәлумата ҝөрә, Һәзрәт Ајәтуллаһүл-үзма Хаменеи 17 рәбиүл-әввәл, Әзиз Ислам Пејғәмбәринин (с.ә.с) вә Имам Ҹәфәр Садигин (ә) мөвлудунун илдөнүмү мүнасибәти илә Иранын бир груп дөвләт рәсмиләри вә Бејнәлхалг Ислами Вәһдәт Конфрансында иштирак едән гонаглар илә ҝөрүшүбләр.
Бу ҝөрүшдә о, һәзрәт "Мүсәлманларын бирлији вә дәјишкән дүнјада јүксәк мөвгејә саһиб олмаг мүмкүндүрмү?" суалыны үнванлајараг, белә бујурублар: "Бәли, мүсәлман халглар арасында бирлик мүмкүндүр, лакин бунун үчүн сәј вә һәрәкәт, тәзјиг вә сыхынтылар гаршысында дајанмаг лазымдыр".
Ислам Ингилабынын Алимәгамлы Рәһбәри бу контекстдә ән чох үмидин Ислам дүнјасынын елит тәбәгәсинә вә бәсирәтли ҝәнҹләрә вә онларын иҹтимаи рәји јөнәлтмәкдәки ролуна олдуғуну вурғулајыблар вә әлавә едибләр: "Бунун реаллашмасынын мүмкүнлүјүнүн бир нүмунәси Иран Ислам Республикасыдыр. Кичик бир фидан ки, Имам Хомејнинин (р.ә) рәһбәрлији алтында о дөврүн ики супер ҝүҹү гаршысында дајанды вә о фидан инди ҝөвдәли бир ағаҹа чеврилиб ки, ону кәсмәји ағлына ҝәтирәнләр белә јанылырлар".
Һәзрәт Ајәтуллаһүл-үзма Хаменеи гејд едибләр: "Биз бөјүк дөвләтләр гаршысында дајандыг вә ирәли ҝетдик, әлбәттә ки, мүгавимәтин дә һәр бир иш кими чәтинликләри вар, лакин тәслим оланлар да чәтинликләрлә үзләширләр, бу фәрглә ки, мүгавимәт тәрәггијә, тәслим олмаг исә ҝериләмәјә сәбәб олур".
Ислам Ингилабынын Алимәгамлы Рәһбәри бәзи Ислам өлкәләринин сионист режимлә әлагәләринин нормаллашдырылмасыны ән бөјүк хәјанәтләрдән бири адландырыб вә дејибләр: "Бәзиләри дејә биләр ки, индики шәраитдә бәзи Ислам өлкәләринин башчыларынын мөвҹудлуғу илә вәһдәтин реаллашмасы мүмкүн дејил. Амма Ислам дүнјасынын зијалылары, елиталары, арифләри дүшмәнин истәдијиндән фәргли атмосфер јарада биләрләр, белә олан һалда бирлијә наил олмаг, даһа асан олаҹаг".
Ислам Ингилабынын Алимәгамлы Рәһбәри ИШИД-ин Ираг, Сурија вә Әфганыстанда төрәтдији ҹинајәтләрдән, хүсусилә дә ҝүнаһсыз тәләбәләрин өлдүрүлмәсиндән тәәссүфләндијини билдириб вә әлавә едиб ки, һәм шиә вә һәм сүнни тәрәфдә шиәлик вә ја сүнниликлә һеч бир әлагәси олмајан екстремистләр вар вә онларын әмәлләриндән Ислам мәзһәбләринә гаршы иттиһамлар јајмаг үчүн бәһанә кими истифадә едилмәмәлидир вә бир мәзһәбдән тәрәфдарлыг етмәк ады илә гаршы тәрәфин һиссләрини ојаданлар барәсиндә ҹидди тәдбирләр ҝөрүлмәлидир.
О Һәзрәт, Фәләстиндә вә Ислам дүнјасынын диҝәр бөлҝәләриндә артан сыхынтылар, тәзјигләр вә гәтлләри "Ислам үммәтинин парчаланмасынын" нәтиҹәси һесаб едиб, мүсәлманлар арасында ортаг нөгтәнин мөвҹудлуғуна тохунараг, бујурублар: "Ислам Республикасы ислами бирлијә наил олмаг үчүн әлиндән ҝәләни едиб вә бунун бариз нүмунәси Фәләстиндәки сүнни гардашлара һәртәрәфли дәстәкдир вә биз буну там гүввә илә давам етдирәҹәјик".
Ислам Ингилабынын Мүәззәм Рәһбәри Ислам дүнјасында формалашан мүгавимәт ҹәбһәсинин Иран Ислам Республикасы тәрәфиндән дәстәкләндијини вурғулајараг, дејибләр: "Биз Аллаһын лүтф вә јардымына инанырыг вә бөјүк Ислам бирлији арзусунун әмәли шәкилдә реаллашмасына үмид едирик".
342/
