Украјна мүһарибәнин ҝедишатыны өз хејринә дәјишдијини иддиа едир

АБНА24 Хәбәр Верир , Украјнанын Мүфаиә Назирлији билдириб ки, Русија Силаһлы Гүввәләринин Ҹәнуб Һәрби Даирәсинин 8-ҹи Бирләшмиш Силаһлы Гүввәләринин командири, гвардија ҝенерал-лејтенанты Андреј Мордвичев өлдүрүлүб.

Мәлуматда һәмчинин иддиа олунур ки, Русија Ҹәнуб Һәрби Даирәсинин 8-ҹи Әлаһиддә Үмумгошун Ордусунун команда мәнтәгәси командирлә бирликдә мәһв едилиб.

Мартын 19-на олан мәлумата ҝөрә, Русијанын Украјнадакы ҹанлы гүввә иткиси 14.400 нәфәрә чатыб.

Мәлуматда дејилир ки, февралын 24-дән давам едән һәрби әмәлијјатлар заманы Русијанын 466 танкы, 1470 зиреһли дөјүш машыны вә 213 артиллерија системи, 72 әдәд реактив јајлым атәш системи, 44 һава һүҹумундан мүдафиә системи, 95 тәјјарә, 115 һеликоптер, 914 автомобил техникасы, 3 ҝәми/гајыг, 60 јанаҹаг-сүрткү материалы олан систерн, һәмчинин 17 әмәлијјат-тактики пилотсуз учуш апараты вә 11 әдәд хүсуси техникасы мәһв едилиб.

Бу арада Америка кәшфијјаты исә Русија гошунларынын Украјнада бүтүн истигамәтләрдә һүҹуму дајандырдығыны хәбәр вериб.

Пентагонун ады ачыгланмајан јүксәк чинли мәмуру билдириб ки, рус силаһлыларынын Кијевә шимал, шимал-гәрб, еләҹә дә 30 км аралыда јерләшдикләри шәрг истигамәтиндән ирәлиләјиши гејдә алынмыр.

Пентагон нүмајәндәсинин сөзләринә ҝөрә, мүдафиә хәттини јармаг ҹәһдләринә бахмајараг, рус һәрбчиләринин Харкова јахынлашмасыны мүшаһидә етмирләр, Чернигов вә Мариупол мүһасирәдә галса да, украјналыларын шиддәтли мүгавимәти рус гошунларынын ишғалынын гаршысыны алыр.

Америка рәсмиси гејд едиб ки, Русијанын аеродромлара ракет зәрбәләринин артырылмасына бахмајараг, Украјна өз тәјјарәләринин әксәријјәтини дөјүшә һазыр вәзијјәтдә сахлајыр. Бундан әлавә, һава һүҹумундан мүдафиә системләри Русија гырыҹыларыны вә ракетләрини вурмаға давам едир. Она ҝөрә дә Украјна үзәриндәки һава мәканы там олараг русларын нәзарәтиндә дејил.

342/