АБНА24 Хәбәр Верир, Иран-Азәрбајҹан мүнасибәтләриндә ҝедән сон просесләр ҝөстәрир ки, тәрәфләр ики өлкә арасында әлагәләри мөһкәмләндирмәк ирадәсинә маликдир. Бу, Иран һөкумәтинин гоншу дөвләтләрлә гаршылыглы әлагәләри ҝүҹләндирмәк сијасәтинә садиглијини дә тәсдигләјир.
Иранын јол вә шәһәрсалма назири Гасим Рүстәминин Бакыја өтән һәфтә етдији сәфәр, еләҹә дә Азәрбајҹан Республикасынын мүдафиә назири Закир Һәсәновун Ирана сәфәри бу бахымындан ики мүсбәт һадисә кими характеризә олунур. Вә бу, мүнасибәтләрин парлаг ҝәләҹәјиндән хәбәр верир.
Ајдын мәсәләдир ки, нәглијјат саһәси Иранын гоншулары илә әмәкдашлығынын әсас истигамәтләриндән биридир. Бу саһәдә әмәкдашлығын ҝенишләндирилмәси һәм ҝәлир, һәм дә реҝионал тәһлүкәсизлијин тәмини бахымындан әһәмијјәтлидир. Чох сајда гоншусу олан Иран Мәркәзи Асија вә Гафгаз өлкәләрини Фарс Көрфәзи суларына вә Авропа гитәсинә бирләшдирән бөјүк өлкәдир. Азәрбајҹан исә өз нөвбәсиндә, Иранын Гара Дәниз вә Русијадан кечмәклә Авропаја чыхыш көрпүсү, шимала узанан дәмир јолу маршрутудур. Одур ки, ики өлкә арасында әлагәләрин ҝенишләнмәси стратежи әһәмијјәт дашыјыр. Белә бир вәзијјәтдә Азәрбајҹанын Рәшт-Астара дәмир јолу васитәси илә “Шимал-Ҹәнуб” дәһлизинә гошулмасы ҹидди игтисади газанҹ демәкдир.
Рүстәм Гасиминин Азәрбајҹан Республикасына сәфәри сөзүҝедән маршрутун, хүсусән дә онун 35 километрлик Рәшт-Әнзәли һиссәсинин тикинтисинин сүрәтләнмәсинә сәбәб оларса, тәкҹә дәмир јолу транзити дејил, һәм дә Иран, Азәрбајҹан, Русија вә Хәзәр Дәнизи бојунҹа јерләшән диҝәр өлкәләр арасында дәниз нәглијјаты да ҝенишләнәҹәк.
Азәрбајҹан Республикасынын мүдафиә назири, ҝенерал-полковник Закир Һәсәновун Теһран сәфәринә ҝәлинҹә, онун өлкә президенти, Силаһлы Гүввәләрин Баш Гәрарҝаһ рәиси вә мүдафиә назири илә апардығы конструктив данышыглар һәрби, мүдафиә вә тәһлүкәсизлик саһәсиндә әмәкдашлығын ҝенишләнәҹәјини вәд едир.
Мүдафиә назирләри арасында мүтәмади олараг Теһран вә Бакыда ҝөрүшләр кечирилир ки, бу да ики өлкә арасында етимадын јүксәк сәвијјәдә олдуғуну ҝөстәрир. Белә данышыгларын нәтиҹәләри адәтән ачыгланмаса да, ҝүман етмәк олар ки, бу сәфәр чәрчивәсиндә бирҝә һәрби тәлимләрин давам етдирилмәси, мүдафиә сәнајесиндә әмәкдашлығын инкишафы мүзакирә олунуб, Иран Азәрбајҹанын мүдафиәсинин ҝүҹләндирилмәсинә дәстәк вермәјә һазыр олдуғуну билдириб.
Иранын јол вә шәһәрсалма назиринин Бакыја, Азәрбајҹан мүдафиә назиринин исә Теһрана сәфәри бир даһа ҝөстәрир ки, Иранла Азәрбајҹан гаршылыглы әлагәләри мөһкәмләндирмәк, икитәрәфли мүнасибәтләри ҝенишләндирмәк үчүн јахшы имканлара маликдирләр. Буна наил олунарса, ики өлкә арасында сијаси, игтисади вә тәһлүкәсизлик саһәсиндә гаршылыглы әлагәләрин сәвијјәси әһәмијјәтли дәрәҹәдә јүксәләҹәкдир.
342/
1 fevral 2022 - 13:17
Xəbər kodu: 1224862
Иран вә Азәрбајҹан рәсмиләринин гаршылыглы сәфәрләри әлагәләрин инкишаф динамикасыны сүрәтләндирмишдир
